62

 

ရှင်မဟာရဋ္ဌသာရ တံဆိပ်ခေါင်း၊

 ရှင်မဟာရဋ္ဌသာရ ၅၅၅နှစ်ပြည့် အထိမ်းအမှတ်အဖြစ် မြန်မာ့စာတိုက်မှ တံဆိပ်ခေါင်း ထုတ်ဝေပါတယ်။ အင်းဝခေတ်မှာ ပေါ်ထွန်းကျော်ကြားခဲ့တဲ့ မြန်မာစာဆိုတဦးရဲ့ မွေးနေ့အထိမ်းအမှတ်ပါ။ မြန်မာတံဆိပ်ခေါင်းသမိုင်းမှာ ပုဂ္ဂိုလ်ဂုဏ်ပြုအဖြစ် ထုတ်ဝေတာ ပထမဆုံးအကြိမ် ဖြစ်မယ်ထင်တယ်။ ၁၉၇၀မှ ၂၀၀၀ပြည့်နှစ် ပတ်ဝန်းကျင်အထိ တံဆိပ်ခေါင်းစုတာ ခေတ်စားစဥ်ကသာ အခုလို ထုတ်ခဲ့ရင် ပြည်ပစုဆောင်းသူတွေအထိ ပေါက်ခဲ့မှာ အသေအချာပါ။

.

အခုထုတ်တဲ့ တံဆိပ်ခေါင်းက ၂၀၀ကျပ်တန်ပါ။ FDC လည်း ထုတ်ဝေပါတယ်။ တအိပ် ၄၀၀ကျပ်ပါ။ ခုနောက်ပိုင်း အလွယ်တကူ ဝယ်လို့ရလာပါပြီ။ ရန်ကုန်စာတိုက်ကြီးမှာ ကိုဗစ်မဖြစ်ခင်ကလောက် တံဆိပ်ခေါင်းဝယ်သူ မများတော့ပါဘူး။ တွေ့ခဲ့သမျှ လူကြီးပိုင်းသာ များပါတယ်။

.

ဒီဇိုင်းအရ နိုင်ငံအမည် မြန်မာလို ပြန်ထည့်လာပါတယ်။ အကြောင်းအရာကို အင်္ဂလိပ်လို မထည့်ပါ။ ထည့်ရင်လည်း ပြွတ်သိပ်ပြီး ကြည့်ကောင်းတော့မယ် မထင်ပါ။ နဂိုရ်အရောင်က ခပ်မှိန်မှိန်အရောင်တွေ သုံးထားလို့ထင်တယ်၊ တံဆိပ်ခေါင်း အပြင်အရောင်ကလည်း မှိန်မှိန်ပါဘဲ။ မြန်မာ့စာပို့လုပ်ငန်းရဲ့ ဖေ့ဘုတ်ကပုံနဲ့ တွဲဖော်ပြလိုက်ပါတယ်။ 

ကလေးများနှစ် တံဆိပ်ခေါင်း၊

 မြန်မာ့စာပို့ဌာနအနေနဲ့ တံဆိပ်ခေါင်းအသစ် မထုတ်တော့ဘူးလို့ ထင်ထားတာ၊ ဒီ​​နေ့ အသစ်ထုတ်ပါတယ်။

.

လွန်ခဲ့တဲ့ ၄၄ နှစ်က ''အပြည်ပြည်ဆိုင်ရာကလေးများနှစ်'' ဆိုပြီး တံဆိပ်ခေါင်း ထုတ်ခဲ့ဘူးတယ်။ အဲဒီတုံးက တံဆိပ်ခေါင်း ဒီဇိုင်းပညာရှင်က ပန်းချီဆရာကြီး ဦးခင်လှိုင်တဲ့။ အခုလည်း ဒီဆရာကြီးရဲ့ လက်ရာနဲ့ ထုတ်တာပါ။ အရင်ပုံံနဲ့ လုံးဝကွာခြားပါတယ်။ 

.

ဟိုအရင် ၁၉၇၉ခု ထုတ်တုံးက ၂၅ပြား နဲ့ ၅၀ ပြားတန်တွေ၊ တမတ် နဲ့ ငါးမူးတန်ပေါ့။ အဲ့တုံးက ပြည်တွင်းစာပို့ခက ၁၅ပြားရယ်။ UNICEF ကလိုဂို မိခင်က ကလေးကို ငုံ့ပွေ့နေပုံလေးကို မြန်မာပြည်မြေပုံနဲ့ တွဲ ဒီဇိုင်းလုပ်ပေးထားတာ။ အပြာနဲ့ ခရမ်းရင့်ရောင်။ 

.

ဟိုတုံးက နိုင်ငံနာမည် မြန်မာလို အင်္ဂလိပ်လိုပါတယ်။ ''အပြည်ပြည်ဆိုင်ရာကလေးများနှစ်'' ဆိုတာ မြန်မာလိုဘဲ ပါတယ်။ အခု ထုတ်တဲ့ခေါင်းမှာ နိုင်ငံအမည် မြန်မာလို မပါ။ ဒီဇိုင်းဆရာကြီး ကျန်ရစ်တာတော့ မဖြစ်နိုင်။ ခုနောက်ပိုင်း မြန်မာတံဆိပ်ခေါင်းတွေမှာ မပါတာ ထုံးစံဖြစ်နေပြီ။ မြန်မာစာလုံးပါမှတော့ မြန်မာတံဆိပ်ခေါင်း ဘဲပေါ့။

.

နောက်ထုံးစံဖြစ်လာတာက ပုံနှိပ်အရည်အသွေးဘဲ။ ဒီဇိုင်းကအရောင်ကို မှီအောင် မနှိပ်နိုင်တော့ဘူး။ မြန်မာ့စာတိုက်လုပ်ငန်း ဖေ့ဘုတ်ကပုံကို အပြင်နဲ့ ယှဥ်ကြည့်ဖို့ တွဲတင်ပေးလိုက်ပါတယ်။

.

တံဆိပ်ခေါင်းက ၂၀၀ ကျပ်တန်ပါ။ FDC လည်းထုတ်တယ်။ တအိပ် ၄၀၀ ကျပ်ပါ။ စာအိပ်ကွာလတီ ကောင်းပါ၏။ 

ဘုရားစင်၊

 

google map ပိုကောင်းဖို့၊

 

ဂူဂယ်မက်ပ်က လွဲတာတွေရှိတယ်လို့ ပြောကြတယ်။ တနေ့က ယူတုဘာတယောက် ဂျပန်မှာ လမ်းပိတ်နဲ့တွေ့နေလို့ နောက်ပြန်ကွေ့ရပြီး ဂူဂယ်ကို မေတ္တာပို့နေတာ ကြည့်လိုက်ရသေး။

.

ဟုတ်ပါတယ်။ ဂူဂယ်မှာ လိုအပ်ချက်တွေ အများကြီး ရှိပါတယ်။ ဂူဂယ်က သူ့ထုံးအတိုင်း အသုံးပြုသူတွေစီက ဒေတာတွေစုရင်း သူ့အက်ပ်တွေကို ပိုကောင်းအောင် လုပ်သွားမယ်ထင်တယ်။ ဒီတော့ လိုအပ်ချက်တွေကို ပြင်သွားကြပါ။ Edit map လို့ သူ့အက်ပ်မှာ ပေးထားပါတယ်။

.

ကျော်တင်တာကြည့်သူ အားလုံးပေါင်းနဲ့ ဓာတ်ပုံကိုဘဲကြည့်သူ အမြဲကွာတာ သတိထားမိတယ်။ သိန်းချီကွာတာ တွေ့ပေမယ့် ဘာကြောင့်မှန်း မသိခဲ့ပါ။ မနေ့ကရတဲ့ ဂျီမေးလ်အရ နေရာလွဲပြထားတာကို ပြန်တည့်ပေးလိုက်တာကို ကြည့်သူ သုံးသိန်း ပြည့်ပြီတဲ့။ တကယ်က မမှတ်မိတော့ပါဘူး။ ဒီလို ပြင်ဆင်ချက်တွေကို ကြည့်သူပေါင်းကိုလည်း ထည့်ပေါင်းပေးထားဟန် ရှိပါတယ်။ 

.

ကိုယ်သွားနေကျ နေရာက မပါတဲ့ လမ်းတွေ (အထူးသဖြင့် လူသွားလမ်းကျဥ်းတွေ) ထည့်ခိုင်းတာ သုံးလေးခုတော့ ဖော်ပြပါပြီ။ ကိုယ်တင်တိုင်းလည်း မဖော်ပြပါ။ သူတို့ စိစစ်ပြီးမှ ခွင့်ပြုတာပါ။ အပယ်ခံရတာက ကျော့်အတွက် ပိုများပါတယ်။ စိတ်ပျက်စရာ မရှိပါ။ လူအများသုံးဖို့ ကိုယ်အင်အား အနည်းငယ်ဘဲ သုံးပြီး ကူညီခွင့်ရတယ်ဘဲ သဘောထားပါတယ်။

HOME 2023.

 

မိုးကုန်ချိန်၊

 

တော်ကောင်းမင်း ရဲ့ နွမ်းလျသေရှင်။

 ခေတ်သစ် တရုတ်ဂန္တဝင် ဝတ္ထုရှည်နှစ်အုပ်တွဲ ဖတ်ပြီးတယ်။ ဆရာ တော်ကောင်းမင်း ဘာသာပြန်တဲ့ မော့ယန်ရဲ့ နွမ်းလျသေရှင်ပါ။ မူရင်းရေးသူ မော့ယန်က စာပေနိုဘယ်လ်ဆု ရဘူးသူဖြစ်တယ်။ ဆရာတော်ကောင်းမင်း ကလည်း တရုတ်စာပါ နားလည်သူဖြစ်မယ်။ မူရင်းလည်း ကောင်း၊ ဘာသာပြန်လည်း ကောင်း ပါ။

.

တရုတ်ပြည် ခေတ်သစ်သမိုင်းကို ဝတ္ထုနောက်ခံ၊ အတ္ထုပတ္တိတို့အပြင် သမိုင်းစာတွေလည်း ဖတ်ဘူးပါပြီ။ ဒီဝတ္ထုမှာကျ ပုံစံတမျိုး။ ကွန်မြူနစ်တွေ အာဏာရကာစက မြေပိုင်ရှင်ဖြစ်ခဲ့လို့ စာရင်းရှင်းခံရသူက ဘဝအစွဲကြောင့် သေပြီးနောက် မြည်း နွား ဝက် ခွေး မျောက် ငါးဘဝဖြစ်ပြီး နောက်ဆုံး လူဘဝပြန်ရောက်၊ အဲ့ဒီကျမှ နှစ်ငါးဆယ်ကြာ ဖြတ်သန်းမှုကို ပြန်ပြောပြတဲ့ဇတ်လမ်း။ ဒီကလေး ဘယ်သူ့ကလေး ဖြစ်မလဲ နောက်ဆုံးအချိန်ထိ စိတ်ဝင်စားစရာ ဇတ်လမ်းရေးထားတာ။

.

ဒီစာအုပ်အရင် သုံးအုပ် တရုတ်စာအုပ်ပြန်တာ ဖတ်ပြီးပြီ။ တအုပ်က မော့ယန်ရဲ့စာအုပ်ဘဲဖြစ်ပြီး တအုပ်က ဝူဟန်မှာ ကိုဗစ်ဖြစ်ချိန် မှတ်တမ်းတင်ရေးထားတဲ့ ဝူဟန်ဒိုင်ယာယီ။ ဘာသာပြန်သူတွေလည်းကောင်းတော့ တရုပ်စာအုပ် ပြန်ထားတာတွေ ဖတ်ရတာ ထူးဆန်းကောင်းမွန်နေတယ်။ ဇတ်လမ်းတွေအပြင် စာလုံးသုံးပုံတွေ၊  ရှေးကဗျာတွေ စာတွေ ညှပ်သုံးပုံတွေ၊ အမည်ပေးပုံတွေ၊ တင်စားပြောတာတွေ ထူးဆန်းနေတယ်။ အနောက်ဝတ္ထု ဘာသာပြန်တွေဘဲ အဖတ်များခဲ့လို့လည်း ပါမှာပါ။

.

ကျနော်ထင်တယ်၊ လွန်ခဲ့တဲ့ နှစ်သုံးဆယ်ခန့် မော်ဒန် ဝတ္ထုတိုရှည်တွေ ဖတ်ပြီးကတည်းက ကျနော့အတွက် ပထမအကြိမ် စာပုံစံသစ် ဖတ်ဖူးခြင်းဘဲလို့။

မန်ချက်စတာ ထရီဘယ်၊

 

မနေ့က ဖွဘုတ်မှာ အတွေ့များနေတဲ့ #treble. ဆိုတဲ့ စကားလုံးကို အားကစားနဲ့ပတ်သက်လို့ သုံးတာ အရင်က သတိမထားမိပါ။ ၁၉၉၉မှာ မန်ယူက ချန်ပီယံလိဂ် နိုင်လိုက်တော့မှ စကြားဘူးတာဘဲ။ အရင်က အမ်ပလီဖိုင်ယာမှာ ပါတာတော့ တွေ့ဘူးတယ်။

.

မန်ယူအားပေးခဲ့တဲ့ အချိန်ကပေါ့။ ဖိုင်နယ်မှာ ဘိုင်ယန်နဲ့ကန်တာ စောစောကတည်းက တဂိုးရှုံးနေ၊ ခြေကလည်း မမှီလို့ စိတ်ပျက်ပြီး ကြည့်နေတုံး (အခုချိန်ဆို အိပ်ပြီ) နောက်ဆုံးမိနစ်မှ ချေပဂိုးရ၊ အင်ဂျူရီတိုမ်းမှာ ဆူပါဆဘ် ဆိုရှားက အနိုင်ဂိုးသွင်း၊ ယုံနိုင်စရာတောင် မရှိခဲ့။ ဖာဂူဆန်ရဲ့ ကစားသမားတွေအပေါ် ပရက်ရှာပေးနိုင်စွမ်းက နောက်ဆုံးခရာ မမှုတ်ချိန်အထိ သက်ရောက်ခဲ့တာ။

.

အဲ့ဒီပွဲမကန်ခင် မန်ယူက ပြည်တွင်း အဓိကနှစ်ဖလား ရထားပြီးပြီ။ နှစ်ဖလားကို ဒယ်ဘယ်လို့ သုံးတော့ သုံးဖလားကို ထရစ်ပယ်ဘဲ သုံးမယ်ထင်တာ။ ထရီဘယ်တဲ့။ အင်္ဂလိပ်တွေက အားကစားမှာ သုံးဆုရတာကို ထရီဘယ်လို့ သုံးမှန်း အဲ့ဒီအချိန်ကစ သိခဲ့ရတာပါ။

.

အဲ့ဒီအရင်က အင်္ဂလန်က ဘယ်ဘောသင်းမှ မထရီဘယ်ဘူးဘူး။ ဂျာမဏီနဲ့ စပိန်မှာတော့ ဘယ်ဘူးနိုင်တယ်။ သူတို့မှာက တသင်းလောက်ဘဲ ပတ်ဗိုလ်စွဲနေတော့ ပြည်တွင်းချန်ပီယံ ဥရောပ ချန်ပီယံလိဂ်ရရင် ဘယ်နိုင်တာကိုး။ အင်္ဂလန်မှာက ဒဘယ်ဖို့တောင် အတော်ခက်တာကလား။

.

နှစ်ထောင်ပြည့်နှစ်ကျော်တော့ လီဗာပူးက သုံးဆုရသေးတယ်၊ သူ့ပရိဿတ်က ထရီဘယ်လုပ်လို့ မန်ယူတွေက ​လှောင်ကြတယ်။ ထရီဘယ် မစစ်ဘူးလို့။ ဘာဘူရတာက FAကပ်ရယ်၊ လိဂ်ကပ်နဲ့ UEFAကပ် မလို့။ တကယ်ဆို လီဗာပူးက ပြည်တွင်းလိဂ် ချန်ပီယံလည်း (ဟိုစဥ်က) အများဆုံးရဘူးတယ်၊ ချန်ပီယံလိဂ်လည်း သုံးလေကြိမ်ရဘူးရက်နဲ့ မထရီဘယ်ဘူးတာ ရဖို့ ဘယ်လောက်ခက်လည်း ပြနေတာဘဲ။

.

ခုတော့ မန်ချက်စတာ နှစ်သင်း ထရီဘယ်ဘူးပြီဆိုတော့ မန်ယူ ကြွားလို့ မရတော့ဘူးပေါ့။ အင်္ဂလန်မှာ ဘောလုံးအသင်း အများဆုံးရှိတဲ့ လန်ဒန်မြို့က ဘယ်အသင်းမှ မရဘူးတာ အံ့ဩစရာ။ သေချာစဥ်းစားကြည့်တော့လည်း အံ့ဩစရာ မရှိ။ ချန်ပီယံလိဂ် ရဘူးတဲ့ လန်ဒန်အသင်း ချယ်ဆီးဘဲ ရှိတာ။ ဒါတောင် နောက်ပိုင်း ရုရှသဌေးခေတ်မှ ရဘူးတာ။ သဌေးလည်း မရှိတော့ရော ချယ်ဆီးက ပြည်တွင်းမှာတောင် ငုတ်တုပ်။

မြန်မာတစ်ငှက် တံဆိပ်ခေါင်း၊

 မြန်မာဒေသရင်း ငှက်မျိုးစိတ်များ တံဆိပ်ခေါင်း စီးရီးစ်ရဲ့ နဝမမြောက်ခေါင်းအဖြစ် ''မြန်မာတစ်''ငှက်ပုံနဲ့ ဒီနေ့ထွက်တယ်။ ငှက်အမည် အင်္ဂလိပ်လို ''Burmese Tit'' ပါ။ ဒီစီးရီးစ်က ကိုးလုံးထုတ်မှာဆိုတော့ နောက်ဆုံးခေါင်းပါ။ စီးရီးစ်အတိုင်း ၂၀၀ ကျပ်တန်ပါ။ FDC နဲ့ brochure လည်းထုတ်ပါတယ်။ ၄၀၀ ကျပ်စီပါ။

.

ပုံမှာ Myanmar Post facebook က မူရင်းပုံနဲ့ ယှဥ်ပြထားပါတယ်။ အပြစ်ပြောတယ် ဖြစ်မစိုးလို့ မပြောတော့ပါ။ ကိုယ့်ဖာသာ ဆုံးဖြတ်ကြပါတော့။

.

ဒီတခေါက် ငှက်စီးရီးစ်မှာ မူလဒီဇိုင်းများ အားလုံးကောင်းပါတယ်။ ငှက်ရွေးချယ်မှုကို သက်ဆိုင်ရာပညာရှင်တွေ ရွေးတာပါ။ brochure မှာ အမည်နဲ့တကွ ဖော်ပြထားပါတယ်။ ကျေးဇူးပါ။

.

စာတိုက်ဌာနရဲ့ ပုံနှိပ်မှုကတော့ အတော်ရှော်ပါတယ်။ ခေါင်းတိုင်းလောက် အရောင်မမှန်ပါ။ နှမြောစရာကောင်းပါတယ်။ ဒီခေတ် နိုင်ငံတကာ တံဆိပ်ခေါင်းတွေ ကြည့်လိုက်ရင် အရောင်ထွက်တောက်ပနေတာပါ။ ပုံနှိပ်နေရာ ပြောင်းသင့်ပါပြီ။ ဒီခေတ်ဒီအချိန် တံဆိပ်ခေါင်းအတု ထုတ်ကြမယ်လည်း မထင်တော့ကြောင်းပါ။ 

မန်စီးတီးကို ​ဗိုလ်စွဲစေသူတဦး၊

 အင်္ဂလန်အင်္ဂလန် အဆင့်မြင့်တန်း ဘောလုံးပွဲမှာ မန်စီးတီးအသင်း တနေ့က ပွဲမကန်ရသေးခင် ဗိုလ်စွဲသွားပါတယ်။ အနီးကပ် အာစင်နယ်အသင်း ရှုံးပွဲတွေ့သွားလို့ပါ။ 

.

ဒီနှစ် ပွဲပြီးကာနီး လေးငါးပွဲအလိုအထိ မန်စီးတီး ဇယားထိပ် မရောက်သေးပါ။ အာစင်နယ်အသင်း သရေတွေနဲ့ ခြေချော်လာတော့မှ ကျော်တက်ရတာပါ။ မန်စီးတီး ဗိုလ်စွဲဖို့ လုပ်ပေးသူတွေထဲ အာကြီးလည်း ပါပါတယ်။

.

မန်စီးတီးအသင်း ပိုင်ရှင်တွေ၊ ပရိဿတ်တွေ၊ ကစားသမားတွေနဲ့ နည်းပြဂွါဒီယိုလာတို့ရဲ့ အားထုတ်ကြိုးစားမှုတွေလည်း အဓိကကျပါတယ်။ ဟာလန်းအပြင် အခြားကစားသူတွေ နာမည်တပ်ခြီးမွမ်းရရင်လည်း တသင်းလုံး ပါပါလိမ့်မယ်။

.

မန်စီးတီး ဗိုလ်စွဲဖို့ အရေးပါသူ နောက်တဦးကို နာမည်တပ်ပြောပါဆို စီးတီးကစားသမား အဟောင်း စတာလင်ပါဘဲ။ သူချယ်ဆီးသို့ ပြောင်းသွားလို့သာ မန်စီးတီး ဗိုလ်စွဲတာလို့ အတိအကျ ပြောလိုပါတယ်။ ရှင်းပြပါရစေ။

.

စတာလင် စီးတီးမှာကစားစဥ်က အဓိက ဂိုးသွင်းသူပါ။ ကျနော်ကတော့ ဘောဖြုန်းတာများလို့ မကြိုက်ပါ။ တခါတလေ တကိုယ်ကောင်းဆန်သလိုရှိပေမယ့် တခါတလေ သူ့စီကဘောထွက်လာလို့ အခြားသူတွေ သွင်းနိုင်တာလည်း ရှိပါတယ်။ သူသာရှိနေရင် ပစ်ပယ်လို့ မရပါ။ ပွဲထွက် ပေးကစားရပါမယ်။ အင်္ဂလန် လက်ရွေးစဥ်ကလည်း ဖြစ်နေသေးသကိုး။

.

သူမရှိတော့ အသစ်ခေါ်လိုက်သူ ဟာလန်းကို ပိုသုံးဖြစ်ပါတော့တယ်။ ကျန်တာက သမိုင်းဝင်ခဲ့ပါပြီ။ စံချိန်တင် ဟာလန်းရဲ့ဂိုးများနဲ့ မန်စီးတီး ဗိုလ်စွဲတာလို့ ပြောရပါမယ်။ စတာလင်သာ ရှိနေသေးရင် အလှည့်ကျပွဲထုတ်နေရတာနဲ့ ဟာလန်း ဒီလောက် အခွင့်အရေး ရမယ်မထင်ပါ။ ဒါကြောင့်မလို့ မန်းစီးတီး ဒီနှစ် ပရီမီးယားလိဂ်မှာ ဗိုလ်စွဲအောင် လုပ်ပေးသူတွေထဲ စတာလင်ကို ထိပ်ဆုံးထားသင့်ကြောင်းပါဗျာ။ 

မျက်ခုံးဖြူငှက်ပြာခြောက် တံဆိပ်ခေါင်း၊

 

မြန်မာငှက်တံဆိပ်ခေါင်း စီးရီးစ်ရဲ့ အဌမမြောက်ခေါင်း ယနေ့ထွက်တယ်။ ငှက်နာမည် မျက်ခုံးဖြူငှက်ပြာခြောက်။ အရင်ခေါင်းတွေလိုဘဲ နိုင်ငံအမည် မြန်မာလို မပါ။ 

.

တံဆိပ်ခေါင်းတန်ဖိုးက ၂၀၀ကျပ်ပါ။ FDC နဲ့ brochure လည်းထွက်တယ်။ ၄၀၀ ကျပ်စီပါ။ ဒီနေ့ နေပြင်းလို့ထင်တယ်။ စာတိုက်မှာ လူရှင်းနေတယ်။ တံဆိပ်ခေါင်း စုသူအများစုက အသက်ကြီးပိုင်းတွေ ဖြစ်နေပြီ။ နေပူ မခံသင့်တော့။ ကျန်းမာကြပါစေလို့ ဆုတောင်းပေးပါတယ်။

.

တံဆိပ်ခေါင်းရဲ့ ပုံနှိပ်အရည်အသွေးက ထုံးစံအတိုင်းပါ။ မူလဒီဇိုင်းမှာကိုက အနီများပြီး အစိမ်းနည်းတယ်။ တံဆိပ်ခေါင်း ပုံနှိပ်တော့ ပိုနီသွားတယ်။ မူရင်းဒီဇိုင်းပုံနဲ့ ယှဥ်ကြည့်နိုင်အောင် တွဲတင်ပေးထားပါတယ်။ 

ငှက်လက်မမြီးရှည်ညို တံဆိပ်ခေါင်း၊

 မြန်မာငှက်စီးရီးစ်ရဲ့ ခုနှစ်ခေါင်းမြောက်အဖြစ် ''မြန်မာငှက်လက်မမြီးရှည်ညို'' ပုံနဲ့  တံဆိပ်ခေါင်း ထွက်တယ်။ ငှက်ရဲ့ အင်္ဂလိပ်လို အမည်က Burmese Prinia တဲ့။ ဟိုအရင်က တွေ့ထားတဲ့ ငှက်တွေဆိုတော့ မူလအမည် Burmese ဘဲ သုံးရတယ်။ Myanmar လုပ်လို့ မရ။

.

တံဆိပ်ခေါင်းက ၂၀၀ ကျပ်တန်ပါ။ FDC နဲ့ အထိမ်းအမှတ်စာစောင်လည်း ထုတ်တယ်။ တခု ၄၀၀ ကျပ်စီ။ ဒီနေ့ ရန်ကုန် စာတိုက်ကြီးကို နာရီဝက်လောက် နောက်ကျရောက်ပေမယ့် FDC ဝယ်လို့ရသေးတယ်။ ပြည်ထောင်စုနေ့က ရှေ့က လေးငါးယောက် ရောင်းအပြီး ကုန်ပြီလုပ်တာ။

.

ဖေ့ဘုတ်က Myanmar Post မှာ တံဆိပ်ခေါင်း ထွက်မယ့်အကြောင်း ကြေညာတော့ ''ဟာ ဒီတခါ တံဆိပ်ခေါင်းက အရောင်ပိုမွဲသလိုဘဲ'' လို့ ထင်မိတယ်။ အရင်ပုံတွေထက် ပိုမွဲခြောက်သလိုဘဲလို့။ ဒါပေမယ့် တံဆိပ်ခေါင်းမြင်လိုက်တော့ ပိုပို မွဲခြောက်သွားပါတယ်။ ပုံမှာ ယှဥ်ကြည့်နိုင်ပါတယ်။ 

ခေါက်ဆွဲ

 အရသာမြေပုံဆိုတဲ့ ဝက်ဆိုဒ်က ကမ္ဘာ့ အကောင်းဆုံး curry ဟင်း၃၉မျိုးရွေးတာ အများစုက အန္ဒိယနဲ့ ထိုင်းဟင်းပွဲတွေပါဘဲ။ မြန်မာဟင်း ကြက်သားဆီပြန်က နံပတ်၃၀။

.

နံပတ်တစ်က ထိုင်းဟင်းပါဘဲ။ နံပတ်သုံးကလည်း ထိုင်းမြောက်ပိုင်းမှာ နာမည်ကျော်​ေနတဲ့ ခေါက်ဆွဲပါတဲ့။ မြန်မာရဲ့ အုန်းနို့ခေါက်ဆွဲနဲ့ အတူတူပါ။  ဒါပေမယ့် ပါတဲ့အမယ်တွေမှာကြည့်ရင် ကြက်သားသာမက အမဲသား ဝက်သားတို့နဲ့လည်း ရနေပါပြီ။ ယူတုမှာကြည့်လိုက်ရတဲ့ ချင်းမိုင်က နာမည်ကြီး ခေါက်ဆွဲဆိုင်မှာ ပင်လယ်စာနဲ့ပါ ရနေပါပြီ။ နှစ်ရာချီအတွင်း မြန်မာက ပြောင်းလိုက်တာကတော့ အုန်းနို့အစား နွားနို့နဲ့ ချက်လိုက်တာရှိမယ်။

.

ဝက်ဆိုက်မှာ ဖော်ပြထားတာက ထိုင်းမြောက်ပိုင်းစာ ဆိုပေမယ့် မူရင်းကို အတိအကျ မသိပါဘူးတဲ့။ မြန်မာ လာအိုတို့မှာလည်း စားကြတော့ ဖြစ်နိုင်တာက ယူနန်ထဲက မူစလင်တရုပ်တွေဆီက ဆင်းသက်လာတာ ဖြစ်နိုင်တယ်တဲ့။ 

.

ခေါက်ဆွဲပါတဲ့အတွက် မူရင်းကတော့ တရုပ်စာဖြစ်မှာ သေချာပါတယ်။ သို့သော် ရေနဲ့ဂျုံ နယ်ထားတဲ့ dough ကြီးကို ခေါက်လိုက်ဆွဲလိုက် လုပ်လုပ်ပြီး စားလို့ရတဲ့ အမျှင်ဖြစ်အောင် လုပ်ထားတာမို့ ခေါက်ဆွဲဆိုတဲ့ အမည်ကတော့ မြန်မာအမည်ဘဲ ထင်တာပါဘဲဗျာ။

.

မကြာခင် ထိုင်းက သူတို့ရဲ့ အစားအစာ အနေနဲ့ ယူနက်စကို အသိအမှတ်ပြု မတင်ခင် ဦးအောင်နေရာယူကြည့်တာ။ 

ချိုးလင်းပြာငှက် တံဆိပ်ခေါင်း၊

 မြန်မာဒေသရင်းငှက်မျိုးစိတ်များ တံဆိပ်ခေါင်း စီးရီးအတွက် ''မြန်မာချိုးလင်းပြာ'' ပုံနဲ့ ယနေ့ထွက်တယ်။ အင်္ဂလိပ်လို Burmese Collared-dove ငှက်ပါ။ ငှက်စီးရီးရဲ့ ခြောက်ခေါင်းမြောက်ပေါ့။

.

တံဆိပ်ခေါင်းက နှစ်ရာကျပ်တန်ပါ။ FDC နဲ့ မှတ်တမ်းလွှာလည်း ထုတ်တယ်။ နှစ်ခုလုံးက လေးရာကျပ်စီပါ။ အထူးထုတ် မဟုတ်လို့လား မသိ၊ ပြည်ထောင်စုနေ့ တံဆိပ်ခေါင်းလို နည်းနည်းဘဲရောင်းပြီး ကုန်ပြီမဖြစ်ပါ။

.

Myanmar post ဖေ့ဘုတ်မှာ ဖော်ပြတဲ့ တံဆိပ်ခေါင်းပုံနဲ့ အရောင်ဘယ်လောက်ကွာလည်း သိရအောင် တွဲဖော်ပြပေးလိုက်ပါတယ်။ ကြည့်ရတာ မြန်မာငှက်တွေက ကိုယ်ရောင်ဖျောက်တဲ့ သဘောရှိကြတယ်ထင်တယ်။ 

၇၆နှစ်မြောက် ပြည်ထောင်စုနေ့ တံဆိပ်ခေါင်း

 ၇၆နှစ်မြောက် ပြည်ထောင်စုနေ့ တံဆိပ်ခေါင်းထွက်တယ်။ ၂၀ဝကျပ်တန်ပါ။ FDC ထွက်တယ်။ brochure မထုတ်ပါ။ FDC က အိပ် ၁၀၀ လောက် ရောင်းအပြီး ကုန်သွားလို့ မရကြပါ။ ရန်ကုန်စာတိုက်ကြီး အောက်အဝင်ဝမှ လမ်းဘေးရောင်းသူစီမှာ အထုပ်လိုက်တွေ့တယ်။ ပြန်မရောင်းပါ။ ကြိုတင် စာရင်းပေး ဝယ်ထားတာပါတဲ့။ ဟုတ်မှာပါလေ။

.

တံဆိပ်ခေါင်း အနားသား perforation. နေရာမှာ အဝါရောင်ပန်းဒီဇိုင်း နှိပ်ထားတယ်။ အရင်ခေါင်းတွေလို အဖြူရောင်မဟုတ်။ ဒီဇိုင်းပုံက ၇၀ ခေတ်များစီက ပို့စကဒ်ဒီဇိုင်း အဆင့်ဘဲ။ အရောင်စုံ သုံးထားသော်လည်း တောက်ပမှု မရှိပါ။ ပုံမှာ ဖေ့ဘုတ်ကပုံနဲ့ ယှဥ်ပြထားတယ်။ 

​ဗွတ်ချွဲငှက် တံဆိပ်ခေါင်း

မြန်မာဒေသရင်း ငှက်မျိုးစိတ်များ စီးရီးအတွက် ပဥ္စမမြောက် တံဆိပ်ခေါင်း ယနေ့ထုတ်ပါတယ်။ ဗွတ်ချွဲငှက် Ayeyarwady Bulbul ပုံနဲ့ပါ။ 

.

၂၀၀ ကျပ်တန်ပါ။ FDC နဲ့ brochure လည်းထုတ်တယ်။ fdc က ၄၀၀ ကျပ်ပါ။ ထုံးစံအတိုင်း ဒီဇိုင်းလှပါတယ်။ ပုံနှိပ်တာ ညံ့ပါတယ်။ ယှဥ်ကြည့်လို့ရအောင် ပုံမှာ ဒီဇိုင်းပုံပါ ထည့်ပေးထားတယ်။

.

ဒီနေ့ လူရှင်းနေတယ်။ စပ်စုကြည့်တော့ ဒီနေ့ တံဆိပ်ခေါင်းထွက်မှာ အစိုးရသတင်းစာမှာ မပါလို့ သိကြဟန်မတူဘူးတဲ့။ ဒီနေ့ထုတ် စံတော်ချိန်သတင်းစာမှာပါလို့ ပြေးလာကြသူတွေရှိတယ်။ 

.

တံဆိပ်ခေါင်း စုတယ်ဆိုတာ ခရေဇီတွေအလုပ်ပါ။ ကိုယ်စိတ်ထင်တဲ့ပုံနဲ့ စုကြလေ့ရှိတယ်။ အရင်ကတယောက် တွေ့ဘူးတာက တံဆိပ်ခေါင်း ထွက်မယ့်အကြောင်းပါတဲ့ သတင်းစာဖြတ်ယူလာပြီး တံဆိပ်ခေါင်းကပ် တုံးထုခိုင်းတဲ့သူ တွေ့ဘူးတယ်။ ဒီလူတွေတော့ ဂွဘဲ။ အစဥ်အလာ ပျက်တော့မယ်။

သက်ရှင်နေ၊

 ဟို လွန်ခဲ့တဲ့ နှစ်နှစ်ဆယ်လောက်က တရုပ်ရုပ်ရှင် To Live ကို ကြည့်ဘူးကြမှာပါ။ တရုပ်ပြည် ယဥ်ကျေးမှုတော်လှန်ရေးအချိန် ဒုက္ခရောက်ကြပုံကို ရိုက်ထားတာလို့ မှတ်မိတာဘဲ။ နာမည်အတော် ကြီးခဲ့တာပါ။ ငတ်နေတာကြာပြီဖြစ်တဲ့ ပရော်ဖက်ဆာတယောက် တော်လှန်ရေးအပြီး ပေါက်စီတွေ အငမ်းမရစားလို့ စားပို့နင့်သေတာ ဒီကားထဲထင်တာဘဲ။ ကြာတော့ မမှတ်မိ။

.

အခု "သက်ရှင်နေ'' ဆိုတဲ့ ဝတ္ထုက အဲဒီရုပ်ရှင်ရဲ့ မူရင်းဝတ္ထုတဲ့။ စားပို့နင့်သေတာ ဝတ္ထုထဲမှာ ပရော်ဖက်ဆာမဟုတ်ဘဲ ဇတ်ဆောင်တယောက်တော့ ဖြစ်နေတယ်။ ဒါမျိုးက ဝတ္ထုကနေ ရုပ်ရှင်ပြောင်းရင် ဖြစ်တတ်တာပါဘဲ။

.

မူရင်း တရုပ်ဝတ္ထုကနေ တိုက်ရိုက်ပြန်တာတဲ့။ ဒီဆရာပြန်တာ ဖတ်ဖူးတာ ဒါသုံးအုပ်မြောက် ထင်တယ်။ အားလုံးဖတ်ကောင်းတယ်။ ဇတ်လမ်း ဆန်းတယ်။ အားလုံး တရုပ်ပြည်နောက်ခံဆိုတော့ ဆန်းတာပေါ့။ အမှာစာအရ မူရင်းဝတ္ထုက တရုပ်ပြည်မှာလည်း ပေါက်သတဲ့။ 

.

 ဇတ်လမ်းကတော့ ၁၉၄၀ကနေ ၈၀လောက်အတွင်း ဖြစ်ခဲ့တာတဲ့။ တရုပ်ပြည် ယဥ်ကျေးမှုတော်လှန်ရေးအချိန်မှာ ဒုက္ခရောက်တဲ့ ဖြစ်ပုံတွေပါတယ်။ ဒါပေမယ့် ဇတ်ပြန်ပြောပြတဲ့ တရုပ်အဖိုးကြီးက တော်လှန်ရေးမစခင်ကတည်းက မွဲနေပါပြီ။ မွဲနေလို့သာ တော်လှန်ချိန်မှာ ရှင်ကျန်ခဲ့ပြီး ဒီဇတ်ကို ပြန်ပြောနိုင်တာ။ မွေးတုံးက သူဌေးသား။ တရုပ်ပြည်မှာ သားဦးသဌေးသား ဘယ်လိုနေ တယ်ကအစ ဇတ်လမ်းအတွက် အထောက်အကူ။

.

''To live'' ကို ဘာသာပြန်ရင် ''အသက်ရှင်နေဖို့'' လို့ ပြန်ရမယ်ထင်တယ်။ စာရေးဆရာက အစအဆုံး နှစ်လုံးဖြုတ်ပြီး အမည်ပေးထားပေမယ့် ဇတ်လမ်းနဲ့ လိုက်ဖက်လှပါတယ်။ ရေးသားပုံ၊ စကားလုံးသုံးပုံ ကောင်းတယ်။ အဲဒီအချိန်က တရုပ်ပြည်မှာ အသက်ရှင်ဖို့ ဘယ်လောက်ခက်လည်း ကွင်းကွင်ကွက်ကွက် မြင်ရတယ်။

.

ယဥ်ကျေးမှုတော်လှန်ရေးအတွင်း ဘယ်လို ဆင်းရဲကြပ်တည်းကြခဲ့တယ်ဆိုတာ သတင်းတွေမှာ ကြားသိခဲ့ဖူးပြီးသားပါ။ ဒါပေမယ့် ဝတ္ထုဇတ်လမ်းအနေနဲ့ ရေးပြတာဆိုတော့ ပိုမြင်လွယ် ပိုမှတ်မိပြီး ပိုနာကျည်းစေပါတယ်။ ဒါကြောင့်လည်း နိုင်ငံသားတွေကို ဒုက္ခပေးလေ့ရှိတဲ့ အစိုးရတွေက အနုပညာရှင်ဆို ကဗျာဆရာကအစ မကြိုက်ကြတာ ထင်ပါရဲ့။ 

.

အချို့နေရာလေးတွေမှာ တင်စားတာ၊ စာလုံးသုံးတာတွေ ကောင်းတာ တရုပ်ဘာသာကနေ တိုက်ရိုက်ပြန်နိုင်လို့လို့ ထင်တာဘဲ။ ဖတ်ကြည့်ကြပါလား။

မြန်မာဘီလုံးငှက် တံဆိပ်ခေါင်း

 

မြန်မာဒေသရင်း ငှက်မျိုးစိတ်များ တံဆိပ်ခေါင်း စီးရီးအတွက် မြန်မာဘီလုံးငှက်ပုံနဲ့ တံဆိပ်ခေါင်းထွက်တယ်။ ၂၀၀ ကျပ်တန်။ FDC နဲ့ brochure လည်းထုတ်တယ်။ နှစ်ရက်ဆက် တံဆိပ်ခေါင်းထုတ်လို့လား မသိဘူး။ FDC တွေ မနေ့ကဟာပါ ကျန်နေတယ်။
.
စီးရီးထုံးစံအတိုင်း နိုင်ငံနာမည် မြန်မာလို မပါဘူး။ ဒီဇိုင်းက ကောင်းပေမယ့် ပုံနှိပ်တာညံ့တော့ အရောင်မထွက်ဘူး။ မြန်မာစာတိုက်ရဲ့ ဖေ့ဘုတ်မှာ ဖော်ပြထားတဲ့ တံဆိပ်ခေါင်းပုံနဲ့ ယှဥ်ကြည့်နိုင်အောင် FDC ပေါ်မှာ တင်ပေးထားတယ်။ ၁၉၇၀ ကျော်ကတည်းက ရှိခဲ့တဲ့ ဝါဇီမှာဘဲ ပုံနှိပ်နေတုံးလားမသိ။ မှတ်တမ်းလွှာအရ ပုံနှိပ်နေရာက Security Printing Work လို့ ဖော်ပြထားတယ်။
.
တခုသတိထားမိတာက ငှက်အမည် မြန်မာလို မြန်မာဘီလုံးကို အင်္ဂလိပ်လို Burmese Bushlark လို့ဘဲ ခေါ်ထားတယ်။ Myanmar Bushlark ၊ Myanmese Bushlark လုပ်လို့မရဘူးဘဲ။ မျိုးချစ်စိတ်ထက်သန်တဲ့ ခေါင်းဆောင်ဟောင်းကြီးတွေ သိရင် လက်ခံပါ့မလား မသိ။

စိန်ရတုလွတ်လပ်ရေးနေ့ တံဆိပ်ခေါင်း

 ၇၅ နှစ်မြောက် စိန်ရတု လွတ်လပ်ရေးနေ့ အထိမ်းအမှတ်အဖြစ် ရဋ္ဌနန္ဒကဆင်ဖြူတော်ပုံဖြင့် တံဆိပ်ခေါင်းထုတ်တယ်။ များသောအားဖြင့် သုံးခေါင်းထုတ်သော်လည်း ဤတကြိမ်မှာ တခေါင်းဘဲ ထုတ်ပါတယ်။ ၂၀ဝ ကျပ်တန်ဖြစ်ပြီး FDC နဲ့ brochure ပါထုတ်ပါတယ်။ ၄၀၀ ကျပ်စီပါ။

.

တံဆိပ်ခေါင်းထုတ်မယ့်အကြောင်း Myanmar Post facebook မှာ ပို့စ်တင်တော့ အရောင်မွဲခြောက်ခြောက်နဲ့၊ လန့်သွားတယ်။ အရင် ငှက်စီးရီးမှာ ဖေ့ဘုတ်မှာ အရောင်အရမ်းစိုပြီး လှနေတာတောင် တကယ့်တံဆိပ်ခေါင်းကျ မွဲနေတာကိုး။ အခုလို ပုံမှာမွဲခြောက်နေရင် တံဆိပ်ခေါင်းက ဖြူပတ်ဖြူရော်များ ဖြစ်နေမလားပေါ့။ တော်သေးတယ်၊ ပုံထဲကထက် ပိုမွဲမခြောက်သွားပါ။

.

ဒီဇိုင်းက ပညာရှင် မအပ်လို့ထင်တယ်။ မမိုက်ဘူး။ ဆင်ဖြူတော်က သိတ်မဖြူဘူး။ ပြီးတော့ လေထဲမြောက်နေသလိုပုံ ပေါက်နေတော့ တောင်ကြီးမှာလုပ်လေ့ရှိတဲ့ မီးပုံးပျံဆင်ရုပ်လိုလို၊ ကျောက်ဆည်မှာ လုပ်လေ့ရှိတဲ့ ဆင်ကတဲ့ အရုပ်လိုလို ဖြစ်နေတယ်။ လေထဲမြောက်တာမှ နောက်ခံအဆောက်အဦး အမိုးနဲ့လယ်ဗယ်ဖြစ်နေသလိုဘဲ။ 

.

ဒီတခါ တံဆိပ်ခေါင်းမှာ နိုင်ငံအမည် အင်္ဂလိပ်လိုရော မြန်မာလိုရော ပါလာပြီ။ တံဆိပ်ခေါင်းမှာရော၊ FDC မှာရော၊ brochure မှာရော ဆင်ပုံ တပုံထဲသုံးထားပါတယ်။ ရဋ္ဌနန္ဒက အဓိပ္ပါယ်က (တိုင်းပြည်က ချစ်ခင်မြတ်နိုး၍ နိုင်ငံတော်၏ သာယာဝပြော ပျော်ရွှင်ခြင်းကို ဆောင်ကြဥ်းပေးမည့် ဆင်ဖြူရတနာ) လို့ ဖော်ပြထားတယ်။ ဆင်ကြောင့် တိုင်းပြည်ချမ်းသာမယ်ဆိုတာ ဥာဏ်မမှီ စဥ်းစားမတတ်ကြောင်းပါ။