ပြီးခဲ့သည့်အပတ်ထဲက မန္တလေးမှ ရန်ကုန်ဘက်အလာ အမြန်လမ်းတွင် မဖြစ်သင့်တာ နှစ်ခုတွေ့ခဲ့ရသည်။
.
ပထမတခုမှာ အမြန်လမ်းမှ ပျော်ဘွယ်-နတ်မောက်လမ်းဆုံတွင်ဖြစ်သည်။ တိုယိုတာဆာ့ဖ်ကားတစီး အမြန်လမ်းမှ ဆင်းရမည့်လမ်းအတိုင်း တက်လာသည်။ တွေ့သည့်အချိန်တွင် သုံးလမ်းသွားချဲ့ထားသည့်နေရာဘဲ ရှိသေးသဖြင့် မီးတောက်ပြခဲ့ရသည်။ နောက်ကြည့်မှန်မှကြည့်လိုက်ရာ နှစ်လမ်းသွားဖြစ်သွားသည့်နေရာတွင် ရပ်နေလို့တော်သေးသည်။ လမ်းမှန်မမှန် စဥ်းစားနေပုံရသည်။ ဤကဲ့သို့ မှားတက်မလာနိုင်အောင် လမ်းဆုံများကို ပြင်သင့်ပါပြီ။
.
ဒုတိယတွေ့ခဲ့သည်က ဖြူးကားနားကွင်းတွင်။ အဲဒီမှာ ဒဲန်ကိုဓာတ်ဆီဆိုင်ရှိသည်။ ဆီထည့်ဖို့ ဆိုင်ဘက်သို့အချိုး ပါရာဒိုတစီး ထွက်လာသဖြင့် ရပ်ပေးလိုက်ရသည်။ နှစ်စီးသွားနိုင်သော်လည်း မျက်နှာချင်းဆိုင်ဆုံနိုင်သဖြင့် သတိထားခါမှ တော်ယုံကျမည်ဟု တွေးလိုက်မိသေးသည်။
.
ဆီထည့်ပြီး ရန်ကုန်ဘက်ပြန်ဖို့ ဆီဆိုင်မှ ထွက်တော့မှ အဖြေမှန်သိရတော့သည်။ မောင်းဘူးသူများသိပါလိမ့်မည်။ ဓာတ်ဆီဆိုင်မှ အမြန်လမ်းပေါ်ပြန်တက်ဖို့ ဆင်းလာသည့် အမြန်လမ်းဖြတ်အောက်လမ်းသို့ ပြန်ပတ်ရသည်။ ထိုသို့ပတ်ရန် ဖြူးကားရပ်စခန်းကြီး တဝင်းလုံးကို ပတ်ရတော့သည်။ အိပ်စပရက်စ်ကားကြီးများကိုရှောင်၊ စားသောက်ဆိုင်တွေရှေ့ ပြန်ဖြတ်ပြီးမှ ထွက်လမ်းကိုရောက်သည်။ ဒါကြောင့် ပါရာဒိုကားက ဆီဆိုင်အထွက် လမ်းပြောင်းပြန်မောင်းသွားတာကိုး။ တိုက်ဆိုင်သည်မှာ ထိုဆာ့ဖ်ရော ပါရာဒိုရော နံပတ်ပြားအဝါကြီးများနဲ့ပါ။ မှန်တွေမှာလည်း စာတွေကပ်လို့။
.
ပြောချင်သည်မှာ နံပတ်အဝါများနဲ့ မဆိုင်ပါ။ နံပတ်ပြားမည်သည့်အရောင်နဲ့မဆို မှားမောင်းနိုင်သော လမ်းအခင်းအကျင်းများ ဖြစ်နေသည်။ ရန်ကုန်မန္တလေး အမြန်လမ်းမပေါ်ရှ်ိ ရပ်နားစခန်းအဝင်အထွက်များကို နိုင်ငံတကာအဆင့်မှီ ပြန်သတ်မှတ်သင့်ပြီ။ မှား၍မောင်းမဝင်သွားနိုင်အောင်၊ သိသိနဲ့ဖြတ်ပြီး မမောင်းနိုင်အောင် ပြန်ပြင်သင့်ပါပြီ။ စဖောက်စဥ်က ကားမမောင်းဘူးသော အာဏာရှိသူက စေခိုင်းသည့်အတိုင်း ဖောက်ခဲ့သည်ကို နားလည်ပေးနိုင်ပါသည်။ သို့သော် ယခုလိုပြည်သူ့အစိုးရလက်ထက်တွင် ခရီးသွားများ အန္တရယ်ရှင်းရန် လမ်းစံနစ်ကျွမ်းကျင်သူများက အမှန်ပြင်ဆင်သင့်ပြီ မဟုတ်ပါလော။
