ဂျင်မီကာတာ ကွယ်လွန်၊

အမေရိကန် သမတဟောင်း ဂျင်မီကာတာ ကွယ်လွန်သွားပါပြီ။ . ငယ်စဥ်ကတည်းက အမြဲတွေ့နေသော TIME နှင့် နျူးစ်ဝိခ် မဂ္ဂဇင်းများကို အရုပ်တွေသာ လျောက်ကြည့်ချိန်မှ စိတ်ဝင်စားတဲ့ ခေါင်းစဥ်များဆို စာအနည်းငယ် လိုက်ဖတ်ကြည့်ချိန်မှာ သူက သမတဖြစ်လာတာပါ။ အမေရိကန်ဆိုတာ ကမ္ဘာ့ နံပတ်တစ်နိုင်ငံ၊ အဲ့ဒီနိုင်ငံရဲ့သမတဆိုတာ တကယ့်အာဏာရှင်ကြီးလို့ သိလာတဲ့အချိန်ပေါ့။ . အဲဒီမဂ္ဂဇင်းတွေထဲမှာ ကာတွန်းပြောင် caricature ပုံတွေနဲ့ သမတကို ပြောင်တဲ့အရုပ်တွေတွေ့တော့ ဖှားသားကြီးကို မေးကြည့်ဘူးတယ်။ အဖမ်းမခံကြရဘူးလားလို့။ ဟုတ်တယ်လေ၊ အဲ့ဒီအချိန်က မြန်ပြည်မှာ အသံကျယ်ကျယ်နဲ့တောင် မပြောရဲကြဘူးကိုး။ အမေရိကန်နိုင်ငံက စာပေလွတ်လပ်ခွင့်ရတဲ့ ဒီမိုကရေစီနိုင်ငံလို့ စသိခဲ့ရတာပါ။ . နောက်မေးမိတာက ဘာလို့ မြေပဲတောင့်ကြီး သွားဖြီးနေတဲ့ပုံ ဆွဲကြတာလဲ။ ရှေ့သွားအကြီးကြီးတွေကတော့ သူ့မှာရှိလို့ ထားပါတော့လို့။ ဖှားသားကြီး ပြောပြတာက ကာတာက မြေပဲစိုက်ခင်းသဌေးကြီးကနေ သမတဖြစ်လာသူမလို့တဲ့။ . နောက်သိလာတာက ကာတာက ဒီမိုကရက်တစ်ပါတီကနေ သမတဖြစ်လာတာ။ သူက နိုင်ငံရေးမှာ တော်လို့မဟုတ်ဘူး၊ သူ့ရှေ့က ရီပါဘလီကဲန်သမတတွေို ဗီယက်နမ်စစ်ကြောင့် လူထုမကြိုက်တော့လို့ ဖြစ်လာတာဆိုတာကိုပါဘဲ။ . ကာတာကို ပျော့ညံ့တဲ့ သမတလို့ သတ်မှတ်ရလိမ့်မယ်။ တကယ့် ဂျဲန်းတယ်လ်မဲန်းလို့လည်း သတ်မှတ်ကြပါတယ်။ သူ့ရဲ့ အုပ်ချုပ်ပုံ ပျော့ညံံလို့ တီဟီရန်မှာရှိတဲ့ အမေရိကန်သံရုံးကို အီရန်တွေဝင်စီးတာ ခံရတယ်။ သံဝန်ထမ်းတွေကို ပြန်ပေးဆွဲထားတာ ၄၄၄ရက်ကြာသတဲ့။ ရီဂင်သမတ အရွေးခံရပြီဆိုတော့မှ တကယ်ဆော်မယ့်သူဟဆိုပြီး ပြန်လွှတ်ပေးလိုက်တာ။ နောက်မှပေါ်လာတာက သံဝန်ထမ်းတွေကို ကယ်ဖို့ တိတ်တိတ်လွှတ်လိုက်တဲ့ ရဟတ်ယာဥ်တွေထဲကနှစ်စီး သဲကန္တာရထဲ အချင်းချင်းတိုက်မိလို့ အဲဒီစစ်ဆင်ရေး ပျက်သွားတာတဲ့။ . ကာတာလက်ထက်မှာ နာမည်ကောင်းရခဲ့တာကတော့ အီဂျစ်အစ္စရေး ငြိမ်းချမ်းရေးရခဲ့တာပါဘဲ။ အမေရိကန် ဒေးဗစ်စခန်းကို အီဂျစ်သမတအာနဝါဆာဒတ်နဲ့ အစ္စရေးဝန်ချုပ်ဘီဂင်တို့ကို ခေါ်ဆွေးနွေးစေပြီး သူ့ရှေ့မှာ လက်ဆွဲနှုတ်ဆက်စေခဲ့တာကတော့ ကောင်းသောသမိုင်း ဖြစ်ခဲ့ပါတယ်။ . လူကြီးလူကောင်းသမတဆိုတော့ ကောင်းရာသုဂတိ ရောက်မှာပါ။ ကွယ်လွန်ချိန်မှာ အသက်၁၀၀ ရှိပါပြီ။

ငွေမည်းရဲ့တန်ခိုး၊

ငွေမည်းဆိုလို့ မတရားရှာထားတဲ့ငွေ မဟုတ်၊ ရွှေမည်းလို့ တင်စားခေါ်ကြတဲ့ ရေနံစိမ်းရောင်းရတဲ့ ငွေတွေကို ဆိုလိုတာပါ။ . ကမ္ဘာ့ဘောလုံးအဖွဲ့ချုပ်မှာ အုပ်စုခြောက်စု ရှိပါတယ်။ ကမ္ဘာ့ဖလား အိမ်ရှင်အဖြစ် ကျင်းပခွင့်ရဖို့ အဲဒီအုပ်စုအလိုက် အလှည့်ကျ ရွေးချယ်ရပါတယ်။ ဟိုးအရင်ကတော့ ဘောကန်တာ စိတ်အဝင်စားဆုံးဖြစ်တဲ့ တောင်အမေရိက နဲ့ ဥရောပမှာဘဲ ကျင်းပခဲ့ကြတာပါ။ ၂၀ရါစုကုန်ကာနီးချိန်ရောက်တော့ ပိုက်ဆံရမှန်းသိလို့ အခြားအဖွဲ့တွေကပါ အိမ်ရှင်ဖြစ်လိုကုန်ကြတယ်။ အလှည့်ကျ အိမ်ရှင်လုပ်ဖို့ စီစဥ်ရတော့တာပေါ့။ . ၂၀၂၂ ကမ္ဘာ့ဖလားကို အာရှအုပ်စုမှ ကာတာက နောက်ဆုံး လက်ခံကျင်းပခဲ့တယ်။ သူတို့ကတော့ ဝင်ငွေထက် ဂုဏ်သိက္ခာရချင်လို့ အိမ်ရှင်လုပ်ကြတာပါ။ ငွေကလည်းပေါတော့ သဲကန္တာရရာသီဥတုမှာ ဖြစ်အောင်လုပ်ပြသွားတာ အားလုံးမှတ်မိကြမှာပါ။ . နောက်တခေါက် အာရှကတနိုင်ငံ အိမ်ရှင်အဖြစ် ပြန်ကျင်းပခွင့်ရဖို့ ၂၄နှစ်လောက် စောင့်ရမယ့်သဘောပါ။ သို့သော် ကာတာပွဲ အောင်မြင်စွာအပြီးမှာဘဲ ဆော်ဒီအာရေဗျနိုင်ငံက နောက်မကြာခင် သူတို့အိမ်ရှင်အဖြစ်လုပ်ဖို့ ကြိုးစားမယ်လို့ ကြေညာပါတယ်။ ဆော်ဒီလိဂ်သို့ ရော်နယ်ဒိုလို နာမည်ကျော် ဘောသမားတွေဖိတ်ခေါ်ပြီး အဆင့်မြင့်ပါတယ်။ သံတမန်တွေခန့်ပြီး ဆွယ်တရားလိုက်ဟောပါတယ်။ . စဥ်းစားကြည့်ပါတယ်။ ဖြစ်နိုင်ပါ့မလားလို့။ အခုဘဲ အရှေ့အလယ်ပိုင်းအာရှနိုင်ငံက ကျင်းပပြီးစီးတာ။ ကျန်အာရှနိုင်ငံတွေကလည်း လုပ်ချင်ကြမှာဘဲလို့။ သို့သော် အခုတော့ ဖြစ်သွားပါပြီ။ အာရှနိုင်ငံရဲ့ နောက်အလှည့်ကို ဆယ့်နှစ်နှစ်အကြာမှာ ပြန်ကျင်းပခွင့် ရသွားပါပြီ။ . ကာတာအပြီး လေးနှစ်အကြာ ၂၀၂၆မှာ ငွေနဲ့ပေါက်လို့မရမယ့် မြောက်အမေရိကနိုင်ငံတွေကို ကျင်းပခွင့်ပေးတယ်။ နောက်လေးနှစ် ၂၀၃၀ အတွက် ဥရောပနဲ့အာဖရိက နှစ်ဖွဲ့ပေါင်းပြီး ပွဲကျင်းပစေတယ်။ နောက်လေးနှစ် ထပ်စောင့်နေရမစိုးလို့ ကမ္ဘာ့ဖလားနှစ်ရာပြည့် အထိမ်းအမှတ်ဆိုပြီး တောင်အမေရိက သုံးနိုင်ငံမှာ အဖွင့်ပွဲအချို့ ကန်စေလိုက်တယ်။ ကျန် အာရှ သမုဒ္ဒရာနဲ့ ဩစတေးလျအုပ်စုတွေကလည်း ဘာသံမှ မထွက်လာဘဲ အာရှအလှည့် ပြန်ရောက်ပြီဆိုပြီး ၂၀၃၄မှာ ဆော်ဒီကို ရွေးလိုက်ကြတာပါ။ . ဒီအစီအစဥ်ကို ဖီဖာက စီစဥ်တာဆိုပေမယ့် သက်ဆိုင်ရာအဖွဲ့ချုပ်တွေကလည်း တညီတညွတ်တည်း သဘောတူကြတာပါ။ အခုအထိ ဘာသံမှကို မကြိုက်သံမကြားရပါ။ ဒါ့ကြောင့် ငွေမည်းတွေရဲ့တန်ခိုး တယ်ကြီးပါလားလို့ ထင်ရတာပါဗျာ။

မြန်မာ့လိပ်ပြာတံဆိပ်ခေါင်း(၉)

လိပ်ပြာစီးရီးရဲ့ နဝမမြောက် တံဆိပ်ခေါင်း ယနေ့ထွက်ပါတယ်။ ထုံးစံအတိုင်း ၂၀၀ကျပ်တန်ပါ။ FDC လည်း ထွက်ပါတယ်။ ၄၀၀ကျပ်ပါ။ . လိပ်ပြာအမည် မြန်မာလို မရှိလို့ မပါပါ။ အင်္ဂလိပ်လို Kaiser ပါတဲ့။ သတ္တဗေဒ အမည်လည်း ပါပါတယ်။နိုင်ငံအမည် မြန်မာလို မပါပါ။ . နောက်ထပ် ထုံးစံအတိုင်း အရောင်မှိန်ပါတယ်။ ပန်းလေးတွေ လိပိပြာလေးတွေမလို့ အရောင်နုတဲ့သဘော မထင်ပါ။ ပုံနှိပ်မှု ညံ့လိုလဲလို့ ထင်ပါတယ်။

Reflection.

အင်ဂျင်နီယာပညာရေး နှစ်ရာပြည့်

မြန်မာနိုင်ငံ အင်ဂျင်နီယာပညာရေး နှစ်(၁၀၀)ပြည့် အထိမ်းအမှတ် တံဆိပ်ခေါင်း ယနေ့ထုတ်တယ်။ ၂၀၀ကျပ်တန်ပါ။ မြန်မာစာတိုက်ရဲ့ ဖေ့ဘုတ်မှာ FDC ဝယ်လိုသူတွေဆက်သွယ်ပါဆိုပြီး ဖော်ပြထားပေမယ့် တရားဝင် FDC မထုတ်ပါ။ အပြင် ကိုယ်ပိုင်ထုတ်ထားသူတဦးထံမှ အမှတ်တရစုလို၍ပါဟု ပြောဆိုပြီး တအိပ် ၁၅၀၀ကျပ် ပေးဝယ်ခဲ့ရပါသည်။ . လတ်တလောထုတ် တံဆိပ်ခေါင်းများ အရောင်စုံစီးရီးများဖြစ်နေချိန် ရိုးရှင်းသောဒီဇိုင်းကို တွေ့ရလို့ ကျေနပ်တယ်။ မူရင်းလိုဂိုကို တိုက်ရိုက်ယူသုံးထားပုံ ရပါတယ်။ မြန်မာ အင်္ဂလိပ် နှစ်ဘာသာနဲ့ နိုင်ငံအမည်၊ တန်ဖိုးတွေ ဖော်ပြထားတယ်။ . မြန်မာပြည် လွတ်လပ်ရေးရတာ နှစ်တရာမပြည့်သေးတော့ မြန်မာနဲ့ပတ်သက်လို့ ရာပြည့်တံဆိပ်ခေါင်း ထုတ်ဖို့ရှားပါတယ်။ အရင်က မြန်မာ့မီးရထားရာပြည့် တံဆိပ်ခေါင်းဘဲ တွေ့ဘူးတယ်။ အခြားရာပြည့်တွေက နိုင်ငံတကာနဲ့ ပတ်သက်တာတွေဘဲ ထုတ်ဘူးခဲ့တာပါ။ . ယခု မြန်မာ အင်ဂျင်နီယာပညာရေး ရာပြည့်တာ တက္ကသိုလ် ဘွဲ့ပေးအဆင့်ပါ။ ဒီပလိုမာအဆင့် GTI ဖြစ်လာမယ့် ကျောင်းကိုတော့ ၁၈၉၅ ကစ ဖွင့်ခဲ့တာလို့ မှတ်မိပါတယ်။ . မည်သို့ပင်ဖြစ်စေ ဘွဲ့ဒီပလိုမာအဆင့် မဟုတ်ပေမယ့် အင်ဂျင်နီယာပညာသင်ကြားပေးတဲ့ ကျောင်းဝင်းတခုထဲက အိမ်မှာ မွေးကာစမှ ၂၂နှစ်အထိ နေခဲ့ဘူးသူ၊ အင်းစိန်ကြို့ကုန်း RITမှ အင်ဂျင်နီယာဘွဲ့ရခဲ့သူ၊ အင်ဂျင်နီယာအလုပ်တခုမှာ နှစ်သုံးဆယ်ကျော် အလုပ်လုပ်ခဲ့ဘူးသူ တဦးအနေနဲ့ ဒီတံဆိပ်ခေါင်းအတွက် အလွန် နှစ်ထောင်းအားရ ဖြစ်ရပါကြောင်း။

မြန်မာ့လိပ်ပြာတံဆိပ်ခေါင်း (၈)

မြန်မာ့လိပ်ပြာ မျိုးစိတ်များ တံဆိပ်ခေါင်းစီးရီးရဲ့ အဌမမြောက်ခေါင်း ထွက်တယ်။ စီးရီးရဲ့ အရင်ခေါင်းတွေလိုဘဲ မြန်မာနိုင်ငံအမည် မြန်မာလို မထည့်။ လိပ်ပြာအမည်ကတော့ မြန်မာအမည် မရှိလို့ဖြစ်မယ်။ အင်္ဂလိပ်လို white dragon တဲ့။ ထုံးစံအတိုင်း အရောင်မှိန်ပါတယ်။ . တံဆိပ်ခေါင်း တန်ဖိုးက ၂၀၀ကျပ်ပါ။ FDCလည်း ထွက်တယ်။ ၄၀၀ကျပ်။ တံဆိပ်ခေါင်းအကြောင်း လပ်ပြာပုံနဲ့ကဒ်လည်း ဒီနေ့ ဝယ်လို့ရခဲ့တယ်။ ၄၀၀ ကျပ်ပါဘဲ။ အဲဒီကဒ်တွေက အားလုံးလှတယ်။ . ဒီလိပ်ပြာစီးရီးကို တလတခေါင်း ထွက်နေပေမယ့် ပြီးခဲ့တဲ့ အောက်တိုဘာလမှာ မထွက်ခဲ့ပါ။ အထိမ်းအမှတ်ထုတ် မဟုတ်လို့ ကြိုက်တဲ့နေ့ ထုတ်လို့ရတဲ့အတွက် အကြံတခု ကြုံတုံးပေးချင်ပါတယ်။ တံဆိပ်ခေါင်း အသစ်ကို တနင်္လါနေ့မှာ တတ်နိုင်ရင် မထုတ်စေချင်ပါ။ တနင်္လါနေ့ဆို ပုံမှန်သွားသူ ရုံးကိစ္စသွားရသူတွေ ပိုများတတ်တော့ ကားပိတ်လွန်းလို့ပါ။ ကျန်ရက်များဆို ပိုအဆင်ပြေလို့ပါ။

HOME 2024

UPU နှစ်၁၅၀ပြည့် တံဆိပ်ခေါင်း၊

UPU ကမ္ဘာ့စာပို့တိုက် နှစ်၁၅၀ပြည့် အထိမ်းအမှတ် တံဆိပ်ခေါင်း ထုတ်ပါတယ်။ ၂၀၀ကျပ်တန်ပါ။ တံဆိပ်ခေါင်းပေါ်မှာ မြန်မာစာ တလုံးမှ မပါပါ။ မြန်မာအလံ နဲ့ အင်္ဂလိပ်လို MYANMAR လို့ဘဲ ပါပါတယ်။ ကျွန်တော်ကတော့ ကြိုက်ပါတယ်။ FDCလည်း ထွက်ပါတယ်။ ၄၀၀ကျပ်ပါ။ . တံဆိပ်ခေါင်း ဒီဇိုင်းက ထူးဆန်းပါတယ်။ အရင်ထုတ်နေကျ ပိုစတာခေါင်းတွေနဲ့ တခြားစီပါ။ သဘောကျလို့ FDCမှာ ပါလေ့ရှိတဲ့ ဒီဇိုင်နာကြည့်လိုက်တော့ UPU (Universal Postal Union) ပါတဲ့။ အင်တာနက် ခေါက်ကြည့်လိုက်တော့ ပြာနီခရမ်းတွေနဲ့ နှစ်၁၅၀ပြည့် ဒီဇိုင်းတွေ တွေ့ရပါတယ်။ . လွန်ခဲ့တဲ့ နှစ်ငါးဆယ်ခန့်က တံဆိပ်ခေါင်း စစုတော့ မြန်မာထုတ်အဟောင်းတွေ ရနိုင်သလောက်ပြန်လိုက်တာပေါ့။ အဲ့တုံးက ငယ်သေးတော့ စာတိုက်ကြီးမသွားနိုင်ဘဲ သူများစာအိပ်မှာ တွေ့မှ တောင်းစုရတာကိုး။ အဲဒီအထဲက ပုံဆန်းဆန်း အရောင်ဆန်းဆန်း တံဆိပ်ခေါင်းလေးတလုံးရတော့ သဘောကျလိုက်တာ။ UPU နှစ်တရာပြည့်ထဲက ငါးမူးတန် တံဆိပ်ခေါင်းပါ။ ကမ္ဘာကြီးကိုပတ်ပြီး စာအိပ်လက်ဆင့်ကမ်းနေကြတဲ့ပုံနဲ့။ FDC ပုံပေါ်မှာ အမှတ်တရ ထည့်လိုက်ပါတယ်။ . UPU က စာပို့တိုက်နဲ့ တိုက်ရိုက်ပတ်သက်တဲ့ အဖွဲ့ဆိုတော့ မြန်မာနိုင်ငံကလည်း အကြိမ်ကြိမ် အထိမ်းအမှတ်ခေါင်းတွေ ထုတ်ခဲ့ပါတယ်။ စိန်ရတု (၁၉၄၉)၊ ရာပြည့် (၁၉၇၄)၊ ၁၂၅နှစ်ပြည့် (၁၉၉၉) ၊ ၁၄၅နှစ်ပြည့် (၂၀၁၉) နဲ့ အခု နှစ်၁၅၀ပြည့်ပါ။ လွတ်လပ်ရေးနေ့ အထိမ်းအမှတ်ထုတ်ပြီးရင် ခေါင်းစဥ်တခုအောက်မှာ ဒုတိယအကြိမ် အများဆုံးထုတ်လို့ ထင်ပါတယ်။

မြန်မာ့လိပ်ပြာတံဆိပ်ခေါင်း (၇)

မြန်မာ့လိပ်ပြာမျိုးစိတ်များ တံဆိပ်ခေါင်း သတ္တမမြောက်ထွက်တယ်။ Blue Pancy လိပ်ပြာ အမျိုးအစားနဲ့ပါ။ လိပ်ပြာအမည် မြန်မာလို မရှိ။ လိပ်ပြာလေးက လှပါတယ်။ တံဆိပ်ခေါင်းပေါ်ရောက်မှ မှိန်သွားရှာတာပါ။ . တံဆိပ် ခေါင်းတန်ဖိုး ၂၀၀ကျပ်ပါ။ FDC လည်း ထုတ်ပါတယ်။ ၄၀၀ကျပ်ပါ။ ဒီတခေါက် ဒေတာကဒ် ဝယ်လို့ ရခဲ့တယ်။ ၄၀၀ကျပ်ပါ။ ဒေတာကဒ် ဒီဇိုင်းက တစီးရီးစ်လုံးလှတယ်။ . အရင် ခေါင်းတွေလိုပါဘဲ။ ဒီဇိုင်းလှတယ်။ ပုံနှိပ်မှုကြောင့် FDC ပေါ်က လိပ်ပြာလောက် အရောင်မထွက်။ နိုင်ငံအမည် မြန်မာလို မပါပါ။

Google map စိတ်ညစ်တယ်၊

ဒီတပတ်ထဲ Google ရဲ့ AI ခေါင်းရှုပ်နေတယ်။ "What the hell country" မှာ အထူးအဆန်း တွေ့နေတယ်။ ယာဥ်ပေါင်းစုံ လမ်းပေါ် မမောင်းဘဲ လမ်းလျောက်တာထက် ​နှေးတဲ့နှုန်းနဲ့ တန်းစီပတ်နေတာ တွေ့ရတယ်။ တပြည်လုံး နေရာ အနှံ့အပြားမှာဘဲ။ . ဂူဂယ်လ်မက်ပ်မှာ သူပေးထားတဲ့ ခရီးသွားပုံစံတွေနဲ့ တခုမှ အကျုံးမဝင်ဘူးတဲ့။ အရွေ့ပုံစံသစ် သတ်မှတ်ပေးဖို့ ဒီတိုင်းပြည်ထဲသွား မေးကြည့်ရအုံးမယ်တဲ့။ . ကမ္ဘာ့သီအိုရီတွေ ဒီတိုင်းပြည်ထဲရောက်ရင် အသုံးမတည့်တာများတယ်။ ဘယ်လို တိုင်းပြည်လည်း မသိ။

၂၀၂၄အာဆီယံ တံဆိပ်ခေါင်း၊

၁၉၆၇ ဩဂုတ်လ ၈ရက်နေ့မှာ စထောင်ခဲ့တဲ့ အာဆီယံအဖွဲ့ အထိမ်းအမှတ် တံဆိပ်ခေါင်း ထုတ်တယ်။ ခေါင်းစဥ်က ဗဟိုစာတိုက်ကြီးပုံနဲ့ ဖြစ်မယ်။ အခြားနိုင်ငံတွေလည်း ထုတ်တာတွေ့တယ်။ ၂၀၀ကျပ်တန်ပါ။ FDCလည်း ထုတ်တယ်။ ၄၀၀ကျပ်ပါ။ . တံဆိပ်ခေါင်းပေါ်မှာ မူရင်းဓာတ်ပုံက ''ဗဟိုစာတိုက်ကြီး'' ဆိုတဲ့ စာသားကလွဲလို့ မြန်မာလို မပါပါ။ လောလောဆယ် ရှာကြည့်တာ ဗီယက်နမ်နဲ့ ထိုင်းမှာ သူတို့ဘာသာနဲ့ နိုင်ငံနာမည် ပါတာတွေ့တယ်။ နောက်ပိုင်း မြန်မာတံဆိပ်ခေါင်းတွေမှာ နိုင်ငံအမည် မြန်မာလိုမပါတာ သတိထားမိတယ်။ . စာတိုက်ကြီးဆိုတာနဲ့ ရှေ့တည့်တည့်က ပုံကြီးသုံးတာ အနုပညာမဆန်လို့ ထင်မိတယ်။ နဂိုရ်အဆောက်အဦးကလည်း ပုံမလာတဲ့အထဲ။ ဗီယက်နမ်ရော ထိုင်းပါ ပန်းချီနဲ့ ရောသုံးတယ်။ စင်ကာပူက စာတိုက်အတွင်းပုံပါ ခေတ်ဆန်ဆန် တွဲသုံးတာ တွေ့ရတယ်။ အာဆီယံ ၁၁နိုင်ငံက တံဆိပ်ခေါင်းတွေ ယှဥ်ပြထားရင် အရိုးဆုံးတံဆိပ်ခေါင်း ဖြစ်နေမှာဘဲ။ . ကြုံလို့ စဥ်းစားကြည့်တာပါ။ စာတိုက်ပုံနဲ့ တံဆိပ်ခေါင်းထုတ်ရင်ပေါ့။ ဟိုးအင်္ဂလိပ်ခေတ် မီးလောင်သွားတဲ့ ပထမစာတိုက်ကြီးပုံနဲ့ ထုတ်နိုင်တာဘဲ။ အခုခေတ် ရှိသေးတာဆို ပုဇွန်တောင်စာတိုက်တို့၊ ကြည့်မြင်တိုင် စာတိုက်တို့ပုံတွေ ပန်းချီနဲ့ရောပြီး သုံးရင်လှမှာပါ။

မြန်မာ့လိပ်ပြာတံဆိပ်ခေါင်း(၆)

မြန်မာ့ လိပ်ပြာမျိုးစိတ်များ တံဆိပ်ခေါင်းစီးရီးအတွက် ဆဌမမြောက်ခေါင်း ယနေ့ထွက်တယ်။ . တံဆိပ်ခေါင်း ၂၀၀ကျပ်ပါ။ FDC လည်း ပုံမှန်ထွက်တယ်။ ၄၀၀ကျပ်ပါ။ ဒေတာကဒ် ဒီတခေါက် ကုန်ပါပြီတဲ့။ . လိပ်ပြာအမည်က Peacock Pansy ပါ။ မြန်မာအမည် မရှိပါ။ ဒီစီးရီးရဲ့ ထုံးစံအတိုင်း နိုင်ငံအမည် မြန်မာဘာသာဖြင့် မပါပါ။ . ထုံးစံအတိုင်း အရောင်မှိန်ပါတယ်။ ပို့စ်မှာ အမြင်လှအောင် အရောင်တောက်ထားပါတယ်။

ဉာဏ်ထပ်တာလား၊

တနေ့က သတင်းတခုကြားတော့ လွန်ခဲ့တဲ့ နှစ်သုံးဆယ်က ကြားဘူးတာတခု သတိရတယ်။ . ၉၀ ပတ်ဝန်းကျင်လောက် ဖြစ်မှာပေါ့၊ နဝတက ကြေညာချက်တခုထုတ်တယ်။ ငွေမဲတွေရဲ့ ၂၅% အခွန်ဆောင်ရင် တရာဖိုး ငွေဖြူအဖြစ် သတ်မှတ်ပေးမယ်တဲ့။ . အသိတယောက် ပြောပြတာ။ သူသိတဲ့ တုပ်တန်းက တုပ်ကြီးတယောက်က ရှိတဲ့ငွေ တော်တော်များများ သွားအခွန်ဆောင်တာတဲ့။ သဘောက တရာရှိရင် ၂၅ဘဲ ဆောင်ရမှာကို ၁၀၀ သွားဆောင်ပစ်တာ။ သဘောက သူ့မှာ ငွေ၄၀၀ ရှိသလိုလို။ နားမလည်လို့မေးတော့ ပြန်ရှာရင် မကြာခင် ရမှာဘဲတဲ့။ နောက်တခေါက် ဒီအခွင့်အရေးမျိုး ရမှာမဟုတ်ဘူးတဲ့။ . ကြားလိုက်တဲ့ခဏ စဥ်းစားမိတာက တုပ်ကြီးရဲ့ အကွက်မြင်မှုနဲ့ ကွကိုယ် ယုံကြည်မှု။ . တနေ့က ကြားလိုက်တဲ့သတင်းက မနက်၄နာရီ ကြေညာတာတဲ့။ ကကတွေက လရကို သိမ်းလိုက်ပြီတဲ့။ သတင်းသိတော့ နေ့ခင်းရောက်ပါပြီ။ တကယ်က အဲဒီအချိန်ထိ နေရာတချို့ဘဲ သိမ်းရသေး။ ဒီတော့ မနက်အစောကဆို ၂၅% တောင် မထင်။ သို့သော်လည်း စိနတုပ်ကြီးက ရပ်ခိုင်းခဲ့ရင် ၁၀၀% သိမ်းပြီးသားပုံဖြစ်အောင် ကြိုကြေညာတာထင်တယ်။ . အကွက်မြင်မှုနဲ့ ကွကိုယ် ယုံကြည်လို့ဖြစ်မှာပေါ့။ ဒီတုပ်ကြီးနှစ်ယောက်ရဲ့လုပ်ကွက် ဆိုင်မလားလို့စ်။

The Adventurers.

ရုပ်ရှင်အဖြစ် အရင်ကြည့်ဘူးခဲ့သည်။ ၇၆-၇၇ လောက်က ဖြစ်မယ်။ ရုပ်ရှင်အဖွင့်မှာ အကြမ်းဖက် စစ်သားများက ကျေးလက်အိမ်ကြီးတအိမ်ရှိ အမျိုးသမီးများကို အကြမ်းဖက် သတ်ဖြတ်ပုံ၊ ဇတ်လိုက်ကောင်လေးက ပုန်းမြင်နေရ၊ ဗိုလ်ချုပ်ကြီးနဲ့ တပ်ဖွဲ့ရောက်လာပြီး သူ့စစ်သားတွေကိုဖမ်း၊ ဇတ်လိုက်အဖေ(ဗိုလ်ချုပ်ကြီးရဲ့ အသုံးချခံ ပညာရှင်) တားနေသည့်ကြားမှ ဗိုလ်ချုပ်ကြီးက သေနတ်ကိုကိုင်ပေးပြီး ဇတ်လိုက်ချာတိတ်ကို စစ်သားများအား ပစ်သတ်ဖို့ သေနတ်မောင်းဆွဲခိုင်းပုံ၊ for your mother, for your sisters ဆိုပြီး ရွတ်ပေးတာတွေကို မှတ်မိနေတယ်။ . နောက်ပိုင်း ဗိုလ်ချုပ်ကြီးက အာဏာရလာပြီး အာဏာရှင်ဖြစ်လာတယ်။ တောထဲက တော်လှန်နေသူတွေကို ဇတ်လိုက်အဖေကို စည်းရုံးခိုင်းပြီး လက်နက်ချ လွတ်ငြိမ်းခွင့်ပေးတယ်။ အဲ့ဒီည လွတ်ငြိမ်းခွင့် ညစာစားပွဲတော်လုပ်နေတုံး ဗိုလ်ချုပ်ကြီးရဲ့ စစ်သားတွေရောက်လာပြီး လက်နက်ချသူတွေကို သတ်ပစ်လိုက်တယ်။ တော်လှန်သူဘက်က ခေါင်းဆောင်ရဲ့ သားငယ်လေး လွတ်သွားတယ်။ နောက်ပိုင်းအဆုံးသတ်မှာ ခေါင်းဆောင်ဖြစ်လာတဲ့ ဇတ်လိုက်ကို အဲ့ကောင်လေးက ချောင်းပစ်သတ်လိုက်တယ်။ လွှတ်တော်ရင်ပြင်ကြီးထဲမှာ စိုက်ထူပေးထားတဲ့ ဇတ်လိုက်ရဲ့အဖေ ရုပ်တုကြီးရှေ့မှာ။ လွတ်သွားတဲ့ကောင်လေးက သူ့အဖေအသတ်ခံရတာ တောထဲလာစည်းရုံးတဲ့ ဇတ်လိုက်အဖေကြောင့်လို့ဘဲ စွဲမှတ်သွားတာကိုး။ နောက်ကွယ်က စီမံသူ ဗိုလ်ချုပ်ကြီးအာဏာရှင်လို့ မထင်တော့ဘူးလေ။ . ရုပ်ရှင်က ရုပ်ရှင်ကြိုက်သူတွေအတွက် ရိုက်ထားတော့ ကြည့်ကောင်းတယ်။ တော်လှန်ရေးဗိုလ်ချုပ်ကြီးက အာဏာရလာတော့ အာဏာရှင်ဖြစ်သွားတယ်။ တိုင်းပြည်ဘဏ္ဍာ ဘုံးတယ်။ လွှတ်တော်အသစ်ကြီး ဆောက်တယ်။ မာစီးဒီး တံခါးခြောက်ပေါက်ကြီး စီးတယ်။ အဲ့ဒီအခန်းတွေ ပြခွင့်ပေးလို့ ဆင်ဆာအဖွဲ့ပြုတ်တယ်လို့တောင် ပြောကြတာဘဲ။ . ၇၉-၈၀ လောက်မှာ ဘာသာပြန် ''အုတ်ကြားမြက်'' ကို ဖတ်ဖူးတာ။ (ခုစာအုပ်က တတိယ အကြိမ်ထုတ်) ကြိုက်သွားပြီး မူရင်းရေးသူ ဟာရိုးရော်ဘင်ကို ရှာဖတ်တဲ့အထိဘဲ။ ဘာသာပြန်ကိုလည်း အဲ့အချိန်က ခေတ်စားတဲ့ ဗြုကား လျူဂါသေနတ်ကိုင် စုံထောက်ဝတ္ထုတွေကို ကျော်လွန်ပြီးဖတ်ဖြစ်တာ။ ယနေ့အထိပါဘဲ။စာဖတ်တာ ပိုနှစ်သက်သူမလို့ ဘာသာပြန်ဝတ္ထုကို ပိုကြိုက်တယ်။ ရုပ်ရှင်က လူအများစုကို ဖှီလင်ပိုပေးနိုင်လိမ့်မယ်။ စာက ဖှီလင်ပေးနိုင်သလို မက်ဆေ့ချ်လည်း ပေးနိုင်တယ်၊ နောလိပ်ချ်လည်း ပိုပေးနိုင်တာပေါ့။ စာဖတ်သန်သူအတွက်ပေါ့လေ။ . ရုပ်ရှင်မှာ အဲ့တုံးက ဇတ်ကြောသာသိတာ၊ စကားပြောတွေနားမလည်တော့ ဝတ္ထုကျမှ ပိုသိတာလည်း ပါတာပေါ့ရုပ်ရှင်တုံးက ဗိုလ်ချုပ်ကြီး (ဝတ္ထုမှာ ခေါင်းဆောင်ကြီး)ရဲ့ သမီးကို သတိမထားမိခဲ့ဘူး။ ခေါင်းဆောင်ကြီး နောက်ဆုံး ဘယ်လိုဇတ်သိမ်းသွားလည်း မမှတ်မိခဲ့ဘူး။ ဝတ္ထုမှာတော့ အသေးစိတ်ဘဲ။ ကြားထဲက စီးပွားရေး နိုင်ငံရေး ကိစ္စတွေလည်း သိခွင့်ရတာပေါ့။ ဇတ်လိုက်လှုပ်ရှားခဲ့တဲ့ ပြင်သစ် အမေရိကန်က အဖြစ်တွေ လူတွေအကြောင်းလည်း ပိုသိရတယ်။ . ပထမအကြိမ် ဖတ်ဖြစ်ကတည်းက မှတ်မိနေတဲ့ အဓိက အကြောင်းတခု ရှိသေးတယ်။ ဇတ်လိုက်ကြီးလာပြီး သံတမန်ဖြစ်လာတော့ အာဏာရှင်ခေါင်းဆောင်ကြီးက သူ့ကို ပြန်တော်လှန်နေတဲ့ သူပုန်တွေကို ဘယ်သူလက်နက်ရောင်းနေတာလည်း စုံစမ်းခိုင်းတယ်။ စုံစမ်းတွေ့တာက လက်နက်ရောင်းပေးတဲ့အဖွဲ့မှာ ခေါင်းဆောင်ကြီးရဲ့လူတွေပတ်သက်ပြီး ခေါင်းဆောင်ကြီး ပိုက်ဆံရနေတာကိုပါ။ ကိုယ့်တပ်သားတွေကို ပစ်သတ်မယ့်သေနတ်ကို ခေါင်းဆောင်ကြီးကဘဲ နိုင်ငံကို တင်သွင်းနေတာတဲ့။ နိုင်ငံအမည်လည်း မှတ်ထားပြီး မြေပုံမှာ မတွေ့မှ စိတ်ကူးထဲကတိုင်းပြည်မှန်း သိရတာ။ နိုင်ငံအမည်က ကော်တီဂွေးတဲ့။ တောင်အမေရိမှာ ရှိသလိုလို။ ဖတ်ဖူးတဲ့အထဲ တော်တော်ကိုကောင်းတဲ့ ဘာသာပြန်တအုပ်ပါဘဲဗျာ။

မြန်မာ့လိပ်ပြာတံဆိပ်ခေါင်း(၅)

 

မြန်မာ့လိပ်ပြာတံဆိပ်ခေါင်းစီးရီး ပဥ္စမခေါင်းထွက်တယ်။ လိပ်ပြာအမည် မြန်မာလို ရှိဟန်မတူ။ အင်္ဂလိပ်လို Common Rose ပါ။

.

ထွက်မယ့်အကြောင်း တရက်ဘဲစောပြီး ကြေညာလို့လား မသိပါ။ လူရှင်းတယ်။ နောက်ကျရောက်သွားတာတောင် FDCသာမက တံဆိပ်ခေါင်းကဒ်ပါ ဝယ်လို့ရခဲ့တယ်။ အရင်လေးကြိမ်က စမရောင်းခင်ကပင် ကုန်နေတတ်တဲ့ကဒ်ပါ။ 

.

ကြေညာကတည်းက မှိန်နေသလို ထင်မိတယ်။ တံဆိပ်ခေါင်း မြင်လိုက်တော့ သေချာသွားတယ်။ ယှဥ်ကြည့်နိုင်အောင် ပုံမှာထည့်ပေးလိုက်တယ်။ ဒီဇိုင်းကောင်းသလောက် ပုံနှိပ်ညံ့မှုက နှမြောစရာ။

.

ထုံးစံအတိုင်း တံဆိပ်ခေါင်းတန်ဖိုး ၂၀၀ကျပ်ပါ။ FDC က ၄၀၀ကျပ်။ တံဆိပ်ခေါင်းအကြောင်း ဖော်ပြထားတဲ့ကဒ်ကလည်း ၄၀၀ကျပ်။ ကဒ်ပြင်ဆင်ထားပုံ၊ ပုံနှိပ်ထားပုံက ဖတ်စကလပ်ပါ။ 

အလွယ်ဆုံး VPN ၊

 

မနေ့ နေ့ခင်းကစလို့ အချို့ဖွဘုတ်သုံးသူတွေ သုံးလို့မရတော့ပါ။ အကြောင်းက ဗီပီအဲန် တွေ မပွင့်တော့လို့ပါ။ အချင်းချင်း မေးကြ၊ စုံစမ်းကြနဲ့ ရှုတ်ရှက်ခတ်ကုန်ပါတယ်။

.

ညပိုင်းကျတော့ အသိတိုးလာကြပါပြီ။ ပွင့်တဲ့သူတွေရှိပြီး သုံးလို့ရနေတုံးတဲ့။ ကိုယ်ယူတဲ့ အင်တာနက်ကုမ္ပဏီအပေါ် မူတည်သလို သုံးတဲ့ ဗီပီအဲန်အပေါ်လည်း မူတည်ပါသတဲ့။

.

ဒါဖြင့် ကိုယ်သုံးလို့ရဖို့ ဘာလိုသလည်း ဆက်စူးစမ်းကြည့်တော့ စကားလုံးတွေ ရှုတ်ထွေးစွာ ကြားရပါတော့တယ်။ အိုင်ပီနံပတ်တွေ၊ တာနယ်တဲ့၊ ဒီအဲန်အက်စ်တဲ့၊ ဆာဗာတဲ့၊ စသဖြင့် နည်းပညာစာလုံးတွေ ကြားရသလို ပြောင်းသုံးရမယ် နံပတ်တွေလည်း မျိုးစုံကြားရတယ်။ အတော်မှတ်မိဖို့ ခက်တဲ့ စာလုံးတွေပါ။ မျိုးစုံများစွာသော ဗီပီအဲန်နာမည်တွေလည်း ကြားရပါတော့တယ်။ 

.

အလွယ်ဆုံးနည်းကတော့ ဂူဂယ်ပလေးကို ဖွင့်ပါ။ ဆာ့ချ်မှာ free vpn လို့ ရိုက်ပြီးရှာကြည့်ပါ။ အများကြီး ထွက်လာပါမယ်။ တခုချင်းသာ ဒေါင်းပြီးသုံးကြည့်ပေတော့။ တခုမဟုတ် တခုနဲ့ အဆင်ပြေသွားလိမ့်မယ်။ ကိုယ်က နည်းပညာစကားလုံးတွေ မကျွမ်းကျင်တဲ့အပြင် ဝယ်ထားတဲ့ ဝိုင်ဖှိုင်ကုမ္ပဏီက ချက်ချင်းပြောင်းဖို့ မလွယ်ဘူးဆိုတော့လေ။ 

ဘတ်စ်ကားမှတ်တိုင် အမည်များ၊

 

လွန်ခဲ့တဲ့ ငါးနှစ်ခြောက်နှစ်လောက်ကစ ရန်ကုန်မှာ ဘတ်စ်ကားမှတ်တိုင်တွေ သတ်သတ်ရပ်ရပ် ပြန်ဆောက်ပေးခဲ့တယ်။ အချို့ဆို ပြည်ပကုမ္ပဏီ ကြော်ညာစပွန်ဆာနဲ့။ ထိုင်စရာခုံ အမိုးအကာအပြင် ဖုန်းချာဂျာလေးတွေပါ တပ်ပေးထားရဲ့။ သန့်ရှင်းရေးလည်း လုပ်ပေးတာ တွေ့မိပါတယ်။

.

အဲ့လို မှတ်တိုင်တွေမှာ မှတ်တိုင်နာမည်ကို အင်္ဂလိပ် မြန်မာ နှစ်ဘာသာနဲ့ ရေးပေးထားတတ်တယ်။ မှတ်တိုင်မှာ ရပ်တဲ့ လိုင်းကားနံပတ်တွေလည်း ရေးပေးထားတယ်။ အပ်ဒိတ်မလုပ်တာကတော့ တကိစ္စပေါ့လေ။ လုပ်ပေးထားပုံက စံနစ်တကျပါ။

.

စံနစ်မကျတာတခုက မှတ်တိုင်အမည်တွေကို အင်္ဂလိပ်လို ပေးထားပုံတွေပါ။ ရန်ကင်း ဆယ့်နှစ်လုံးတန်းမှာ ''12 Lone Tan'' တဲ့။ ပြည်လမ်း ''ခြောက်မိုင်ခွဲမှတ်တိုင်''ကျ ''Chauk Khwel'' ပါတဲ့။ အခြားမှတ်တိုင်တွေလည်း ရှိပါသေးတယ်။ အင်္ဂလိပ်လို အမည်ပေးပုံံတွေက အသံထွက်အတိုင်း ပေးတဲ့နေရာပေး၊ ဘာသာပြန်ပြီး အမည်ပေးလိုပေးနဲ့။

.

စံနစ် သတ်မှတ်ရပါမယ်။ အင်္ဂလိပ်လို ပေးတယ်ဆိုတာ နိုင်ငံခြားသားတွေ သိအောင်လို့ပါ။ သို့သော် ဌာနေမြန်မာတွေလည်း နားလည်ဖို့ လိုပါလိမ့်မယ်။ အမေရိကန်ကြီး ဘတ်စ်စီးလာပြီး ''တွဲလုံးတန်း'' မှတ်တိုင်ဆင်းချင်တယ်ဆို နားလည်ဖို့ မလွယ်ပါ။ မြောက်ဥက္ကလာအဝင် ''နှစ်ဈေးမှတ်တိုင်''ကျ ''2 market bus stop'' ပါတဲ့။ နိုင်ငံခြားသား မပြောနဲ့။ အင်္ဂလိပ်လိုတတ်တဲ့ ရန်ကုန်သားတောင် ရွာလည်သွားမှာပါ။

.

အမှန်က အမည်ကို ဘာသာမပြန်ဘဲ အနီးစပ်ဆုံးအသံထွက်ကို အင်္ဂလိပ်လို ရေးရမှာပါ။ မြန်မာအသံထွက်ကို အတိအကျမရနိုင်ပေမယ့် အနီးစပ်ဆုံးတူရင် ခန့်မှန်းနိုင်မှာပါ။ ဒါတောင် ''၈မိုင်မှတ်တိုင်''ဆို ''Shit mine'' လို့ ဘာသာပြန်ရင်လည်း ပြဿနာ။ အမည်ပေးကိစ္စ ကျွမ်းကျင်သူများနဲ့ တိုင်ပင်ပြီး ပြုပြင်ပေးမှသာ ခေတ်ပုံမှန်ဖြစ်လို့ နိုင်ငံခြားသားဧည့်သည်တွေလာရင် အဆင်ပြေလိမ့်မယ်လို့ ထင်မိပါကြောင်း။ 

ဘေယာလီဗာကူဆန်ရဲ့စံချိန်၊

 

လီဗာကူဆန်က လွန်နေပြီ။ တော်တာလည်း လက်ခံပါတယ်။ ကြိုးစားကြတာလည်း အသိအမှတ်ပြုပါတယ်။ ဒါပေမယ့် ဗမာအတွေးနဲ့ ပြောရရင် ကန်သာမက ကံကလည်း လိုက်လွန်းပါတယ်ဗျာ။
.
မနေ့က UEFA ဆီမီးမှာ ၈၂မိနစ်အထိ နှစ်ဂိုးပြတ် ရှုံးနေတယ်။ အဲ့ဒီမှာ တဖက်အသင်းက ကိုယ့်ဂိုးကိုယ်သွင်းပေးလို့ ချေပဂိုးပြန်ရတယ်။ အချိန်ပို ၉၇မိနစ်မှ ဒုတိယချေပဂိုး သွင်းပြီး သရေရသွားတယ်။
.
ဥရောပ ရှုံးပွဲမရှိ စံချိန် ဘဲန်ဖှီကာရဲ့ ၄၈ပွဲကို ချိုးနိုင်သွားပြီ။ အချိန်ပိုကျမှ ချေနိုင်လို့ ရှုံးပွဲမရှိတာ လေးငါးပွဲ မကတော့ဘူး ထင်တယ်။ သရေကျရင်၊ တဂိုးရှုံးနေရင်၊ တက်မယ့်ပွဲတွေမှာလည်း ကြိုးစားကြလို့ နောက်ဆုံးမိနစ်ဂိုးတွေ သွင်းပြီး ဒီစံချိန်ရတာပါ။
.
ဒီတရာသီ လိဂ်ရှုံးပွဲမရှိစံချိန် (EPLက Rကြီး စံချိန်မျိုး) ရဖို့ လိဂ်နှစ်ပွဲကန်ရဦးမယ်။ ဂျာမန်ကပ် ဖိုင်နယ်တပွဲရယ်၊ UEFA ဖိုင်နယ်တပွဲရယ် ကန်လို့ အားလုံးနိုင်ရင်တော့ အတော့်ကို ကန်ကောင်းတဲ့အသင်းလို့ ကမ္ဘာက အသိအမှတ်ပြုရပါတော့မယ်။ 

မြန်မာ့လိပ်ပြာတံဆိပ်ခေါင်း (၄)၊

မြန်မာ့ လိပ်ပြာမျိုးစိတ်များ တံဆိပ်ခေါင်းစီးရီးအတွက် စတုတ္ထခေါင်း ထွက်ပါတယ်။ ထုံးစံအတိုင်း လိပ်ပြာ မြန်မာအမည် မရှိပါ။ အင်္ဂလိပ်လို Painted Jezebel ပါ။ 

.

တံဆိပ်ခေါင်း တန်ဘိုး ၂၀၀ကျပ်၊ FDC လည်းထွက်တယ်။ ၄၀၀ ကျပ်။ စီးရီးစ်ထုံးစံအတိုင်း နိုင်ငံအမည် မြန်မာလို မပါပါ။ ဒီဇိုင်းရောအရောင်ရော လှသော်လည်း ပုံနှိပ်မှုညံ့လို့ အရောင်မှိန်ပါတယ်။

.

တံဆိပ်ခေါင်းမှတ်တမ်းကဒ် brochure ထွက်တယ်ပြောသော်လည်း အရောင်းကောင်တာမှာ တခုမှ မရောင်းပါ။ မြင်ကိုမမြင်လိုက်ရတာပါ။ မန်နေဂျာအခန်းမှာ ကွန်ပလိန့်သွားလုပ်နေသံကြားရတာ နှစ်ကြိမ်ရှိပြီ။ အနည်းဆုံး ကဒ်၁၀၀ လောက် ပိုရိုက်သင့်ပါပြီ။ ယိုသူမရှက်သော်လည်း မြင်သူတွေ ရှက်လာပါပြီ။ 

စာပို့လုပ်ငန်း(postal service)

 

ဒါ စာတိုက်ပုံး mail box လို့ခေါ်တယ်။ ဟိုးအရင်က လူတွေ အဝေးမှာရှိတဲ့သူစီ ဆက်သွယ်ချင်ရင် စာပို့လုပ်ငန်း postal service ကို သုံးကြတယ်ကွဲ့။ အင်တာနက်နဲ့ အီးမေးလ်တွေ မပေါ်ခင်ကပေါ့။

.

မိမိပြောချင်တဲ့ အကြောင်းအရာကို စာရွက် writing pads ပေါ် ကလောင် pen နဲ့ ချရေးရတယ်။ ပြီးရင် စာရွက်ကို စာအိပ် envelope ထဲ ခေါက်ထည့်။ မိမိပို့ချင်တဲ့သူရဲ့ အမည်နဲ့ လိပ်စာ mail address ကို စာအိပ်ပေါ်မှာ ရေး။ သတ်မှတ်ထားတဲ့ အခတန်ဖိုးရှိ တံဆိပ်ခေါင်း postage stamp ကပ်ပြီး ဒီလိုမျိုး စာတိုက်ပုံးထဲ သွားထည့်ရတယ်ကွဲ့။

.

အဲဒီပုံးထဲက စာအိပ်တွေကို စာတိုက် post office က အချိန်မှန် လိုက်သိမ်းတယ်။ စာအိပ်ပေါ်မှာ ရေးထားတဲ့ လိပ်စာပါတဲ့စီကို ကား ရထား လေပျံတွေနဲ့ ပို့တယ်။ လိပ်စာပေါ်ပါတဲ့ မြို့စာတိုက်က သက်ဆိုင်ရာအိမ်အထိ စာပို့လုလင် post man နဲ့ ပို့ပေးတယ်ကွဲ့။

.

အဲဒီလို ပို့ပေးခကို စာတစောင်ချင်း ကောက်နေရင် အလုပ်ရှုပ်မှာမလို့ စာပို့ခကို တံဆိပ်ခေါင်းဝယ်ပြီး ကပ်ခိုင်းလိုက်တာဘဲ။ ဒါကြောင့် တံဆိပ်ခေါင်းတွေပေါ်မှာ သတ်မှတ်တန်ဖိုးရိုက်ထားတယ်။ အင်္ဂလိပ်တွေ လွန်ခဲ့တဲ့ ၁၈၄၀ခု မေလ ၁ ရက်နေ့မှာ စသုံးခဲ့တာတဲ့။ 

.

မြန်မာပြည်မှာ ၁၉၉၀ခန့်အထိ ပြည်တွင်းစာပို့ခက ၁၅ပြားဘဲ။ ပို့စကဒ်ဆို ၁၀ပြား။ နောက်တော့ ၅၀ပြား။ နောက်ဆုံးသိလိုက်တာ ၅၀ကျပ်ဖြစ်နေပြီ။ အခုတော့ ဘယ်လောက်ဖြစ်နေလည်း မသိတော့ပါ။ စာပို့လုပ်ငန်းလည်း ရပ်နေပြီတဲ့။

မြန်မာ့လိပ်ပြာတံဆိပ်ခေါင်း(၃)၊

 မြန်မာ့ လိပ်ပြာမျိုးစိတ်များ တံဆိပ်ခေါင်း တတိယခေါင်း ထွက်ပါတယ်။ လိပ်ပြာအမည် အင်္ဂလိပ်လို Common Yellow Swallowtail ပါ။ မြန်မာလို မရှိပါ။ 

.

စီးရီးအတိုင်း ပန်းနဲ့လိပ်ပြာ လှပစွာ ဒီဇိုင်းလုပ်ထားပါတယ်။ နိုင်ငံအမည် မြန်မာဘာသာနဲ့ မပါပါ။ ဒီတတိယခေါင်းက ဒုတိယခေါင်းနဲ့ နှစ်ပတ်ခြားပါတယ်။ စတုတ္ထခေါင်း ဘယ်နေ့ထုတ်မလည်း မပြောနိုင်ပါ။ စီးရီးတံဆိပ်ခေါင်း ၁၂မျိုးလုံးရဲ့ပုံကိုတော့ The Burma Fantail ဆိုတဲ့ Newsletter မှာ ဖော်ပြထားပြီးပါပြီ။ 

.

တံဆိပ်ခေါင်းတန်ဖိုး ၂၀၀ ကျပ်ပါ။ FDC လည်း ထုတ်ပါတယ်။ တအိပ် ၄၀၀ ကျပ်ပါ။ brochure ခေါ်မလား၊ postcard ခေါ်မလား၊ တံဆိပ်ခေါင်းအကြောင်း အချက်အလက်တွေ ဖော်ပြထားတဲ့ ကဒ်လည်းထုတ်ပါတယ်။ လှပတဲ့ ဒီဇိုင်းနဲ့ပါ။ 

.

ပြဿနာက ယနေ့ ရန်ကုန်စာတိုက်ကြီးမှာ ကဒ်တခုမှ ကောင်တာမှာ မရောင်းနိုင်ပါ။ အကုန် ကြိုမှာထားလို့ပါတဲ့။ အဲ့လောက်ကြီးအထိတော့ မဖြစ်သင့်ဘူးထင်ပါတယ်။ မဆလခေတ်က ပြည်သူ့ဆိုင် သမဆိုင် ပစ္စည်းရောင်းသလို သိတဲ့သူတွေဘဲ ရသွားတာ ဒီခေတ်မှာ မဖြစ်သင့်တော့ပါ။ တံဆိပ်ခေါင်းတွေ အဆင့်မှီ ထုတ်လာတဲ့ခေတ်မှာ ဒါမျိုး မရှိသင့်တော့ပါကြောင်း။ 

မြန်မာ့လိပ်ပြာ တံဆိပ်ခေါင်း(၂)

 

မြန်မာ့လိပ်ပြာ မျိုးစိတ်များ တံဆိပ်ခေါင်း စီးရီးအတွက် ဒုတိယခေါင်း ယနေ့ထွက်ပါတယ်။ ပထမခေါင်းနဲ့ နှစ်လနီးပါးကွာပါတယ်။ ထိုင်းတို့ အင်္ဂလန်တို့မှာတော့ တနှစ်အတွင်း ထွက်မယ့် တံဆိပ်ခေါင်းတွေကို ရက်အတိအကျနဲ့ ကြိုကြေညာထားတာ တွေ့ဘူးပါတယ်။ တိုးတက်လာတဲ့ မြန်မာ့တံဆိပ်ခေါင်း ထုတ်ခြင်းလုပ်ငန်းမှာ မကြာခင် တွေ့ရမယ်လို့ မျှော်လင့်ပါတယ်။

.

တံဆိပ်ခေါင်းပေါ်က လိပ်ပြာအမည်က Common Bluebottle ပါတဲ့။ မြန်မာအမည် ရှိဟန်မတူပါ။ 

.

တံဆိပ်ခေါင်း တန်ဖိုးက ၂၀၀ ကျပ်ပါ။ FDCက ၄၀၀ကျပ်ပါ။ စီးရီးရဲ့ အရင်ခေါင်းလိုဘဲ အရောင်ဖျော့ဖျော့နဲ့ နိုင်ငံအမည် မြန်မာဘာသာနဲ့ မပါပါ။ 

.

တဖြေးဖြေး ပထမနေ့တုံး လာထုသူ နည်းလာပါပြီ။ လူကြီးတွေဘဲ တွေ့ရတယ်။ FDCနဲ့ တံဆိပ်ခေါင်း ဝယ်လို့ရပေမယ့် တံဆိပ်ခေါင်းအကြောင်း ကဒ်ပြား ဝယ်လို့မလွယ်ပါ။ ကြိုတင်မှာထားသူတွေအတွက် အထုတ်လိုက်တွေ့ပေမယ့် ကောင်တာမှာရောင်းတာ တထုတ်မရှိလို့ ထင်ပါတယ်။ စီစဥ်ပေးနိုင်ရင် ကျေးဇူးပါ။ 

''for good''

 

for good ဆိုတဲ့ အင်္ဂလိပ် စာလုံးအတွဲကို ဆယ့်လေးငါးနှစ်သားကတည်းက ကြားဘူးပြီး သတိထားမိပါတယ်။ မြန်မာပြည်ကနေ အပြီးထွက်သွားသူတွေ၊ လာနှုတ်ဆက်သူတွေကို စသတိထားမိလို့ပါ။

.

အခု ဂူဂယ်က တလွဲဘာသာပြန်ထားသလို ''ကောင်းဖို့'' သွားကြတယ်ဘဲ ထင်ခဲ့တာပါ။ မဆလမြန်မာပြည်ကနေ အနောက်နိုင်ငံတွေကို သွားကြတာကိုး။ ကောင်းဖို့ဘဲဖြစ်မှာပေါ့။ နောက်တော့ မိဘများကပြောပြမှ ဂူဂယ် အင်္ဂလိပ် အဓိပ္ပာယ်မှာ ပြထားသလို ''အမြဲတမ်း''မှန်း သိခဲ့ရတာပါ။

.

အဲဒီကစ ဆွေမျိုး မိတ်ဆွေ သူငယ်ချင်းများစွာ ပြည်ပကို ထွက်သွားကြပါပြီ။ အရင်ကတော့ သိတ်မစဥ်းစားမိပါ။ အခု သေချာစဥ်းစားကြည့်တော့ မြန်မာပြည်ကနေ အပြီးထွက်သွားသူအားလုံး မှန်တယ်ထင်တာပါဘဲ။

.

ဘယ်နေရာရောက်ရောက် လူရယ်လို့ဖြစ်နေရင် စားဝတ်နေရေးအတွက် အခက်အခဲရှိမယ်။ ရုန်းကန်ရမှာပါဘဲ။ ဒါပေမယ့် မြန်မာပြည်တွင်း နေသူတွေလိုတော့ အပိုဒုက္ခ တမျိုး ကြုံစရာလိုမယ် မထင်ဘူး။ 

.

အခုလည်း လူအများစု ထွက်ဖို့ ကြိုးစားနေကြပြီ။ ပြန်လာကြမလား၊ အမြဲတမ်းလား မသေချာကြဘူး။ for good ကို  ဂူဂယ်မြန်မာပြန်လိုဘဲ ဖြစ်ကြပါစေ။

Google search သုံးကြပါ။

 မိတ်ဆွေတဦး ကောင်းမှုဖြင့် ပါချုပ်ဆရာတော်ရေး ''လောကသားတို့အတွက် မြတ်ဗုဒ္ဓ၏ကြိုးပမ်းချက်'' စာအုပ်ဖတ်နေပါတယ်။ ဖတ်ရင်း တွေ့တာလေး ပြောချင်တာပါ။

.

ဤစာများကို ဆရာတော်ကြီးက တနာရီစာ အပိုင်းများ ဟောခဲ့တာပါ။ အရင်က အတော်နားထောင်ဖြစ်ခဲ့ပါတယ်။ နာဖြစ်ခဲ့တယ် ဆိုပါတော့။ အဲ့ဒီကတည်းက စုစည်းပြီး စာအုပ်လိုဖတ်ရရင် ကောင်းမယ်လို့ တွေးမိတယ်။ နောက်ပိုင်း သေချာတည်းဖြတ်ပြီး စာအုပ်လုပ်နေပြီကြားတော့ အိုကေပြီပေါ့။

.

ဆရာတော်ကြီးက ဘုရားဖြစ်ချိန်မှစ လူသားတွေအကျိုးရှိဖို့ ပြုလုပ်ခဲ့တာတွေ ဟောခဲ့တာပါ။ အကြောင်းအရာပိုင်းမှာ ဗဟုသုတ ရစရာတွေကြီးပါ။ ဖတ်ရကျိုး နပ်ပါတယ်။

.

ဆရာတော်ကြီးက အင်္ဂလိပ်စာလုံးတွေ ထည့်ဟောလေ့ရှိပါတယ်။ ဒါလည်း အကျိုးနောက်တမျိုး ရပါတယ်။ စီစဥ်သူက သုတ္တန်အညွှန်း ပါဠိစကားလုံးများ မမှားအောင် ဆရာတော်အချို့နဲ့ တိုက်ဆိုင်ရှာဖွေ ပြင်ဆင်ခဲ့တယ်လို့ အမှာစာမှာရေးထားပါတယ်။ အင်္ဂလိပ်စာလုံးတွေတော့ မပြင်ဆင်ခဲ့လို့ ထင်ပါတယ်။ စာလုံးပေါင်းအမှားတွေ တွေ့နေရပါတယ်။

.

သုတ္တန်အညွှန်းနဲ့ ပါဠိစာလုံးပေါင်းထက် အင်္ဂလိပ် စာလုံးပေါင်း ပြင်ရတာ ပိုလွယ်ပါတယ်။ ဒါကို ပြောပြချင်တာပါ။ ဒစ်ရှင်နာရီ လှန်စရာ မလိုပါ။ စာလုံးပေါင်းတွေ အဓိပ္ပါယ်တွေ အလွတ်ရစရာ သိစရာတောင်မလိုပါ။ အင်တာနက်သုံး ဖုန်းတိုင်းမှာပါနေတဲ့ ဂူဂယ်ရှာဖွေရေး Google search မှာ ရိုက်ကြည့်လိုက်ရုံပါ။ စာလုံးပေါင်းမှားရင် ပြင်ပေးယုံသာမက အဓိပ္ပါယ်ပါ ရှင်းပြပေးပါတယ်။ မြန်မာပြန်လည်း အချို့စာလုံးအတွက် ဖော်ပြပေးပါတယ်။ မြန်မာစာနဲ့ ပါဠိစာ စာလုံးပေါင်း စစ်တာထက် အများကြီး ပိုလွယ်တာပါ။ 

.

ခုတော့ လွယ်တာလေး အသုံမချလို့ ရုပ်ပျက်ရပါတယ်။ ဂူဂယ် သုံးကြပါလို့ တိုက်တွန်းပါရစေ

အနုပညာ အားနည်းလို့ပါ၊

 ဘာသာပြန်ဝတ္ထု တအုပ်ကို တလကျော် အချိန်ပေး ဖတ်လိုက်ရတယ်။ (မသိပေမယ့် အားနာလို့ စာအုပ်အမည် မပြောတော့ပါ။)  တဆက်တည်း မဖတ်ချင်လောက်အောင်ကို စိတ်ဝင်စားလို့ မရတာဗျာ။ ဇတ်ကြောင်းက အက်ဆီးဒင့်ဖြစ်လို့ ကျန်ခဲ့သူအကြောင်း။ သေချာကို ညီးငွေ့အောင် ရေးထားတာဖြစ်မယ်။ ဘာသာပြန်သူကလည်း ခုနောက်ပိုင်း ဖတ်နေကျဆရာ။ မူရင်းကလည်း စာပေနိုဗယ်ဆုရဆိုတော့ သေချာကို ရည်ရွယ်ရေးတာဘဲ။

.

ဖတ်နေရင်း နှစ်ခုသတိရတယ်။ ပထမတခုက ဗီဒီယိုခွေတွေ ခေတ်စားနေချိန် အငှားဆိုင်နဲ့ ချိတ်မိနေတော့ စိတ်ကြိုက်ကြည့်လို့ရချိန်။ ရုပ်ရှင်တွေ တော်တော်များများ ကြည့်ဖြစ်ချိန်ပေါ့။ (ခုတော့ မကြည့်ဖြစ်တာ ကြာပြီ။) 

.

ဟောလိဝုဒ်ကားတွေ ကြည့်တာများပါတယ်။ အဲဒီအချိန်က ကားကောင်းတွေလည်း အများကြီးထွက်တယ်။ အဲ့မှာ စဥ်းစားမိတာ။ ဟာ❗ အော်စကားဆုရကား ကြည့်ရင် ကောင်းမယ်လို့ တွေးမိတယ်။ ဒါနဲ့ အဲ့အချိန် အော်စကာဆုမှ အကောင်းဆုံးဇတ်ကားဆုနဲ့ အခြားဆုများစွာရ ကားကို ရွေးကြည့်တာ။ နှစ်ခွေတွဲကြီး။ English Patient တဲ့။ ကြည့်ဖူးသူတွေ မှတ်မိမှာပါ။ ကျော်တော့ ဆုံးအောင်ကို မနည်းကြည့်ယူလိုက်ရတယ်။

.

နောက်မှတ်မိတာတခုက ဒါ့ထက်စောတယ်။  မဆလခေတ်က။ ဟယ်လ်ပင်လမ်းမှာရှိတဲ့ ပြင်သစ်သံရုံးမှာ တပတ်တခါ ရုပ်ရှင်ပြတယ်။ ကျနော့ အကြိုက်ဘဲ။ ဇတ်လမ်းတွေက ရိုးရိုးနဲ့ဆန်းတတ်တယ်။ ၂၀၂၁ ဖေဖော်ဝါရီ ၁ရက်နေ့ မတိုင်ခင်အထိ မြန်မာတီဗီမှာ ပြင်သစ်ချယ်နယ် TV5Monde မှာလည်း အဲ့လိုကားတွေ ညနေဘက်ပြတယ်။

.

တရက်မှာ ပြတဲ့ကား အမည်တော့ မမှတ်မိပါဘူး။ အယ်လ်ဂျီးရီးယားကို ပြင်သစ်အုပ်စိုးစဥ်အချိန်။ အဲ့မှာရှိတဲ့ခံတပ်မှာ အလှည့်ကျသွား ကင်းစောင့်ရတဲ့ တပ်သားအကြောင်း ရိုက်ထားတာ။ သဲကန္တာရထဲက ရဲတိုက်ကြီး။ လူတယောက်မှလည်း မတွေ့ရ။ တခါလားမသိ မြင်းစီးအာရပ်တွေ ကပ်လာလို့ သေနတ်နဲ့ပစ်သံကြားမှ အိပ်ငိုက်သက်သာသွားတာ။

.

ကြည့်သူတွေလည်း ပျင်းနေပေမယ့် သံရုံးကိုအားနာလို့ ထမပြန်ကြသေးဘူး။ အတူသွားသူ အနုပညာစိတ်ဝင်စားသူကြီး စိတ်မရှည်တော့ဘူး။ ပြန်မယ်တကဲကဲ လုပ်နေပြီ။ အားနာစရာကွာ၊ ယဥ်ကျေးမှုအရ သည်းခံပါအုံးဆိုမှ ပြန်ထိုင်တယ်။ မခံနိုင်ကြပါဘူး။ ​မှောင်ထဲမှာ တယောက်ပြီးတယောက် ကုန်းကုန်း ကုန်းနဲ့ ထလစ်ကြတော့ နှစ်ယောက်သားလည်း ထလစ်ရတော့တယ်။ သံရုံးတွေ လှည့်ကြည့်ခဲ့ဘူးတဲ့အထဲ အားမနာဘဲ ထပြန်ကြတာ အဲ့တကားဘဲ ရှိတယ်။ 

.

အပြင်ရောက်မှ စဥ်းစားမိတာပါ။ အဲ့ရုပ်ရှင်မပြခင် ပြင်သစ်ယဥ်ကျေးမှု သံမှူးက အနည်းငယ်ရှင်းပြတာကို။ အခုပြမယ့် ရုပ်ရှင်က ဆုရကားတဲ့။ အယ်လ်ဂျီးရီးယားမှာ တာဝန်သွားထမ်းရတဲ့ စစ်သားတွေဘဝကို ပေါ်လွင်အောင် ရိုက်ထားတာတဲ့။ ပေါ်လွင်ပါတယ်ဗျာ။ ညီးငွေ့စရာကောင်းလိုက်ပုံ။ သဲကန္တာရထဲကြီးထဲ ကင်းစခန်းလေးထဲမှာ စစ်သားတယောက်က လူနဲ့ဝေးတုံး ထရမ်ပက်မှုတ်တာပါသေး။ နေပူပူထဲ တဂွီဂွီနဲ့ဗျာ။ စဥ်းစားသာကြည့်တော့။

.

ဖတ်ခဲ့တဲ့ဝတ္ထုနဲ့ အဲ့ရုပ်ရှင်နှစ်ကားက ဖတ်သူကြည့်သူတွေ ခံစားရအောင် သေချာရိုက်တာဖြစ်မယ်။ ကျနော်လို အနုပညာ နည်းသူတော့ ဘယ်လိုမှ ခံစားလို့မရပါကြောင်း။ 

မြန်မာ့လိပ်ပြာ တံဆိပ်ခေါင်း၊

 

မြန်မာ့ လိပ်ပြာမျိုးများ တံဆိပ်ခေါင်းစီးရီးအတွက် ပထမဆုံး တံဆိပ်ခေါင်း ယနေ့ထုတ်ပါတယ်။ ဒီစီးရီးမှာ တံဆိပ်ခေါင်း ၁၁လုံး ပါမယ်လို့ သိရပါတယ်။

.

ယနေ့ထုတ် တံဆိပ်ခေါင်းပေါ်က လိပ်ပြာရဲ့အမည်ကို အင်္ဂလိပ်လိုဘဲ ပါပါတယ်။ မြန်မာအမည် ရှိဟန်မတူပါ။ ဗမာတွေက လိပ်ပြာလို့ဘဲ သိမ်းကြုံးခေါ်လေ့ ရှိတာကိုး။ နောက်တံဆိပ်ခေါင်းတွေအတွက် အမည်ဘယ်လို ပေးမှာပါလိမ့်။

.

မူလ ဒီဇိုင်းမှာကို အရောင်ဖျော့ထားတယ် ထင်တယ်၊ တံဆိပ်ခေါင်း အရောင်ကလည်း ခပ်ဖျော့ဖျော့ဘဲ။ ဒီဇိုင်းရော အရောင်တွေပါ စုချင်စရာပါ။ စီးရီးရဲ့ ပထမဆုံးခေါင်းကိုတော့ သဘောကျပါတယ်။

.

တံဆိပ်ခေါင်းက ၂၀၀ကျပ်တန်ပါ။ FDC ထွက်တယ်။ ၄၀၀ကျပ်ပါ။ တံဆိပ်ခေါင်းအကြောင်း ကဒ်ထုတ်ပေမယ့် ရန်ကုန်စာတိုက်ကြီး ကောင်တာမှ အခုနှစ်ဆယ်လောက်ဘဲ ရောင်းပြီး ကုန်သွားပါတယ်တဲ့။ ဒီဇိုင်းအပြင်အဆင် လှလှပပလေးပါ။

.

နောက်ပိုင်းစီးရီးတွေ စတိုင်အတိုင်း နိုင်ငံနာမည် မြန်မာလို မထည့်ပါ။ နောက်ခေါင်းတွေအတွက် တံဆိပ်ခေါင်းကဒ် ပိုရိုက်စေချင်ပါတယ်ဗျား။

၇၆ နှစ်မြောက် လွတ်လပ်ရေးနေ့ ၊

 ၂၀၂၄ခုနှစ် ၇၆နှစ်မြောက် လွတ်လပ်ရေးနေ့ အတွက် တံဆိပ်ခေါင်း ထုတ်ပါတယ်။ ၂၀၀ ကျပ်တန် သုံးလုံးပါ။ FDC လည်း သုံးမျိုးထုတ်ပါတယ်။ တံဆိပ်ခေါင်း ဒီဇိုင်းယူထားတဲ့ ဓာတ်ပုံသုံးပုံနဲ့ပါ။ FDCက တအိပ် ၄၀၀ ကျပ်ပါ။

.

တံဆိပ်ခေါင်းတွေရဲ့ ဒီဇိုင်းနာက ပြန်ကြားရေးဝန်ကြီးဌာနပါတဲ့။ ကြည့်ရတာ လွတ်လပ်ရေးနေ့အထိမ်းအမှတ် ပြိုင်ပွဲကပုံတွေ ယူသုံးတယ်ထင်တယ်။ လွတ်လပ်ရေးနေ့က မြန်မာပြည်ရဲ့ National Day ပါ။ နိုင်ငံ့နေ့လို့ သတ်မှတ်ထားတာပါ။ ဒီနေ့ဆို အခြားပြည်ပနိုင်ငံတွေက ဒါ့ကြောင့် သဝဏ်လွှာတွေပို့ကြတာပါ။ နှစ်စဥ်နီးပါးလည်း အလေးထား တံဆိပ်ခေါင်းထုတ်နေကြဆိုတော့ ပြန်ကြားရေးကဘဲဖြစ်ဖြစ် စာတိုက်ဌာနကဘဲဖြစ်ဖြစ် တံဆိပ်ခေါင်းပြိုင်ပွဲ လုပ်ပြီးယူသုံးရင် ဟန်မယ်ထင်တယ်။ အခုက ပိုစတာပုံမျိုးတွေဘဲ ဖြစ်ဖြစ်နေတယ်။

.

ပုံနှိပ်မှုက ထုံးစံအတိုင်း အရောင်မမှန်။ မှိန်နေတယ်။ ဒီနေ့ စာတိုက်မှာ ကြားခဲ့တာက လိပ်ပြာစီးရီး လာမယ်ဆိုဘဲ။ လိပ်ပြာ လှလှလေးတွေ အရောင်တောက်ပစွာနဲ့ မြင်ပါရစေ။