ဝူဟန်ကိုဗစ် ဒီဇင်ဘာ နှစ်ဆယ့်ခြောက်၊

 

ကမ္ဘာမှာ ဝူနာ သန်း၈၀ ကျော်ခဲ့ပြီ။ တနေ့ ခြောက်သိန်းကျော် တိုးနေဆဲ။တနေ့ တသောင်းခန့် သေနေဆဲ။ ဝူနာ ဆယ်သန်းကျော်တာ ၂နိုင်ငံ၊  နှစ်သန်းကျော်တာ၆ နိုင်ငံ၊ တသန်းကျော်တာ ၉ နိုင်ငံရှိပြီ။ လူဦးရေ နည်းတဲ့နိုင်ငံတွေ ပိုခံရတာပေါ့။ မြန်မာ အပါအဝင် တသိန်းကျော်တဲ့နိုင်ငံ ၅၈။

.

လက်ရှိအဆိုးဆုံးက ဗြိတိန်ရဲ့ အင်္ဂလန်။ မနေ့က လေးသောင်းနီးပါးတိုးသတဲ့။ သေသူတွေထဲမှာ ဝူမျိုးစိတ်သစ် ပါတယ်လို့ ပြောကြပေမယ့် စမ်းသတ်နေကြတုံးပါ။ ခန့်မှန်းတာက အင်္ဂလန်မှာ လူ၈၄ယောက်ကို ဝူတယောက်၊ ဝေလနယ်မှာ ၉၀ကို လူတယောက်၊ စကော့တလန်နဲ့ မြောက်အိုင်ယာလန်မှာတော့ လူနှစ်ရာနီးပါးမှ တယောက်ပါတဲ့။ လူအတော်များများ ကာကွယ်ဆေး ထိုးပြီးလာပါပြီ။

.

ကာကွယ်ဆေး နှစ်မျိုးဘဲ အနောက်နိုင်ငံတွေ အသိအမှတ်ပြုသေးတယ်။ မြန်မာတွေနဲ့နီးစပ်တဲ့ အောက်စဖို့ထုတ် အက်စတြာဇနက္က ​ဆေးက ဒီတပတ်အတွင်း ရဖို့ရှိတယ်တဲ့။ ရမှာသေချာလို့ သန်းချီထုတ်ထားတော့ ရတာနဲ့ထိုးဖို့ အသင့်ဖြစ်မှာပါ။

.

တရုပ်ကာကွယ်ဆေး တမျိုးကို တူရကီ ဘာရိန်းနဲ့ ဘရာဇီးမှာစမ်းတယ်။ တူရကီမှာ ၉၀% အထိ ထိရောက်တယ် ကြေ ငြာပါတယ်။ ဘရာဇီးမှာစမ်းတာ မထိရောက်ဘူး၊ အလကားဘဲလို့ သမတကိုယ်တိုင် ပြောနေတာ တီဗီမှာတွေ့လိုက်တယ်။ ေဈးပေါမှာ သေချာတဲ့ဆေးပါ။ ထိရောက်ဖို့ဘဲ လိုတယ်။

.

ကမ္ဘာမှာ ဝူတိုးနေဆဲပေမယ့် မြန်ပြည်မှာ သိသိသာသာ ကျတာ တပတ်ရှိလာပြီ။ Qစင်တာတချို့ ပိတ်လိုက်သလို ကျန်နေရာတွေမှာလည်း နေရာလွတ်တွေ များလာပြီတဲ့။ ပေါ့လို့ မဖြစ်သေးပါ။ ဒီလိုကျလာတာ လူအများစု မတ်စ်တပ်လာလို့ပါ။ စာရင်းအရ ဝူနာ တသောင်းခုနှစ်ထောင့်ခန့် ဆေးရုံတွေ စင်တာတွေမှာ ရှိနေတုံးပါ။ 

.

လူအများကြား ရောဂါပီးသွားဖို့က လူဦးရေရဲ့  ၇၀%ကနေ ၉၀% ကြား ပီးဖို့လိုသတဲ့။ ကမ္ဘာမှာ ခုမှ လူတရာ ဝူတယောက် မရှိသေးဘူး။ သေခဲ့တာက ၁၇သိန်းရှိပြီ။ ဒီနှုံးနဲ့ ရောဂါပီးတဲ့အထိ ကြာလို့မဖြစ်ဘူး။ ကာကွယ်ဆေး အရင်ဦးမှဖြစ်မယ်။ 

.

ကာကွယ်ဆေးကလည်း သက်တမ်းဘယ်လောက်ကြာ ခံမယ် မပြောနိုင်သေးဘူး။ ဒီ ကိုဗစ်က ကမ္ဘာပေါ် အမြဲရှိနေတော့မှာတဲ့။ အားပျော့ပြီး ငြိမ်နေချိန်တော့ ရှိမှာပေါ့။ အားကောင်းလာတဲ့အချိန် ပြန်ဒုက္ခပေးမှာဘဲ။ 

.

ဒီတော့ နယူးနော်မယ်ဆိုတဲ့ လူနေမှုပုံစံအသစ်ကို ယဥ်ပါးဖို့လိုပြီ။ လူအများကြား မလိုအပ်ဘဲ မသွားပါနဲ့။ အပြင်ထွက်ရင် မတ်စ်တပ်ပါ။ အိမ်ပြန်လာတိုင်း လက်ဆေးပါ။ ဒါတွေက အခြေခံပါဘဲ။

.

ဝူဟန်ဘေးကင်းကြပါစေ။

ပန်းယွန်း နဲ့ ပန်းချီ၊

 

ပန်းဆယ်မျိုးစီးရီးရဲ့ နောက်ဆုံးနှစ်မျိုး ပန်းယွန်းနဲ့ ပန်းချီ တံဆိပ်ခေါင်း နှစ်ခေါင်းထွက်တယ်။ နှစ်ရာကျပ်တန်တွေပါဘဲ။ FDC နှစ်မျိုးလည်းထွက်တယ်။

.

မြန်မာပြည်အတွက် ဒုတိယစီးရီးစ်တော့ ပြီးသွားပြီ။ တံဆိပ်ခေါင်းတွေက စီးရီးစ်လည်း ပီသတယ်။ ဒီဇိုင်းတွေလည်း ကောင်းပါတယ်။ နောက်ထပ်လည်း ထုတ်ဦးမယ်လို့ မျှော်လင့်ပါတယ်။

.

လိုနေတာက ပုံနှိပ်တာဘဲ။ တံဆိပ်ခေါင်းတွေမှာ ရွေ့နေတာတွေ၊ အရောင်မမှန်တာတွေ တွေ့နေရတယ်။ ဒီဇိုင်းမှာ အရောင်ထွက် တောက်ပနေပေမယ့် တံဆိပ်ခေါင်းက မွဲနေတတ်တယ်။ နောက်က ကော်မပါဘူး။ ဒါမျိုးတွေကို ပြောင်းလဲပစ်ဖို့ တံဆိပ်ခေါင်းပုံနှိပ်စက် ပြောင်းဖို့လိုနေပါပြီ။ လွန်ခဲ့တဲ့နှစ်လေးဆယ်ကအတိုင်း တံဆိပ်ခေါင်းထုတ်နေတုံးဘဲ။ 

59

 

ဝူဟန်ကိုဗစ် ဒီဇင်ဘာ ဆယ့်နှစ်၊

 

ဝူဟန်ကိုဗစ် ဒီဇင်ဘာ ဆယ့်နှစ်၊

.

ဝူဟန်ကိုဗစ် အရေးက ကမ္ဘာကြီးကို ချိန်းခြောက်ဆဲ။ တရက်ကို ခြောက်သိန်းကျော်တိုးနေဆဲ။ လွန်ခဲ့သောလက တရက်ခုနှစ်သိန်း တိုးနေတာနဲ့ယှဥ်ရင် ကျလာတယ်ပြောလို့ရပေမယ့် အချိန်မရွေး ထိုးတက်နိုင်သေးသည်။ လူဦးရေများတဲ့ ကမ္ဘာ့မြောက်ခြမ်းမှာ ဆောင်းရာသီမဟုတ်ပါလား။

.

ကမ္ဘာမှာ ဝူနာ ၇၁သန်းကျော်ပြီ၊ သေဆုံးသူ တသန်းခြောက်သိန်းကျော်ပြီ။ ပြန်ကောင်းသူ သန်းငါးဆယ်ခန့်။ ဒီတော့ လူနာသန်းနှစ်ဆယ်ခန့် ရှိနေတဲ့သဘော။ ရောဂါပြင်းထန်မှ ဆေးရုံတက်သည့်တိုင် ဒီကိန်းဂဏန်းအရ ဆေးရုံတွေပြည့်ကုန်တာ အံ့ဩစရာမရှိတော့။

.

အမေရိကားမှာ ဝူနာ၁၆သန်းကျော်ပြီ၊ သေဆုံးသူ ၃သိန်းကျော်ပြီဖြစ်ရာ ဒုတိယကမ္ဘာစစ်မှာ သေဆုံးတဲ့ အမေရိကန်ထက် များနေပြီဟုဖတ်လိုက်ရသည်။ မနေ့က ဝူနာ နှစ်သိန်းလေးသောင်းကျော်တိုးသသည်။ ၃းေ​ထာင်ေ​ကျာ် ေ​သသည်။။ တရက်နှစ်သိန်းကျော်တိုးနေတာ နှစ်ပတ်မကတော့ပြီ။ သမတရာထူးမှ ထွက်ရတော့မည့် ဒေါ်နွယ်ထွမ်းစွတ်စွဲသလိုသာ တရုပ်တို့ရဲ့ဇီဝလက်နက်ဆိုလျှင် အမေရိကန်တို့ အရှုံးကြီးရှုံးခဲ့လေပြီ။

.

အနောက်ဥရောပမှာလည်း ဝူနှုန်းများမကျသေး။ ပုံစံမျိုးစုံနဲ့ လော့ဒေါင်းများ အဝူအဖြစ်များသည့်နေရာတွေကို လုပ်နေရဆဲ။ လာတော့မည့် ရက်အားရာသီ ခရစ်စမတ်နဲ့ နှစ်ကူးချိန်များအတွက် တာဝန်ရှိသူတွေ တွေးပူနေသည်။ WHOညွှန်ချုပ်က ထိုပွဲများအတွက် မိမိတို့ရဲ့ မိသားစုအစီအစဥ်တွေကို ပြန်စဥ်းစားကြဖို့ ဆော်အောနေပြီ။ ပျော်စရာတွေကနေ စိတ်မကောင်းစရာတွေ ဖြစ်သွားနိုင်သည်လေ။ စီးပွားအတော်ဖြစ်ဟန်ရှိသည့် နှင်းလျောစီး စခန်းများကိုပင် နောက်လလယ်လောက်မှ ဖွင့်ဖို့စီစဥ်နေကြရသည်။

.

ကမ္ဘာ့ဝူနာပြဇယားအရ သန်းကျော်သည့်နိုင်ငံ ၁၅နိုင်ငံရှိပြီ။ သိန်းချီတဲ့နိုင်ငံ ၇ဝနိုင်ငံရှိရာ မြန်ပြည်က ၆၉။  စဖြစ်တဲ့ ရွှေတရုပ်ပြည်က ၇၉အထိကျသွားပြီဖြစ်ရာ လူဦးရေနဲ့ယှဥ်ကြည့်ရင် ဆဲစရာအမှန်ပင် ဖြစ်နေပြီ။

.

မြန်ပြည်တွင်တော့ အရေအတွက် အရမ်းတိုးလာတာ မရှိ။ အဖြစ်များသည့် လူနေထူထပ်ရန်ကုန်မှာ ဝူနှုန်းနည်းလာပေမယ့် နယ်မြို့ကြီးများတွင် စဖြစ်လာတာ သတိထားမိသည်။ မနေ့က စစ်ကိုင်း ရွှေဘိုနဲ့ ကလေးတို့တွင် လော့ဒေါင်းလုပ်မတဲ့။ လော့ဒေါင်းတပတ်ပြည့်ပြီဖြစ်သော မန္တလေးဆို နေ့စဥ်နှစ်ရာကျော်နေတာ တပတ်ခန့်ရှိပြီ။ အစပိုင်းလော့ဒေါင်း ဟုတ်မလိုရှိသော်လည်း နောက်ပိုင်းဗမာပီပီ လစ်ဟာမှုတွေကြားနေရပါပြီ။

.

ဆေးကိုတော့ လူသားတိုင်း ကမ္ဘာဦးမိုးမျှော်သလို မျှော်နေကြပြီ။ ဗြိတိန်တနိုင်ငံတည်း အသိအမှတ်ပြုသေးသည်။ အမေရိကန်က တနင်္ဂနွေလောက်မှ အတည်ပြုမည်ဟု ယူဆနေကြသည်။ မြန်မာပြည်နဲ့လိုက်ဖက်မယ့် အောက်စဖို့ဆေးကို ဘယ်နိုင်ငံကမှ အသိအမှတ်မပြုသေး။ 

.

အမေစုရဲ့ တီဗီမိန့်ခွန်းအရ ဆေးရအောင် နည်းမျိုးစုံစီစဥ်ထားကြောင်း သိလိုက်ရသည်။ COVAX မှ ရဖို့လုပ်ထားသလို ဝယ်ယူဖို့လည်း စီစဥ်ထားပြီ။ ငွေတတ်နိုင်သူတွေက ဆေးဝယ်ထိုးကြမှသေချာသည်။ ဆေးအတွက် မြန်မာတွေအလှူ လက်မနှေးမှာလည်းသေချာတော့ ငွေအတွက်မပူဘဲ ဆေးရဖို့သာ ပူမိပါသည်။

.

ဒီကြားထဲ မဝူအောင်တော့ ဂရုစိုက်ကြပါတဲ့။.အမေစုက မေတ္တာနဲ့ထိန်းနေသော်လည်း တချို့က ဒုတ်ကလေးနဲ့ ဆုံးမစေချင်နေပြီ။ မြန်မာ မြန်မာချင်း သိနေတယ်လေ။ ဒီတော့ ကျန်နေတဲ့ရက်အတွင်း စည်းကမ်းရှိသူတွေက ဆက်ထိန်းကြပါ။ မရှိသူတွေကိုလည်း စိတ်ဆိုးမနေကြပါနဲ့တော့။ မသိချင်ယောင်သာ ဆောင်နေလိုက်ပါတော့ဗျာ။

.

ဝူဟန်ဘေးကင်းဝေးကြပါစေ။ 

.

ဝူဟန်ကိုဗစ် ဒီဇင်ဘာ ငါး

ဝူဟန်ကိုဗစ် ဒီဇင်ဘာ ငါး၊

.

ကမ္ဘာမှာ ဝူနာ ၆၆သန်း ကျော်သွားပြီ။ တနေ့ကို ၆သိန်းကျော် ဆက်တိုက်တိုးနေတဲ့နေ့တွေ များနေပြီ။ အမေရိကားမှာ တနေ့ကို နှစ်သိန်းတိုးတာ နှစ်ရက်ဆက်ပြီ။ ဆေးရုံတက်သူတွေလည်း စံချိန်တင် များနေပြီတဲ့။ ကမ္ဘာမှာ သေဆုံးသူလည်း ပျှမ်းမျှ ခြောက်ထောင်ကျော် ရှိနေတယ်။ ပုံတွေမှာ ကြည့်လိုက်။ 

.

နိုင်ငံတိုင်းလည်း ပုံစံမျိုးစုံနဲ့ ထိန်းချုပ်ဖို့ ကြိုးစားနေတာဘဲ။ အင်္ဂလန်မှာလည်း အဆင့်သုံးဆင့်နဲ့ လုပ်နေရတုံး။ ဂျာမဏီမှာ တားမြစ်ချက်တွေ ဇန်နဝါရီအထိ တိုးရပြီ။  ဂျပန်မှာ တိုကျိုလိုဘဲ အိုဆာကာမှာပါ ဝူနာများလာလို့ အပြင်မထွက်ကြဖို့ ပန်ကြားနေရပြီ။ ကိုရီးယားမှာလည်း တင်းကြပ်နေရတယ်။ သေချာတာကတော့ ကွန်မြူနစ်ဝူဟန်လိုတော့ ဘယ်မှာမှ မထိန်းချုပ်နိုင်ပါ။

.

ကမ္ဘာ့မြောက်ခြမ်းမှာ ဆောင်းရာသီဆိုတော့ ပုံမှန်ဖျားနာမှုတွေ ရှိနေနိုင်တယ်။ ခရစ်စမတ်နဲ့ နှစ်ကူးပွဲတွေ နွှဲဖို့စောင့်နေသူတွေကလည်း အများသားကလား။ သက်ဆိုင်ရာအစိုးရတွေနဲ့ ကျန်းဝန်ထမ်းတွေကတော့ ဘုရားတပြီး နိုင်သလောက် လုပ်နေရမှာပါ။

.

မတွေ့တာ ကြာပြီဖြစ်တဲ့ WHO ညွှန်ချုပ်ကြီးက ဆေးတွေ့တာ သတင်းကောင်းပေမယ့် ဒီကပ်ကြီးပြီးသွားတာ မဟုတ်ပါတဲ့။ (ဆဲသံနဲ့ ဟ ဟ များ)  ဗြိတိန်က ကျန်းမာရေးဌာန တာဝန်ရှိသူတဦးက ဝူဟန်ကိုဗစ် ဗိုင်းရပ်စ်သည် လူသားတွေနဲ့ အမြဲရှိနေမယ့်သဘောလို့ ပြောပါတယ်။ အခြားဗိုင်းရပ်စ်တွေလို အချိန်တခုမှာ ပျောက်မယ်လို့ ထင်ဟန်မရှိဘူး။ ကာကွယ်ဆေး သေချာကို ထိုးကြရမှာ။

.

ကာကွယ်ဆေးတွေ့တဲ့ Pfizer ကလည်း နှစ်မကုန်ခင် ဆေးသန်းတရာ မထုတ်နိုင်တော့ဘဲ ငါးဆယ်ဘဲ ထုတ်နိုင်မယ်တဲ့။ ဆေးထုတ်နိုင်တောင် သယ်ဖို့သိမ်းဖို့ ခက်ပါသေးတယ်။ အောက်စဖို့ဆေးလို ရေခဲဗူးလောက်နဲ့သယ်နိုင်မှ ကမ္ဘာမှာ အလုပ်ဖြစ်မှာ။ မြန်မာပြည်အတွက် အစောဆုံး သင်္ကြန်ပြီးမှဘဲထင်တယ်။

.

ဝူဇယားမှာ မြန်မာက ၆၈ ရောက်နေပြီ။ ကမ္ဘာမှာ ဝူနာ သန်းချီတဲ့နိုင်ငံ ၁၄နိုင်ငံရှိပြီ။ သိန်းချီတဲ့နိုင်ငံ ၆၇နိုင်ငံ။ နောက်သုံးလေးရက်မှာ မြန်မာက ၆၈နိုင်ငံမြောက် သိန်းချီပါလိမ့်မယ်။ 

.

ဝူနာစာရင်းတွေဘဲ ပြောနေလို့ ပြန်ကောင်းသူ မရှိဘူးလား မဟုတ်ပါ။ ပြန်ကောင်းသူလည်း ကမ္ဘာမှာ ၄၅သန်း ကျော်ပါပြီ။ ဝူဖြစ်ပြီး စာရင်းပိတ်လိုက်ရသူ ၃%ကတော့ သေဆုံးလို့ ပိတ်ရတာပါ။ မနေ့က သတင်းတခုမှာ အသက်၉၉နှစ်ရှိ ခရုိအေးရှားသူကြီး ပြန်နေကောင်းတာ တွေ့တယ်။ စိတ်ဓာတ်မကျဘဲ မိမိကိုယ်ကိုယ် ဂရုစိုက်ရင် ဝူဖြစ်တောင် ကျော်ဖြတ်နိုင်မှာပါ။

.

အကောင်းဆုံးကတော့ မဝူအောင် နေတာဘဲပေါ့။ မလိုအပ်ဘဲ အပြင်မထွက်နဲ့။ အပြင်ထွက်တိုင်း မတ်စ်တပ်ပါ။ လူအများကို တတ်နိုင်သမျှ ​​ေရှာင်ပါ။ အပြင်ကပြန်လာတိုင်း လက်ဆေးပါ။ ပြင်ပပစ္စည်းတွေ ထိတွေ့ပြီးတိုင်း လက်ဆေးပါ။  ကာကွယ်ဆေးက သိတ်မဝေးတော့ပါ။ ဒီအတောအတွင်း ပိုဂရုပြုကြပါ။

.

ဝူဟန်ဘေးကင်းဝေးကြပါစေ။ 



 

၇၅နှစ်ပြည့် ကုလတံဆိ​ပ်ခေါင်း

 

ကုလသမဂ္ဂ ၇၅ နှစ်ပြည့် အထိမ်းအမှတ် တံဆိပ်ခေါင်းထွက်ပါတယ်။ ၂၀၀ကျပ်တန်ပါ။ တကမ္ဘာလုံးရှိ ကုလသမဂ္ဂဝင်နိုင်ငံတွေလည်း ထုတ်ကြဟန်ရှိတယ်။ နိုင်ငံအသီးသီးက ကုလတံဆိပ်ခေါင်း စုဆောင်းသူတွေအတွက်လည်း ရည်ရွယ်ဟန်ရှိတယ်။ ဒီဇိုင်းမှာ မြန်မာလို တလုံးမှမပါပါ။ ကိစ္စမရှိပါ။ ကမ္ဘာနဲ့ပတ်သက်လို့ထုတ်တဲ့ အထိမ်းအမှတ် တံဆိပ်ခေါင်းဘဲ။ FDCလည်း ထုတ်ဝေပြီး နှစ်ရာကျပ်ပါဘဲ။

.

မြန်မာ့စာပို့လုပ်ငန်းက မနှစ်ကစပြီး တံဆိပ်ခေါင်းတွေ တိုးထုတ်လာတယ်။ စုဆောင်းသူတွေအနေနဲ့ ကြိုဆိုပါတယ်။ နောက်နှစ်များမှာလည်း ခေါင်းစဥ်စုံအောင်ထုတ်ဖို့ အကြံပြုချင်ပါတယ်။ တချို့ကိစ္စတွေမှာ အရင်ခေတ်ဟောင်းက လုပ်ကိုင်ပုံတွေကို စွန့်လွှတ်ပြီး လမ်းသစ်စလျောက်ဖို့လည်း တိုက်တွန်းချင်ပါတယ်။

.

ပထမအချက်က တံဆိပ်ခေါင်းဒီဇိုင်းတွေ ပြိုင်ပွဲလုပ် အသုံးပြုစေချင်တယ်။ ပိုစတာပုံ တံဆိပ်ခေါင်းတွေ အသုံးပြုနေတာ နှစ်တွေများခဲ့ပြီ။ ဆုကြေးငွေများစွာ မချီးမြင့်နိုင်သည့်တိုင် အသိအမှတ်ပြုလက်မှတ် ပေးရင်ကို ပြိုင်မယ့်ဝါသနာရှင်တွေ ရှိနိုင်ပါတယ်။ ဒီဇိုင်းအသစ်တွေ မြင်လာရနိုင်တဲ့အပြင် တံဆိပ်ခေါင်းလောက အပြင်ကလူတွေကိုပါ စိတ်ဝင်စားစေလိမ့်မယ် ထင်မိတယ်။ 

.

နောက်တချက်က ပုံနှိပ်စံနစ် ပြောင်းသင့်ပါပြီ။ ကြည့်ရတာ ခုအချိန်အထိ မဆလခေတ်ကတည်းက သုံးခဲ့တဲ့ ဝါဇီစက်ရုံမှာဘဲ ရိုက်နေတုံးလားမသိ။ စက္ကူအသားက ညံ့၊ နောက်ဖက်မှာ ကော်က မပါ၊ ခွေးသွားစိတ်တွေ မပေါက်တာတွေ တွေ့နေရပြီ။ တံဆိပ်ခေါင်းအသစ်ထွက်မယ် ကြေညာတဲ့ပုံမှာ တံဆိပ်ခေါင်းက လှနေသလောက် အပြင်မှာမြင်လိုက်ရင် မွဲခြောက်လို့။

.

အခြားနိုင်ငံတွေမှာ တံဆိပ်ခေါင်းလေးတွေက တောက်ပြောင်နေတာပါ။ ဝယ်သိမ်းထားချင်စရာ ကောင်းနေတာပါ။ ပုံစံတွေဆိုလည်း မျိုးစုံ။  စတစ်ကာအသားအပြင် ပလပ်စတစ်၊ သစ်သား စသဖြင့် ပစ္စည်းမျိုးစုံ တံဆိပ်ခေါင်းထုတ်ဖို့ သုံးနေကြပါပြီ။ 

.

အဓိကကတော့ တံဆိပ်ခေါင်းထုတ်ဖို့ တာဝန်ရှိသူတွေ စိတ်ဝင်စားဖို့ပါဘဲ။ ဒီခေတ်ကြီးမှာ အင်တာနက်ပေါ်  တချက်လောက်တက်ကြည့်ရင်ကို တော်တော်သိနိုင်ပါပြီ။ အခုလို အသစ်တွေတိုးလုပ်နေချိန်မှာ အပစ်တင်တာမဟုတ်ဘဲ ပိုကောင်းလာအောင် အကြံပေးတာသာ ဖြစ်ပါတယ်။ မြန်မာပြည် တံဆိပ်ခေါင်းစု ဝါသနာရှင်တွေဆီကနေ အကြံဉာဏ်တောင်းရင်လည်း ပိုပြည့်စုံတာတွေ သိလာနိုင်မယ် ထင်ကြောင်းပါခင်ဗျာ။

.

၂၀၂၁မှစ ပိုမိုကောင်းမွန်သော တံဆိပ်ခေါင်းများကို မျှော်လင့်လျှက်။     ။