ဘောလုံးဘုရင် ပီလီ

 ကမ္ဘာကျော် ဘရာဇီး ဘောလုံးဘုရင် ပီလီ ကွယ်လွန်သွားပါပြီတဲ့။ ပီလီဟာ ကမ္ဘာ့ဖလား သုံးကြိမ်ရဘူးတဲ့ တဦးတည်းသော ဘောသမားပါ။

.

ပထမအကြိမ်ရတော့ ၁၇ နှစ်သာ ရှိသေးပါသတဲ့။ ကျနော်စသိတဲ့ ၇၀ဝါးကပ်မှာ တတိယအကြိမ်ရပြီး အရမ်းနာမည်ကြီးနေပါပြီ။ ကျနော်တို့ ဘောလုံးကန်တတ်စက ဘောကန်ကောင်းရင် ပီလီလို့ ခေါ်ကြတဲ့အထိပါဘဲ။ 

.

သူ့အကြောင်း သတင်းစာနဲ့ အားကစားဂျာနယ်လောက်ကဘဲ မြင်ဘူးတာပါ။ ဂျာနယ်နည်းသေးသလို မဝယ်နိုင်လို့ ဆံပင်ညှပ်ဆိုင်လို နေရမှာတွေ့မှ ဖတ်ရတာပါ။ ရက်လွန်သတင်းတွေပေါ့။

.

နှစ်အနည်းငယ်ကြာတော့ ရုပ်ရှင် the world at their feet မြန်မာပြည်မှာ ရုံတင်တယ်။ ဇတ်လမ်းက ဘောရူး ကောင်ငယ်လေးတယောက် သူအားကျတဲ့ ကမ္ဘာကျော်တွေ ဝါးကပ်ကစားတာ ကြည့်ချင်လို့ ကြိုးစားတဲ့အကြောင်း ပီလီနဲ့ နာမည်ကြီးဘောသမားတွေနဲ့ ရိုက်ထားတာ။ သေချာတော့ မမှတ်မိပေမယ့် အရမ်းသဘောကျခဲ့တာရယ်၊ အရုပ်မဟုတ် အလှုပ်တွေ စကြည့်ဘူးတာရယ်ကိုတော့ မှတ်မိတယ်။

.

နောက် ပီလီပါတဲ့ ရုပ်ရှင်တကား သဘောကျခဲ့သေးတယ်။ Escape to victory လို့မှတ်မိတာဘဲ။ ဂျာမန်စစ်သုံးပန်းဖြစ်နေတဲ့ စစ်သားတွေထဲက ဘောကန်ကောင်းသူတသင်းနဲ့ ဂျာမန်စစ်တပ်အသင်း ကန်တဲ့ပွဲ။ အဲဒီကန်အပြီးမှာ အကျဥ်းစခန်း ဖောက်ပြီး ပြေးကြမယ့်ဇတ်လမ်း။ ပီလီအပြင် အခြား ကမ္ဘာကျော် ဘောသမားတွေ ပါသေးတယ်။ နာမည်ကျော် ပီလီကစ်ဖြစ်တဲ့ အမြင့်ဘောကို နောက်ပြန်ကန်သွင်းတာ ဇတ်ရဲ့ အထွတ်အထိပ်ပေါ့။

.

ပီလီအကြောင်း စာအုပ်လည်း ထွက်သေးတယ်ထင်တာဘဲ။ သူ့အတ္ထုပတ္တိပေါ့။ အဲဒီကမှ အလွန်ဆင်းရဲခဲ့တဲ့ပီလီ ကမ္ဘာကျော်သည်အထိ ဖြစ်တာသိရတာ။ အခုခေတ်လို အင်တာနက်နဲ့ ဗီဒီယို ပေါပေါများများမရှိတော့ စာအုပ်စာတမ်းတွေကဘဲ သူ့အကြောင်းသိခဲ့ရတာ။

.

နောက်အမှတ်ရတာက ၂၀ရါစုအတွက် အကောင်းဆုံး ဘောသမားရွေးကြတော့ ပီလီနဲ့ မာရာဒိုနာ အရွေးခက်နေတာဘဲ။ ပူးတွဲပေးလိုက်တယ်ထင်တယ်။ ကျနော် တဦးတည်းသဘောအရဆို ပီလီဘဲရွေးမှာ။ ဘောကန် ထူးချွန်တာချင်းတူတောင် ပီလီက ကစားတာ အရမ်းသန့်တယ်။ ညစ်ကန်တာ မတွေ့သလောက်ဘဲ။ အနိုင်လိုချင်ကြတာချင်း တူပေမယ့် သန့်သန့်ရှင်းရှင်း အနိုင်ရတာက ပိုတန်ဖိုးရှိတယ် ထင်လို့ပါ။

.

အခုတော့ သူတို့နှစ်ဦး ကောင်းကင်မှာ ဘောဝါသနာရှင်တွေကို အတူတူ သင်ပေး ဖျော်ဖြေပေးနေလောက်ပြီ ထင်ပါရဲ့။ RIP.

ဝူဟန်ကိုဗစ် ဒီဇင်ဘာ နှစ်ဆယ့်သုံး၊

 တရုပ်ကြီး လိမ်နေတုံးလား။

.

မကြည့်တာ ကြာပြီဖြစ်တဲ့ ဝူစာရင်း ကြည့်မိတော့ ကမ္ဘာမှာ #ဝူနာ သန်း၆၆၀ ကျော်ပြီ။ ဂရဖ်အရ ဝူနှုန်း အနိမ့်မှာတန်းနေပေမယ့် သေနှုန်းကျပါတယ်။ စုစုပေါင်း ၆၆သိန်းကျော် ဝူကြောင့်သေခဲ့ပြီ။

.

အချို့နိုင်ငံ ဂျပန် ပြင်သစ် ဂျာမဏီတို့မှာ တချီတချီ ပြန်ဝူပေမယ့် အသည်းအသန်သံ မကြားရ။ ရာသီတုပ်ကွေးလို ဖြစ်နေပြီလား မသိ။ အမေရိကားမှာ ပြီးခဲ့တဲ့အပတ်က ဖလူးကြောင့် ဆေးရုံတွေပြည့်လို့ သတင်းမှာတွေ့ပေမယ် #ဝူဟန်ကိုဗစ် ကြောင့်လို့မပြော။ ဆေးကုမ္မဏီတွေက ကိုဗစ်မျိုးစိတ်အားလုံး ပျောက်တဲ့ကာကွယ်ဆေး ထွက်ပြီပြောပေမယ့် သတင်းမဖြစ်တော့။

.

လူငါးသန်းဘဲရှိတဲ့ စလုံးမှာ တနေ့ ဝူတထောင်ခန့်ဖြစ်နေတုံး လူသန်းထောင့်ငါးရာခန့်ရှိတဲ့ တရုပ်ကြီးက တနေ့ ဝူသုံးထောင်ဆိုရင် ဘာအရေးကြီးလဲ။ ဇီးရိုးမဖြစ်တောင် ထိန်းနိုင်ရမယ်လေ။ တကယ်ဆို ကာကွယ်ဆေးကအစ ကာကွယ်မှု ကုသမှုတွေမှာ သုံးတဲ့ ပစ္စည်းအများစုက "တရုပ်ပြည်မှာလုပ်သည်" တွေဘဲ။ အရင်က ပိုက်ဆံအမြတ်ကြမ်းရလို့ ရောင်းစားခဲ့တယ်ဆိုရင်တောင် အခုလို အဝယ်ကျသွားတဲ့အချိန်မှာ ဆက်ထုတ်ပြီး ပြည်တွင်းသုံးသင့်တာပေါ့။ အခုကြားတာက ဆေးတောင် ပြည်ပကပြန်ပို့နေရတယ် ကြားတယ်။ အမေရိကန်က ကာကွယ်ဆေးကအစ ကူမယ်ပြောတာ လက်ခံသံ မကြားသေးဘူး။

.

တခုခုတော့ အကြီးအကျယ် လွဲနေပြီ ထင်တာဘဲ။ ဝူဟန်ကစဖြစ်ပေမယ့် တကမ္ဘာလုံး ဝူပြီး ဒုက္ခရောက်နေချိန် တရုပ်မှာ တနေ့မှ ဆယ်ယောက်လောက်ဘဲ ဝူသတဲ့။ ခုထိလည်း အားလုံးဝူတာ  လေးသိန်းဆိုတဲ့ အရည်အတွက်ဟာ နိုင်ငံအလတ်မှာတောင် တကယ်ဆိုးချိန်တုံးက တနေ့ဝူလောက်ဘဲ ရှိခဲ့တာပါ။ လူများလို့ အကူးများမှာစိုးရင် ရောင်းမကုန်တဲ့ ကာကွယ်ဆေးတွေ ထိုးပေးထားပေါ့ဗျာ။

61

 

ဓားရိုးကမ်း

 ၂၀၁၀ နောက်ပိုင်း စာပေစိစစ်ရေး မရှိတဲ့အချိန်ကစ စာအုပ်မျိုးစုံ ထွက်လာတယ်။ လူငယ်တွေအတွက် စာအုပ်ကိုင်ဖတ်ချိန်မဟုတ်မှ စာအုပ်တွေ အသစ်ဒီလောက်ထွက်တာ အံ့ဩမိ။ ပင်ကိုယ်ရေး နိုင်ငံရေးစာပေကအစ ဘာသာပြန်အဆုံး အရင်ကအပိတ်ခံရလွန်းလို့ မထုတ်ရဲတဲ့ စာအမျိုးအစားတွေ အသစ်ထွက်တယ်။ ရန်ကုန်ဘုခ်ပလာဇာနဲ့ စာအုပ်ရောင်းပွဲတွေရောက်ရင် ဘယ်လိုမှထင်မထားတဲ့ စာအုပ်တွေပင် တွေ့မိတယ်။ စာအုပ်ခေတ်မဟုတ်တော့လို့ စီးပွားရေးကိုက်ပါ့မလား တွေးပူမိလို့ ရေးသူရောထုတ်သူတွေပါ ကျေးဇူးတင်မိ။

.

အခု ဖတ်ပြီးသွားတဲ့ ဒီစာအုပ်လည်း ရန်ကုန်ဘုခ်ပလာဇာမှာ လျောက်ကြည့်ရင်းတွေ့လို့ ဝယ်မိတာ။ ကြားဘူးလို့ မဟုတ်ဘူး။ မူရင်းက ပူလစ်ဇာဆုရဆိုလို့ ပိုစိတ်ဝင်စားသွားတယ်။ ဘာသာပြန်သူ ရာပြည့်ရဲ့ အရိုင်းဒီရေ တအုပ်တော့ ဖတ်ဖူးတယ်။ ဘာသာပြန်ဘဲ။

.

အခုစာအုပ်က တောင်ဗီယက်နမ်မှာ စစ်ရှုံးလို့ အမေရိကန်တွေ ပြန်ပြေးရတဲ့အချိန်မှာ ဇတ်စတယ်။ ဇတ်လိုက်က တောင်ဗီယက်နမ် စစ်တပ်က ဗိုလ်ချုပ်ကြီးတယောက်ရဲ့ ပီအေ။ သို့သော် သူက မြောက်ဗီယက်နမ် သူလျှို။ အဖေပြင်သစ်ဖုန်းကြီးနဲ့ အမေဗီယက်နမ်ကမွေးတော့ အင်္ဂလိပ်စာတတ်တော့ အလုပ်ဖြစ်နေတာ။ တပ်ထဲမဝင်ခင် အမေရိကားမှာ ပညာသင်သွားဘူးသေး။

.

တောင်ဗီယက်နမ်တွေ စစ်ရှုံးတော့ သူ့ဗိုလ်ချုပ် အမေရိကားပြေးရပြီ။ သူကမလိုက်ချင်ပေမယ့် အထက်ကခိုင်းတော့ သူလှျိုဆက်လုပ်ဖို့ လိုက်သွားရတယ်။ ဇတ်လမ်းပေါ့။ အမေရိကားမှာ ပိပိရိရိ အလုပ်လုပ်နိုင်တယ်။ နှစ်အနည်းငယ်ကြာတော့ ထိုင်းဘက်ကတဆင့် တန်ပြန်တော်လှန်ရေးလုပ်ဖို့ စေလွှတ်ခံရတယ်။ သူကလည်း နဂိုရ်က ​ေမြာက်ဗီယက်နမ်ဘက်ကဆိုတော့ ပြန်ချင်တာနဲ့ အတော်ဘဲပေါ့။

.

ပထမ စစ်ဆင်ရေးမှာတွင် အဖမ်းခံရပြီး ဇတ်လမ်းဖြစ်တယ်။ ကိုယ်တိုင်ဖတ်ကြည့်ကြရင် ပိုကောင်းမယ်။ စိတ်ဝင်စားစရာ အဖြစ်အပျက်တွေနဲ့ ဇတ်လမ်းဖွဲ့ထားတယ်။ မူလရေးသူက တောင်ဗီယက်နမ်ကပြေးသူရဲ့ အဆက်ထင်တယ်။ အမေရိကားမှာနေတဲ့ ဗီယက်နမ်ဘဲ။ မြောက်ဘက်အကြောင်း မကောင်း ဘက်လိုက်ရေးထားသလို ထင်ရပေမယ့် တောင်မြောက်စစ်ပွဲအပြီး နှစ်ငါးဆယ်အကြာမှာ ဗီယက်နမ်က စစ်ပွဲမရှိဘဲ ဖွံ့ဖြိုးတိုးတက်နေပါပြီ။ ကိုဗစိအပြီး လာလိုက်တဲ့တိုးရစ်တွေမှာ အမေရိကန်တွေက တဝက်လောက်များ ရှိနေမလား မသိ။ ဘာဘဲဖြစ်ဖြစ် ခေတ်ဟောင်းအကြောင်း ရေးထားတဲ့ ဝတ္ထုကောင်းတအုပ်ပါ။ 

ငှက်မင်းသားဝမ်းဖြူ တံဆိပ်ခေါင်း၊

 မြန်မာဒေသရင်း ငှက်မျိုးစိတ်များ စီးရီးအဖြစ် ငှက်မင်းသားဝမ်းဖြူ တံဆိပ်ခေါင်း ယနေ့ထုတ်ပါတယ်။ ၂၀၀ကျပ်တန်ပါ။ FDC နဲ့  တံဆိပ်ခေါင်းအကြောင်း မှတ်တမ်းလွှာ pamphalet လည်း ထုတ်ပါတယ်။ လေးရာကျပ်စီပါ။ နှစ်ခုလုံးရဲ့ ပုံနှိပ်ကွာလတီ ကောင်းပါတယ်။

.

တံဆိပ်ခေါင်းကတော့ အရင်ခေါင်းတွေလိုပါဘဲ။ ဒီဇိုင်းလှပေမယ့် ပုံနှိပ်တာ ညံ့ပါတယ်။ အရောင်မထွက်ပါ။ သတင်းစာ ဖေ့ဘုတ်တွေမှာ ဖော်ပြတဲ့အရောင်နဲ့ နှိုင်းယှဥ်နိုင်အောင် ပုံမှာဖော်ပြပေးလိုက်ပါတယ်။ 

.

ဒီတခေါက်မေးကြည့်တော့ ငှက်စီးရီး ၉ခေါင်း ထုတ်မှာပါတဲ့။ လွန်ခဲ့တဲ့ နှစ်သုံးဆယ်ကျော် အီးမေးလ်ခေတ်မစားခင်ကဆို မြန်မာတံဆိပ်ခေါင်း ကမ္ဘာကတောင် စိတ်ဝင်စားခံရနိုင်ပါတယ်။ ခုတော့ ဝါသနာရှင်တွေဘဲ ဝယ်ကြဖို့များပါတယ်။ တံဆိပ်ခေါင်းကပ် စာပို့တာ မတွေ့မိပါ။

.

စီးရီးထုံးစံအတိုင်း နိုင်ငံအမည် မြန်မာလိုမပါပါ။ မှင်အရောင်မှိန်လွန်းတော့ ငှက်အမည်တွေ ဖတ်ရခက်ပါတယ်။ နှစ်အနည်းငယ်ကြာရင် ဖတ်ရမယ်မထင်ပါ။ 

နဖားကြူးငှက် တံဆိပ်ခေါင်း၊

 

နဖားကြူးငှက် (ခ) အမြီးဝိုင်းငှက် ပုံဖြင့် တံဆိပ်ခေါင်း ယနေ့ထုတ်တယ်။ မြန်မာ့ဒေသရင်း ငှက်မျိုးစိတ်များစီးရီးအဖြစ်ထုတ်တာ။ နောက်ဆက်ထုတ်မလားမေးတော့ တံဆိပ်ခေါင်းရောင်းသူက မသိပါတဲ့။ 

.

၂၀၀ကျပ်တန် တံဆိပ်ခေါင်းပါ။ မြန်မာ့စာတိုက်လုပ်ငန်းက FDC ရော pamphlet ရော ထုတ်ပါတယ်။ တခု လေးရာကျပ်ပါ။ ခုနောက်ပိုင်း တံဆိပ်ခေါင်းတွေ သေချာထုတ်ပါတယ်။ လွန်ခဲ့တဲ့ နှစ်သုံးဆယ်ကျော်က ဒီလိုထုတ်ရကောင်းမှန်း သိခဲ့ကြရင် အတော်အကျိုးရှိခဲ့ကြမှာ။

.

ငှက်ကလေးတွေ ဒီဇိုင်းက လှသော်လည်း တံဆိပ်ခေါင်းမှာ မပေါ်လွင်။ FDC ကလိုဆို ပိုကောင်းမယ်လို့ ထင်မိတယ်။ နောက်ပိုင်းထုတ်တွေလိုဘဲ နိုင်ငံအမည် မြန်မာလိုမပါ။ ''MYANMAR မြန်မာ'' လို့တော့ ထည့်သင့်တာပါဘဲ။

.

အရင်တခေါက်က ဆယ့်တစ်နာရီလောက်မှ စာတိုက်ကြီးရောက်တော့ FDC ကုန်ပြီ။ အပြင်က ဝယ်ရတယ်။ ဒီတခေါက် ဖုန်းနံပတ်ပေးထားတာတွေ့လို့ ကြိုမှာကြည့်တာ သေချာကိုကူညီပါတယ်။ သေချာလည်း ရှင်းပြပါတယ်။ အဲဒီအတွက် ကျေးဇူးပါ။ 

HOME 2022

 ၂၀၀၇ က စလို့ နှစ်စဥ် ရိုက်ထားခဲ့တယ်။ နည်းနည်း နည်းနည်းချင်း ပြောင်းသွားတာ အတော်ကွာခဲ့ပြီ။

စွေ့ငှက် တံဆိပ်ခေါင်း၊

 မြန့်မာ့ဒေသရင်းငှက် အဖြစ်သတ်မှတ်ထားသည့် စွေ့ငှက်ပုံဖြင့် တံဆိပ်ခေါင်း ယနေ့ထုတ်တယ်။ ဒေသရင်းငှက်စီးရီးအဖြစ် ဆက်ထုတ်မလားမသိဘူး။ မကြာခင်နှစ်များက ထုတ်ဝေခဲ့တဲ့ ငှက်ခါးပြန်ထုတ်နဲ့ စီးရီးလို့တော့ ပြောမရနိုင်ဘူးထင်တယ်။ 

.

၂၀၀ကျပ်တန် တံဆိပ်ခေါင်းပါ။ FDC နဲ့ မှတ်တမ်းလွှာပါ ထုတ်တယ်ဆိုသော်လည်း ဆယ်နာရီခွဲခန့်မှာ ရန်ကုန်စာတိုက်ကြီးရောက်တော့ ကုန်ပါပြီတဲ့။ တံဆိပ်ခေါင်းပဲ ရပါမယ်တဲ့။

.

တံဆိပ်ခေါင်းပုံ ကြိုက်ပါတယ်။ ဒီဇိုင်းကိုပြောတာ။ ငှက်ပုံက ဝါးနေတယ်။ မူရင်းပုံကြောင့်လား၊ ပုံနှိပ်တာ ညံ့လို့လားတော့ မသိပါ။ ငှက်ပုံကို ဒါ့ထက် ပိုကြည့်ကောင်းအောင် လုပ်လို့ရဦးမှာပါ။ 

.

အရင် ကျားခေါင်းကစလို့ တံဆိပ်ခေါင်းမှာ နိုင်ငံအမည်ကို မြန်မာလို မထိုးတော့ဘူး။ ငှက်အမည် ''စွေ့'' နဲ့ ၂၀၀ ကျပ်ဘဲ သေးသေးလေးပါတော့တယ်။ အင်္ဂလိပ်လို MYANMAR ပဲ ထည့်တာတော့ ကြိုက်တယ်။ သို့သော် မြန်မာလို "မြန်မာ" လို့တော့ မဖြစ်မနေ ထည့်စေချင်မိတယ်။ 

ရုရှမြန်မာ ကျားတံဆိပ်ခေါင်း၊

 ရုရှမှာရုရှမှာ ကျင်းပတဲ့ အပြည်ပြည်ဆိုင်ရာ ကျားကောင်ရေတည်တံ့ရေးဖိုရမ် အထိမ်းအမှတ်အဖြစ် တံဆိပ်ခေါင်းထုတ်တယ်။ ဒီလိုခေါင်းစဥ်အောက်မှာထုတ်တာ ပထမဆုံးအကြိမ်ဘဲ ဖြစ်လိမ့်မယ်။ ကျားပုံနဲ့ ခေါင်းထုတ်တာလည်း မြန်မာပြည်အတွက် ပထမဆုံးဖြစ်မယ်။ အရင်က တိရစ္ဆာန်ပုံဆို အစဥ်သုံး ငှက်ဘဲတွေ့ခဲ့ဘူးတယ်။

.

၂၀၀ကျပ်တန် သုံးခေါင်းပါ။ နိုင်ငံအမည်ကို မြန်မာလိုမပါပါ။ ၂၀၀ကျပ်ဆိုတာတောင် တခေါင်းမှာဘဲပါတယ်။ ကျန်တာအားလုံး အင်္ဂလိပ်လိုကြီးဘဲ။ တော်တော် ဗိုလ်ဆန်တယ်ပြောရမယ်။ ကြည့်ရတာ မူလပုံတွေကို တိုက်ရိုက်ယူသုံးထားပုံဘဲ။ မြန်မာ-ရုရှ ဆိုပေမယ့် ရုရှနောက်ခံ ကရင်မလင်ပုံဘဲပါတယ်။ 

.

ဒီတခါ FDC ထုတ်တယ်။ သုံးမျိုးတောင်ထုတ်တာ။ FDC က တအိပ် ၄၀၀ကျပ်ပါ။ စာအိပ်အသားရော၊ ဒီဇိုင်းတွေရော ကောင်းတယ်။ နှစ်အိပ်က ဆင်တူနေတော့ သေချာကြည့်ရတယ်။ ကျားဝပ်နေပုံ ဘယ်ညာရွှေ့လိုက်ရင် ကွဲသွားမယ်။ ဒီနေ့စာတိုက်ကြီးမှာ မီးမလာတော့ ​မှောင်ထဲမှာ တော်တော် ကြည့်ယူရတယ်။ လာတဲ့စုသူတွေကလည်း အသက်ကြီးပိုင်းတွေများတယ်။ လူငယ်နည်းနည်းဘဲ တွေ့တယ်။ လူဟောင်းတွေတောင် တဖြေးဖြေးမတွေ့ရတော့။

အမှောင်၊

 လက်ရှိ ဖတ်နေစဲစာအုပ်။

.

လူသတ်မှုကို စုံစမ်းတဲ့ဝတ္ထုပါ။ အခုနောက်ပိုင်း ဖတ်တဲ့အထဲ အကောင်းဆုံးလို့ ထင်မိတယ်။ ကျော်လည်း အဆုံးအထိ မဖတ်ရသေးလို့ ဇတ်အစုံမသိသေး။

.

စုံထောက်ဝတ္ထုလိုင်းမှာ လူသတ်မှုစုံစမ်းတဲ့လိုင်းက အအောင်မြင်ဆုံး ထင်တယ်။ ကြိုက်တယ်။ ပထမဆုံး ဖတ်ဖူးတာက စုံထောက်ကြီးဦးစံရှားပေါ့။ ဝတ္ထုစဖတ်ဖူးတဲ့အရွယ်ကကို ဖတ်ဖူးပြီးသဘောကျတာ။ စဥ်းစားပုံလော့ဂျစ်တွေက အရမ်းမိုက်စ်၊ စဖတ်ဖူးချိန်မှာ မူရင်းက နှစ်ငါးဆယ်လောက် အိုပြီဆိုပေမယ့် ဖတ်ပြီးသဘောကျတုံး။ ဦးစံရှားပြီးမှ ရှားလော့ဟုမ်းတို့ ဆားပုလင်းနှင်းမောင်တို့ ဖတ်ဖူးတာ။ အကုန်သဘောကျတာဘဲ။ သူတို့က အေးဆေးနဲ့ အဖြေရှာတဲ့ စုံထောက်တွေ။

.

နောက်စုံထောက်တမျိုးက လူစွမ်းကောင်း စုံထောက်တွေ။ စဖတ်ဖူးပြီး ကြိုက်တာက ဂျိမ်းစ်ဟယ်ဒလီချေ့စ်ဆိုတဲ့ စာရေးဆရာရဲ့ ဝတ္ထုဘာသာပြန်တွေ။ သူ့ဇတ်လိုက်တွေက စုံထောက်မဟုတ်ဘူး။ မတော်တဆ လူသတ်မှုဖြစ်တဲ့နေရာ ရောက်နေမိလို့ အစွပ်စွဲခံရပြီး ကိုယ်လွတ်ရုန်း၊ ပြီးမှ လူသတ်တရားခံကို ဇတ်လိုက်ကရှာပေးရတာ။ လော့ဂျစ်သိတ်မသုံး။ ဗြုကားနဲ့ လျူဂါသေနတ်ဘဲသုံးတယ်။ မြာကလည်း စွံကြသေး။ အထောက်တော်လှအောင်နဲ့ အောင်ခင်ဆင့်တို့လက်ရာတွေကြိုက်ခဲ့။

.

အဲဒီလို စုံထောက်မဟုတ်ဘဲ တရားခံရှာပေးတဲ့ အခြားဝတ္ထုတွေလည်း ရှိခဲ့တယ်။ အဂ္ဂသာခရစ္စတီး၊ အလစ္စတာမက္ကလိန်းရဲ့ ဝတ္ထုဘာသာပြန်တွေပေါ့။ လောလောဆယ် ခေါင်းထဲပေါ်လာတဲ့ စာရေးဆရာတွေဘဲ ချရေးလိုက်ရပေမယ့် အခြားဘာသာပြန်တွေ ရှိသေးတယ်။ တော်တော်များများ ဖတ်ကောင်းတာတွေ ရှိခဲ့ပေမယ့် မမှတ်မိ။ 

.

စုံထောက်ဝတ္ထုဘာသာပြန် နည်းသွားလို့ ဖတ်စရာရှာရချိန် မောင်ထော်လေးလမ်း အပေါ်ဘလောက်က အင်္ဂလိပ်ဝတ္ထု အငှားဆိုင်ရောက်သွားတယ်။ အဲဒီကပုဂ္ဂိုလ်က Lawrence Sanders ဖတ်ဖူးလားတဲ့။ မကြားဖူးလို့ ဘာသာပြန်ဖူးတာ ရှိလားမေးမိတယ်။ ဗမာလိုဖတ်ဖူးမှ အမျိုးအစားသိမှာကိုး။ မတွေ့ဘူးကြောင်း ကောင်းလွန်းလို့ ဖတ်ကြည့်သင့်ကြောင်းပြောပြီး First Deadly Sin လား၊ Sixth Commandments လား တအုပ်အုပ်ဘဲ။ ငှားလိုက်တယ်။ သဘောကျလွန်းလို့ အဲဒီဆိုင်ရှိ အဲဒီစာရေးဆရာရဲ့ဝတ္ထု အကုန်ဖတ်ဖြစ်တယ်။ အရင်က အဲဒီဆိုင်မှာ ဟာရိုးရော်ဘင်တို့လို့ နာမည်ကြီးတွေရဲ့ ဝတ္ထုတွေဘဲ ငှားဖတ်ဖြစ်တာ။ သူ့ဇတ်တွေက လူသတ်မှု စုံစမ်းတာပေမယ့် အဲဒီအချိန်က ခေတ်စားတဲ့ ဗြုကားနဲ့ လျူဂါစတိုင်မဟုတ်ဘူး။ သဲလွန်စတွေ အသေးစိတ်ရှာပြီး စုံစမ်းတဲ့ပုံစံ။ ဇတ်လေးတယ်။ ဒါကြောင့် မြန်မာပြန် မရှိတာဖြစ်မယ်။ စာအုပ်ငှားဆိုင်အမည်က သိင်္ဂီမော်။

.

အခုစာအုပ်က လူသတ်မှုစုံစမ်းတာပေမယ့် အထက်ကပုံစံတွေနဲ့ မတူဘူး။ နှစ်သုံးဆယ်လောက်ကြာမှ သိချင်စိတ်ပေါ်လို့ စုံစမ်းတာမျိုး။ ဘာဖြစ်မယ်တော့ မသိသေး။ သေချာတာက အမေရိကားမှာမလို့ ဒီဇတ်မျိုးဖြစ်တာ။ ပြီးသွားမှာစိုးလို့ တနေ့နှစ်ခန်းဘဲ စွဲဖတ်နေရတယ်။

.

ရေးရင်း စဥ်းစားမိတာက ဖတ်ခဲ့တာ များပြီ။ မြန်မာတွေရေးတဲ့ မူရင်း စုံထောက်ဝတ္ထု ခေါင်းထဲမပေါ်ဘူး။ ရှိခဲ့လို့ ဖတ်ခဲ့မိတောင် ကြိုက်တာမရှိခဲ့လို့ ဖြစ်မယ်။ ဘာလို့ မရေးကြပါလိမ့်။ မြန်မာတွေ လော့ဂျစ်ကျကျ မတွေးချင်ကြလို့များလား။

ဆုတောင်း၊

ဗမာလူမျိုးတွေသာ မကပါ။ လူသားအများစုက ဆုတောင်းလေ့ရှိကြတာပါဘဲ။ မိမိ ဖြစ်ချင်တဲ့ဆန္ဒကို လုပ်ပေး ဖြည့်ဆည်းပေးနိုင်မယ် ထင့်တဲ့သူစီ တိုင်တည်ဆုတောင်းလေ့ရှိတာ လူသားအများစု လုပ်လေ့ရှိကြမှာပါ။ ဘုရားတွေ နတ်တွေကအစ ကွယ်လွန်ပြီဖြစ်တဲ့ မိဘဆွေမျိုး အကြီးအကဲ အားကိုးသူတွေကို တိုင်တည်ဆုတောင်းလေ့ ရှိတာ ဟိုးရှေးကတည်းက လုပ်ခဲ့ကြမှာပါ။

.

ဒီခေတ်တော့ ပြောလာကြတယ်။ ဆုတောင်းနေယုံနဲ့ ပြည့်နိုင်မှာလား၊ ဒါဆို ဘာမှမလုပ်ဘဲ ထိုင်ပြီး ဆုဘဲတောင်းနေမှာပေါ့လို့ ပြောလာကြတယ်။ မှန်ပါတယ်။ ဘာမှမလုပ်ဘဲ ဆုတောင်းနေမယ့်အစား တခုခုလုပ်ပြပြီး ဆုတောင်းတာက ပိုအဓိပ္ပယ်ရှိမှာပါ။

.

စဥ်းစားကြည့်တာပါ။ ပိုက်ဆံတောင်းသူတယောက်က ငါ့ကို ပိုက်ဆံပေးပါလို့ တောင်းတာနဲ့ တခုခုလုပ်ပြပြီးတောင်းတာ ဘယ်ဟာက ပိုရနိုင်မလဲ။ အနည်းဆုံး သီချင်းဆိုတောင်းရင် လူပိုသတိထားမိမယ်၊ လူကြိုက်များနေတဲ့ သီချင်းကိုဆိုပြမယ်၊ ဆိုပြတဲ့သီချင်းကို ကြိုက်တဲ့သူရှိရင် ပိုက်ဆံရနိုင်တယ်။ ပိုက်ဆံများများရှိသူ စေတနာရှိသူနဲ့ကြုံရင် များများရနိုင်မှာပေါ့။ ဆိုပြတဲ့ သီချင်းကို ကြိုက်သူမကြုံလို့ မရတဲ့အချိန်မျိုး ဖြစ်နိုင်ပေမယ့် ပိုက်ဆံလိုချင်ရင်တော့ ဆက်ဆိုနေရမှာပါ။

.

ဒီသဘောပါဘဲ။ ဆုတောင်းပြီဆို ဘာမှ မလုပ်ဘဲ ဆုတောင်းနေမယ့်အစား တခုခုလုပ်ပြပြီး တောင်းတာက ပြည့်ဖို့ ပိုနီးစပ်မယ်ထင်တယ်။ ဘုရားကို ကန်တော့ပြီး ဆုတောင်းတာကအစ ပရိတ်ရွတ်မယ်၊ ဂါထာတခုခုရွတ်မယ်၊ ကောင်းမှုတခုခုလုပ်မယ်၊ သစ္စာဆိုမယ် စသဖြင့် လုပ်ပြီးမှ ဆုတောင်းရင် လုပ်တဲ့အပြုအမူကို သဘောကျတဲ့ မမြင်နိုင်တဲ့ ပုဂ္ဂိုလ်တွေက သူတို့ဖြည့်ပေးနိုင်တဲ့ ဆုတောင်းဆို ဖြည့်ပေးနိုင်မယ်လို့ ထင်မိတယ်။

.

ဘယ်သူတွေ ဘယ်လိုပြောနေကြစေ၊ လူသားတွေကတော့ ဆုတောင်းနေမှာပါဘဲ။ ဒီအတိုင်း အလွတ်ဆုတောင်းနေမယ့်အစား တခုခုလုပ်ပြီး ဆုတောင်းကြည့်ကြပါ။ အနိမ့်ဆုံးအနေနဲ့ သစ္စာဆိုပြီးပေါ့။ စမ်းကြည့်ကြရအောင်။

ထမင်းပေါင်း၊

 ကျနော်က အပြင်မှာ ဝယ်စားရလျှင် မြန်မာထမင်းဟင်း ဝယ်စားလေ့မရှိ။ အများဆုံး ဝယ်စားဖြစ်တာ ကြေးအိုး။ ပြီးနောက် ထမင်းပေါင်း။ ပြီးနောက်မှ ထမင်းကျော် ခေါက်ဆွဲကျော်။

.

ထမင်းပေါင်းဆိုလို့ သုံးမျိုးစားဘူးသည်။ ပထမဆုံး စားဖြစ်တာက မန္တလေးထမင်းပေါင်း။ ကျောင်းသားဘဝ မန္တလေးရောက်တုန်း ဗိုလ်ချုပ်လမ်းမှာထင်သည်။ လိုက်ကြွေးလို့ စ စားဘူးသည်။ အရည်သောက်ဟင်းချိုပန်းကန်လို ေဇာက်နက်နက်ပန်းကန်မှာ တကယ်ပေါင်းထားဟန်ရှိသည်။ ဆီများလည်း ရွှဲလို့။ ဝက်သုံးထပ်သားပြား၊ ဝက်အသည်း၊ ဝက်အူချောင်းနဲ့ မြေပဲဆံများပါတာ မှတ်မိသည်။ ထမင်းနဲ့ အသားတွေကို တလွှာစီထပ်ကာ ပေါင်းထားဟန်ရှိသည်။ အခုခေတ် ပေါက်စီပေါင်းထားသည့် ဖိုလိုထဲမှ ထုတ်ပေးလေ့ရှိသည်။ ပြီးရင် မျက်စောင်းထိုးမှ အညာဖွာလူဒါသွားစား၊ အဲဒီတုံးကတော့ ဇိမ်ဘဲ။ နှစ်ခါသုံးခါဘဲ စားဘူးမည်။ ၈၈နောက်ပိုင်း မစားဖြစ်တော့။ 

.

နောက်ထပ်စားဘူးတာက ရန်ကုန်ထမင်းပေါင်း။ ရုံးထမင်းပေါင်းလည်း ခေါ်လို့ရမည်။ ရန်ကုန်မြို့ထဲရုံးတွေပတ်လည်မှာဘဲ ရောင်းလေ့ရှိသည်။ ဝက်ခေါက်ကင် အသားကင် ကော်ရည်နဲ့ချက်ထါးတဲ့ ဂေါ်ဖီရွက်တို့ကို ထမင်းပေါ်ဆန်းပေး ပုံပေးလိုက်တာ။ စစားကာစ ၁၉၈၆-၇ လောက်က ဒါဘဲပါသည်။ ေဈးကလည်း သုံးကျပ်လား။ လိုက်ပွဲပါ တခါတည်းယူလာခိုင်းလိုက်သည်။ သူတို့ဆိုင်မှာ ရောင်းသော ဝက်နဲ့ပတ်သက်တဲ့အသုတ်တွေနဲ့ ဝက်ခြေထောက်ဟင်းချို ဝယ်မစားနိုင်။ အလကားရသည့် ဆာဒါးဟင်းချိုနဲ့ ကြိတ်ပေရော့။ ဒီဘက်ခေတ် ဆိုင်တွေတိုးချဲ့လာသော်လည်း ဒီဆိုင်မျိုး သိတ်မတွေ့။ စမ်းချောင်းမြေနီကုန်းနဲ့ တောင်ဥက္ကလာဘက်မှာလား၊ ဒါဘဲတွေ့ဘူးသည်။ သိတ်မစားဖြစ်တော့၊ နောက်ဆုံး မြန်မာ့လေကြောင်းရုံးဘေးက လမ်းမှာရှိသည့် ဟိုးအရင်ကစားနေကျဆိုင်မှာ စားတာ တပွဲ တထောင့်ငါးရာကျပ်။ အခုအထိ ခုံနေရာရဖို့ လုနေရတုံး။

.

ခုနောက်ပိုင်းမှာ အများဆုံးစားဖြစ်တာက တရုပ်ထမင်းပေါင်းလို့ ခေါ်ရမည်ထင်သည်။ တရုပ်စားသောက်ဆိုင်တွေမှာ လွယ်လွယ်ကူကူ မှာလို့ရသည်။ ဒီခေတ်တော့ လဘက်ရည်ဆိုင်ကြီးတွေမှာပါ ရနေပါပြီ။ ထမင်းပေါ်တွင် ကော်ရည်နဲ့ကျော်ထားသော အစိမ်းကျော်ပုံပေးလိုက်တာမျိုး။ အသီးအရွက်စုံသလို အသားအသည်း အူအထိပါတတ်သည်။ နောက်ပိုင်း အသားလုံး ငါးဆုတ်လုံး ငုံးဥပါ ပါတတ်သည်။ ပူပူနွေးနွေးစားရတဲ့အပြင် အရည်စိုစိုလေးပါ စားရလို့ အကြိုက်တွေ့သည်။ ဒီပွဲကလည်း စစားဘူးတုံးက လေးငါးကျပ်က စခဲ့တာ တနေ့ကစားတော့ တပွဲသုံးထောင်။ ဆာဒါးဟင်းရည်နဲ့ ကြက်သွန်ချဥ်လေးနဲ့ဆို တနပ်တော့ပြီးသည်။

.

အခြား ကျနော် မစားဘူးသော ထမင်းပေါင်းပုံစံတွေလည်း ရှိပါလိမ့်မည်။ အထူးသဖြင့် နယ်ဒေသအလိုက် ရှိနိုင်ပါသေးသည်။

ရတနာပုံခေတ် တံဆိပ်ခေါင်း၊

 မြန်မာဝတ်စားဆင်ယင်မှု တံဆိပ်ခေါင်းစီးရီးအဖြစ် ရတနာပုံခေတ် တံဆိပ်ခေါင်း ယနေ့ထုတ်ဝေသည်။ FDC ကို မြန်မာ့စာပို့လုပ်ငန်းက မထုတ်ပါ။ ပြင်ပဝါသနာရှင် က ကိုယ်ပိုင် FDC များ လုပ်လာကြသည်။ Máxima card ခေါ် တံဆိပ်ခေါင်းကဒ် လုပ်လာသူပင် တွေ့ခဲ့ရသည်။

.

စီးရီးအတိုင်း အမျိုးသားဝတ်ဆင်ပုံ၊ အမျိုးသမီး ဝတ်ဆင်ပုံ နှစ်ခေါင်းထုတ်ဝေသည်။ စီးရီးအတိုင်း ရတနာပုံခေတ် ဆိုတာကို မြန်မာလိုသာ ဖော်ပြပြီး အင်္ဂလိပ်လို မပါရှိပါ။ 

.

တံဆိပ်ခေါင်း တန်ဖိုး တခေါင်း ၂၀၀ကျပ် ဖြစ်သည်။ ဝတ်စားဆင်ယင်မှု စီးရီးရဲ့ နောက်ဆုံးဖြစ်မည်ထင်သည်။ ဆက်လက်ထုတ်မည်ဆိုပါက ကိုလိုနီခေတ် ထုတ်ရတော့မည်။ 

ယစ် ရွှေ ပြည် ဝတ္ထု၊

 စာအုပ်အသစ်များ မဖတ်ဖြစ်တာ ကြာလာပြီ။ အရင်ကစာတွေ ပြန်ဖတ်ရတာ ဇိမ်ပိုကျနေသည်။ တလောက ဘာသာပြန်အသစ်တအုပ် ဖတ်ဖြစ်သော်လည်း အဆုံးအထိ မဖတ်ဖြစ်။ အရသာ မတွေ့။ ဖေ့ဘုတ်ပေါ်က တွေ့နေသော စာအဟောင်းတွေကိုဘဲ ရှာဖတ်ဖြစ်နေသည်။

.

ဖေ့ဘုတ်ပေါ်မှာဘဲ ဘဝတက္ကသိုလ်စာပေမှ ကြော်ငြာတခုတွေ့တော့ စိတ်ဝင်စားသွားတာနှင့် ဝယ်ဖတ်ဖြစ်သည်။ စာရေးဆရာတော်ကောင်းမင်း ဘာသာပြန်သော မူရင်း တရုပ်ဝတ္ထု ယစ်ရွှေပြည်တဲ့။

.

စဖတ်ဖတ်ချင်း ဒီဆရာဘာသာပြန် နှစ်အုပ်လား ဖတ်ဖူးပါတယ်။ စာရေးတာ ဒီလိုမဟုတ်ပါဘူးလို့ ထင်မိသည်။ နှစ်ခန်းသုံးခန်းလောက်ဖတ်မိမှ သဘောကျလာပြီး အဆုံးအထိ ဖတ်ဖြစ်တော့သည်။

.

ဖတ်ရင်းနဲ့ လွန်ခဲ့သော နှစ်နှစ်ဆယ်ကျော်က ခေတ်စားခဲ့သော မော်ဒန်ဆိုတဲ့ စကားလုံးကို သတိရလာမိသည်။ ဤဘာသာပြန်ဝတ္ထုသည် စာအရေးအသား၊ အကြောင်းအရာ၊ ဇတ်လမ်းဆင်ပုံမှအစ အမည်ပေးပုံများအဆုံး တကယ်ဒန်တာဘဲဟု စိတ်ထင်မိပါသည်။ 

.

ဇတ်လမ်းအရ အရက်များ အမည်ပေးပုံ၊ အစားအသောက်များ အမည်ပေးပုံတွေဖတ်ရတော့ လွန်ခဲ့သော နှစ်လေးဆယ်ကျော်က ခေတ်စားခဲ့သော သိုင်းဝတ္ထုများထဲမှ သိုင်းနာမည်တွေကိုပင် သတိရမိပါသည်။

.

စာအုပ်တဝက်လောက်ရောက်မှ ဝတ္ထုဇတ်သွားကို သဘောပေါက်မိသည်။ စာတအုပ်ထဲတွင် ဝတ္ထုရှည် ဝတ္ထုတို ပေးစာများကို ထည့်ရေးထားရာ ဒန်ဖွဲ့စည်းပုံလို့ဘဲ ထင်မိသည်။ ကိုယ်တိုင်ဖတ်ကြည့်လိုက်ကြပါ။

.

မူရင်းတရုပ်ဝတ္ထု၊ အင်္ဂလိပ်လို The Republic of Wine ၊ ရေးသူ Mo Yan ကို ဘာသာပြန်ဆရာ တော်ကောင်းမင်းက ဘာသာပြန်ထားပါသည်။ စာပေစိစစ်ရေး ရှိချိန်ဆိုလျှင် အကြောင်းအရာအချို့အရ၎င်း၊ ဇတ်တည်ရာ တရုပ်ပြည်တွင် ဒီလိုအဖြစ်မျိုး တကယ်ရှိသည်ဟု ထင်မှာစိုးသည်ကတကြောင်း၊ အပေါ်ကပြောခဲ့သလို ဒန်လွန်းသဖြင့်၎င်း စာအုပ်အဖြစ် မြင်ရမည်လို့ မထင်မိပါကြောင်း။ 

EPL 2021-22

မနေ့က ပြီးခဲ့တဲ့ အင်္ဂလန် ပရီးမီးယားလိဂ်က နောက်ဆုံးမိနစ်တွေအထိ ရသပေးခဲ့ပါတယ်။ မန်စီးတီးနဲ့ လီဗာပူး ဘယ်အသင်းဗိုလ်စွဲမလည်း နောက်ဆုံးမိနစ်အထိ စောင့်ကြည့်ခဲ့ကြရတာပါ။ စီးတီး ၇၆မိနစ်အထိ အိမ်ကွင်းမှာ နှစ်ဂိုးရှုံးနေတဲ့အချိန် လီဗာပူးကလည်း သူ့ပွဲမှာ မနိုင်သေးပါဘူး။ ဆာလာ အနိုင်ဂိုးသွင်းနိုင်တဲ့အချိန်မှာ မန်စီးတီးကလည်း တဂိုးပြန်နိုင်နေပါပြီ။ သိတ်မလွယ်တော့သော်လည်း ဗီလာက ချေပဂိုးသွင်းခဲ့ရင်ဆိုပြီး ပွဲပြီးသည်အထိ ကြည့်ကောင်းခဲ့ပါတယ်။

.

ဥရောပမှာ ချန်ပီယံလိဂ် ကန်ခွင့်ရတာကလည်း ဂုဏ်တခုဖြစ်သလို ဝင်ငွေလည်းပိုရပါတယ်။ အင်္ဂလန်က ဝင်ခွင့်ရမယ့် နံပတ်လေးနေရာကို စပါးနဲ့ အာဆင်နယ် နောက်ဆုံးနေ့အထိ ကန်ကြရပါတယ်။ ကိုယ့်ပြိုင်ဘက်အသီးသီးကို ဂိုးပြတ်တွေနိုင်ကြတော့ စပါးဘဲ ချန်ပီယံလိဂ် ဝင်သွားတယ်။

.

အာကြီးနဲ့အတူ ဥရောပဘောလုံး ဒုတိယအဆင့်ပြိုင်ပွဲ ယူရိုပါလိဂ်ဝင်ခွင့် တနေရာအတွက် မန်ယူနဲ့ ဝက်စ်ဟဲမ်း မျှော်လင့်နိုင်သေးတယ်။ နှစ်သင်းလုံး ပြိုင်ဘက်ကို အရှုံးတူကြတော့ မူလအပေါ်မှာရှိတဲ့ မန်ယူကန်ခွင့်ရသွားတယ်။

.

အပေါ်သင်းတွေသာမဟုတ်။ အောက်တန်းဆင်းဖို့ သုံးသင်းမှာ နှစ်သင်းက သေချာပေမယ့် နံပတ်၁၈နေရာက နောက်ဆုံးနေ့အထိ မသေချာဘူး။ ပရီမီးယားလိဂ်မှာ ကန်ခွင့်ပြုတ်ရင် နောက်နှစ်ပြန်တက်ဖို့ အတော့်ကိုမလွယ်တဲ့ ကိစ္စပါ။ ဒီတော့ ဘိတ်ရှေ့ရောက်လည်း မနည်းတန်ဖိုးရှိတယ်လေ။ လိဒ်စ်က ပြိုင်ဘက်ကို နိုင်ပြီး ဘန်လေကရှုံးတော့ လိဒ်စ်အသင်း တန်းမဆင်းရတော့ပါဘူး။ သူ့ပရိဿတ်လည်း ပြိုင်ပွဲမှာ ဗိုလ်စွဲသလိုကို ပျော်သွားကြတာပါ။

.

အသင်းတွေသာမက ဂိုးသွင်းအများဆုံးဆုကိုလည်း နောက်ဆုံးနေ့မှ သေချာတာပါ။ မကန်ခင်က လီဗာပူးကဆာလာက စပါးကစွန်ထက် တဂိုးပိုသွင်း ထားပါတယ်။ နောက်ဆုံးနေ့ပွဲစဥ်တွေမှာ ဆာလာကတဂိုးဘဲသွင်းပြီး စွန်ကနှစ်ဂိုးသွင်းနိုင်တော့ တရာသီအတွက်၂၃ဂိုးစီ သွင်းတာတူနေပါတယ်။ ပူးတွဲဆုပေးလိုက်သတဲ့။ တကယ်က တောင်အာဖရိကဝါးကပ်တုံးကလို ဂိုးသွင်းတာတူနေရင် အခြားသူသွင်းဖို့ ဂိုးဖန်တီးပေးနိုင်သူက ရသင့်တာပါ။ ဒါဆို ဆာလာ လွတ်လွတ်ကျွတ်ကျွတ် ရွှေဖိနပ်ဆု ရသွားပါမယ်။

.

နောက်ဆုံးဆု ရွှေလက်အိပ်ဆုကိုလည်း လီဗာပူးနဲ့ မန်စီးတီးဂိုးသမားတွေ ဂိုးမပေးရတဲ့ပွဲ တူနေတာပါ။ သို့သော်လည်း နောက်ဆုံးနေ့ ကိုယ်စီပွဲတွေမှာ နှစ်ဦးလုံး ဂိုးစောစောပေးလိုက်ကြရပြီး ဆုပူးတွဲရသွားပါတယ်။

.

တရာသီတော့ ပြီးသွားပြန်ပါပြီ။ ကိုယ်အားပေးတဲ့အသင်းရလာဒ်ကို ကျေနပ်ကြမယ် မထင်ပါ။ ဒါ့ထက်ပိုကောင်းစေချင်နေကြမှာပါ။ မည်သို့ပင်ဖြစ်စေ ပရီးမီးယားလိဂ်ကတော့ နောက်ဆုံးနေ့အထိ ရသပေးသွားပါပြီ။ အခြားဥရောပလိဂ်တွေထက် ပိုစိတ်လှုပ်ရှားစရာကောင်းတော့ နောက်နှစ်လည်း အားပေးကြအုံးမယ် ထင်ပါရဲ့ဗျာ။

ထိုင်းမှာ ဆေးခြောက်စိုက်ခွင့်ပြု၊

 ၁၉၇၀ ကျော်နှစ်များမှာ ဂျပန်က သူ့ထုတ််ကုန်ပစ္စည်းတွေ ဂျပန်ပြင်ပမှာ ထုတ်ဖို့လိုလာတော့ မြန်မာကိုအရင်ဆုံး လာစည်းရုံးတယ် ပြောကြတာဘဲ။ အဲဒီတုံးက တက်တဲ့ ဂျပန်ဝန်ကြီးချုပ်တွေ မြန်မာပြည်ကို လာလည်ကြတာတော့ မှတ်မိတယ်။

.

မြန်မာ့ဆိုရှယ်လစ်ဆရာကြီး ဗိုလ်နေဝင်းက ငြင်းလိုက်လို့ ထိုင်းနိုင်ငံသွားကမ်းလှမ်းတာ လက်ခံလိုက်တယ်တဲ့။ ထိုင်းရဲ့ထွက်ကုန်တွေ တိုးတက်လာတော့တယ်။ ထွက်တဲ့ကုန်တွေ ထိုင်းနိုင်ငံတွင်းသာမက အိမ်နီးချင်း လာအို ကမ်ဘောဒီးယား နဲ့ မြန်မာပြည်ပါ ရောင်းနေရတော့ တိုးတက်နှုန်း ပိုမြန်သွားတာပေါ့။

.

ေဈးကွက်မြင်တတ်တဲ့ ထိုင်းတွေဘဲ။ ခုလည်း လာအုံးမယ်။ နောက်လပိုင်းအတွင်း ထိုင်းမှာ တရားဝင် ဆေးခြောက်စိုက်ခွင့် ပေးပြီတဲ့။ ဆိုင်ရာဌာနက ဆေးခြောက်ပျိုးပင် တသန်း ဝေပေးဖို့ စီစဥ်ထားပြီတဲ့။ ပြောတာတော့ အိမ်သုံးဖို့ပေါ့။ ဒီတခါတော့ အိမ်နီးချင်း သုံးနိုင်ငံသာမက ကမ္ဘာပါဖြန့်ပြီး စီးပွားဖြစ်မှာ မြင်ယောင်မိသေး။ 

.

တခုတော့ စဥ်းစားသင့်တယ်။ ဒီနှစ်လေးငါးဆယ်လုံး ထိုင်းတွေက တော်နေတာလား။ အိမ်နီးချင်းသုံးနိုင်ငံက ညံ့မြဲညံ့နေကြတာလား။ ဖွဘုတ်ပေါ်မှာတော့ မြန်မာတွေ ထိုင်းထက်အပြတ်သာတယ် ရေးနေကြတာဘဲ​ဗျာ။

အမရပူရခေတ် ဝတ်ဆင်ပုံ တံဆိပ်ခေါင်း၊

မြန်မာဝတ်ဆင်မှု စီးရီးအတွက် အမရပူရခေတ် ဝတ်ဆင်ပုံတံဆိပ်ခေါင်း ယနေ့ထွက်ပါတယ်။ ၂၀၀ ကျပ်တန် နှစ်လုံး ကျား မ ဝတ်ဆင်မှုနဲ့ပါ။

.

အစစအရာရာ ပျက်လာတဲ့အချိန်မှာ ထုတ်တာမလို့လား မသိပါ။ စီးရီးရဲ့ အရင်ခေါင်းအစုံတွေမှာ အရောင်တူပါတယ်။ အထဲက အရုပ်သာကွာတာပါ။ အခုတခါမှာ တခေါင်းက နည်းနည်းရင့်ပြီး ကျန်တခေါင်းက နုပါတယ်။ အဝါ အနုနဲ့အရင့်လို့လည်း ပြောနိုင်ပါတယ်။

.

အမရပူရခေတ်လို့ စာတမ်းထိုးထားတာ အဝါနုနဲ့ အမျိုးသမီးခေါင်းမှာ သေးနေပါတယ်။ ၂၀၀ကျပ် 200K ဆိုတာလည်း တခေါင်းမှာ မှင်အနက်၊ တခေါင်းမှာ မှင်အနီနဲ့ရိုက်ထားပါတယ်။ စုတဲ့ဝါသနာရှင်တွေ ပြောသံကြားခဲ့တာက မှင်မထပ်တဲ့ခေါင်းတွေလည်း ပါတယ်တဲ့။ 

.

စာပို့ဌာနက FDC မထုတ်ပါ။ တံဆိပ်ခေါင်းစုသူများ အသင်းကလည်း ကိုဗစ်ကာလကတည်းကစ ထုတ်တာ မတွေ့တော့ပါ။ ပုဂ္ဂလိက ဝါသနာရှင်တွေ ကိုယ်ပိုင်ဒီဇိုင်းနဲ့ FDC လုပ်လာကြတာတော့ တွေ့ရပါတယ်။  

ယူတုမှ ပရိတ်တရားတော်၊

 မြန်မာလို ''ပရိတ်'' ဆိုပြီးဖြစ်စေ၊ အင်္ဂလိပ်လို ''payeik'' ဆိုပြီးဖြစ်စေ ယူတုမှာ ရှာလိုက်တာနဲ့ အစိမ်းရောင်နောက်ခံမှာ ဆရာတော်ကြီးပုံနဲ့ ပရိတ်တရားတွေ တန်းစီထွက်လာပါလိမ့်မယ်။ ပရိတ်ဗီဒီယိုများစွာ တင်ထားကြသလို နာထားသူ(viewer) များစွာရှိတာလည်း တွေ့မှာပါ။ 

.

ရှစ်ဆယ်ခုနှစ်များက မြန်မာပြည်မှာ ပရိတ်နဲ့ပတ်သက်လို့ တန်ခိုးကြီးတယ် ကျော်ဇောခဲ့တဲ့ တောင်တန်းသာသနာပြုဆရာတော် ဦးဥတ္တမသာရရဲ့ ပုံတော်နဲ့ ဆရာတော်ကြီးရွတ်ခဲ့တဲ့ ပရိတ်ကြီး ၁၁သုတ်၊ ဂုဏ်တော်ကွန်ချာနဲ့ ကမ္မဝါတို့ဘဲဖြစ်ပါတယ်။

.

အရင်က ကက်ဆက်ခွေနဲ့ ဖွင့်ခဲ့ကြရတာ။ အင်တာနက်ခေတ်ရောက်မှ ယူတုမှာ တင်ကြတာ။ ပရိတ်တရားများကို ဆရာတော်ကြီးငယ် များစွာရွတ်ခဲ့ကြပေမယ့် တောင်တန်းသာသနာပြု ဆရာတော်ကြီးရွတ်ခဲ့တာကို နှစ်သက်ကြမှန်း သိသာတယ်။ ဆရာတော်ကြီးရွတ်တာကို ဖွင့်ကြသူပေါင်း သန်းချီနေတာသက်သေဘဲ။ 

.

ယူတုဗီဒီယို အများစုက မင်္ဂလာစိန်တေးသံသွင်းက စီစဥ်ခဲ့တဲ့ ကက်ဆက်ခွေကနေ ကူးကြတာ။ အချို့ယူတုဘာတွေဆို ပုံတော်တွေတောင် မပြောင်းဘဲ ကူးတင်နေကြတာ။ ကြည့်သူများတော့ အကျိုးရှိတာပေါ့။

.

ပြဿနာက မူရင်းကက်ဆက်ခွေမှာ အသံအချို့ နှစ်နေရာသုံးနေရာမှာ ကျန်နေတယ်။ ဆရာတော်ကြီး အကြိမ်များစွာ ရွတ်ခဲ့မှာပါ။ ကက်ဆက်ပေါ်နေပြီဆိုတော့ အကြိမ်များစွာ အသံဖမ်းခဲ့ကြမှာပါ။ မြန်မာတွေ ပရိတ်တန်ခိုးကို အပြည့်ရဖို့ကံ မပါတော့ စာကျနေတဲ့ပရိတ်ခွေကိုဘဲ အကြိမ်များစွာ နာရသလိုဖြစ်နေတယ်။

.

ဗီဒီယိုအက်ဒစ်လုပ်တတ်သူများက အမှန်ဖြစ်အောင် ပြန်ပြင်ပေးရင်ကောင်းမယ်။ မြန်မာ့တီဗီက မနက်၆နာရီမှာ လွှင့်လေ့ရှိတဲ့ ပရိတ်တရားမှာ ပြင်ထားပြီးသား လွှင့်ပါတယ်။ အသံ အနည်းငယ်မတူတော့ သိသာပါတယ်။ ဖြတ်ညှပ်ကပ် လုပ်ပေးရမှာပေါ့။ 

.

ပရိတ်ရွတ်ထားတာ ဆရာတော် များစွာရှိပေမယ့် ပရိတ်နဲ့ ရေဆူဆရာတော်လို့အထိ နာမည်တွင်ခဲ့တဲ့ တောင်တန်းသာသနာပြုဆရာတော်ကြီး ဦးဥတ္တမသာရရဲ့ ပရိတ်ကိုမှ နာချင်တဲ့၊ နာလေ့ရှိတဲ့သူတွေအတွက် များစွာစိတ်ချမ်းသာရမှာမလို့ တတ်ကျွမ်းသူများ လုပ်ပေးစေချင်ပါတယ်။

ကုန်းဘောင်ခေတ်ဝတ်ဆင်မှု တံဆိပ်ခေါင်း၊

 

မြန်မာဝတ်စားဆင်ယင်မှုစီးရီး စတုတ္ထခေါင်းအဖြစ် ကုန်းဘောင်ခေတ်ဝတ်စားဆင်ယင်ပုံ ယနေ့ထုတ်သည်။ စီးရီးပီသစွာ ယခင်ခေါင်းများကဲ့သို့ပင် ကျားနှင့်မ သေချာကြည့်ခွဲရသည်။ အရောင် ပိုမှိန်သွားသည်လို့ ထင်မိသည်။ ကုန်းဘောင်ခေတ်ဝတ်စားဆင်ယင်မှု ဟု မြန်မာလိုသာပါပြီး အင်္ဂလိပ်လို မပါပါ။ 

.

၂၀၀ကျပ်တန် တံဆိပ်ခေါင်း နှစ်မျိုးထုတ်သည်။ FDC မထုတ်ပါ။ အထူးတံဆိပ်တုံး နှိပ်ပေးပါသည်။ ဤစီးရီးအဖြစ် ကိုလိုနီခေတ်ဝတ်စားဆင်ယင်မှု တံဆိပ်ခေါင်း ထွက်မလား မသိကြပါ။ 

.

ပုံမှ FDC သည် ပြင်ပဝါသနာရှင်တဦး၏ လက်ရာဖြစ်သည်။ 

22-2-2022

 oh..... Today is TwosDay.

စိန်ရတုပြည်ထောင်စုနေ့ တံဆိပ်ခေါင်း၊

၇၅နှစ်မြောက် ပြည်ထောင်စုနေ့ စိန်ရတုသဘင် အထိမ်းအမှတ် တံဆိပ်ခေါင်းထွက်ပါတယ်။ ၂၀၀ ကျပ်တန် သုံးခေါင်းပါ။ FDC မထွက်ပါ။

.

ထုံးစံအတိုင်း ဖိုတိုရှော့ပုံနဲ့ ပစ္စလက္ခ ထုတ်တာပါ။ နှစ်ခေါင်းက လုံးဝနီးပါး ဆင်တူနေလို့ မှားကပ်မိသံ ကြားခဲ့ရတယ်။ ရောင်းသူဝန်ထမ်းတွေလည်း မှားမှာစိုးလို့ သုံးယောက်က တမျိုးစီခွဲရောင်းရတယ်။ ''ဒီနေ့ထွက်တံဆိပ်ခေါင်း တစုံပေးပါ'' ဆိုပြီး ဝယ်လို့မရဘူး။ တလုံးစီ သုံးကြိမ် ခွဲဝယ်ရတယ်။ လူမများလို့သာ တော်တော့တယ်။

.

ဆင်တူ တံဆိပ်ခေါင်း နှစ်လုံးကို သေချာကြည့်ပါ။ စာတွေထိုးထားတာ ရုံးအမိန့်စာလိုဘဲ။ နိုင်ငံနာမည်က နှစ်ဘာသာနဲ့။ ပြည်ထောင်စုနေ့ စိန်ရတုဖြစ်ကြောင်းက မြန်မာလို။ နေ့စွဲနဲ့ဖျက်တုံးကို အင်္ဂလိပ်လို လုပ်ပေးထားတော့ ပြည်ပစုသူတွေလည်း သိနိုင်လို့ တော်သေးတယ်။

.

အခုနောက်ပိုင်း ဒီဇိုင်းတွေညံ့ပေမယ် စက္ကူသား ပုံနှိပ်မှင် နောက်ဖက်ကော်နဲ့ ပါဖိုရေးရှင်း ခွေးသွားစိတ်တွေ ကောင်းလာတာတော့ အသိအမှတ် ပြုရပါမယ်။ 

ဝူဟန်ကို​ဗစ် ဖေဖော်ဝါရီ ကိုး၊

ကမ္ဘာကြီးပေါ်မှာ #ဝူနာ သန်းလေးရာ ကျော်သွားပြီ။ ကမ္ဘာ့လူဦးရေ ခန့်မှန်း ရှစ်ဘီလီယံလောက်ဆိုတော့ လူနှစ်ရာမှာ တယောက် ဝူတဲ့သဘောဘဲ။ မြန်မာ အန္ဒိယနဲ့ အာဖရိကနိုင်ငံလို တော်တော်များများက စာရင်းမှန်မရနိုင်လို့ ဒါ့ထက်များဖို့ဘဲ ရှိပါတယ်။ နိုင်ငံငယ်တွေဖြစ်တဲ့ ဟော်လန်ဆို လေးယောက်မှာတယောက်၊ အစ္စရေးဆို သုံးယောက်မှာတယောက်လောက် ဝူခဲ့ကြတာ။ 

.

#ဝူဟန်ကိုဗစ် မျိုးစိတ်ကွဲ အိုမိုင်ခရွန် ပေါ်လာတော့ ဝူနာအရမ်းများလာတာကို အနီကွက်ပုံထဲမှာ တွေ့ရမှာပါ။ တနေ့ကို လေးသန်းနီးပါးအထိ ကပ်လာတာ။ အိုမိုင်ခရွန်က လူကိုအပြင်းအထန် ဒုက္ခမပေးတာရယ် ကာကွယ်ဆေး အစွမ်းတွေကြောင့်ရယ် သေဆုံးသူ အချိုးကျ တက်မလာတာကိုလည်း တွေ့ရမှာပါ။ ဒါပေမယ့် ကိုဗစ်ကြောင့် သေသူ ငါးသန်းကျော် ရှိခဲ့ပြီ။ 

.

အတက်ဆုံးအချိန်မှာ ဝူနာအများဆုံး၊ သေဆုံးသူအများဆုံးနိုင်ငံ အမေရိကန်မှာ တရက်တသန်းဝူတယ်လို့ သတင်းအချို့က ဆိုပေမယ့် Worldometer စာရင်းအရ ခုနှစ်သိန်းခန့်က အများဆုံးဝူခဲ့တာပါ။ အဲဒီရက်များအတွင်း တရက်ထဲ တသိန်းကျော် ဝူတဲ့နိုင်ငံ နှစ်ဆယ်ကျော်ခဲ့ပေမယ့် ဒီကပ်ဆိုးကြီး စဖြစ်ခဲ့တဲ့ တရုပ်ပြည်ကတော့ စဖြစ်ချိန်ကနေ ယခုအထိ နှစ်နှစ်အတွင်း တသိန်းတသောင်းမပြည့်သေးတာ အံ့ဩစရာ။

.

ကာကွယ်ဆေးတွေက ရောဂါဖြစ်ချိန် ကြာမြင့်လာလို့ နောက်အကျော့တွေ ထိုးနေကြရပါပြီ။ တချို့ဆို စတုတ္ထအကြိမ် ထိုးရတာတွေတောင် ရှိနေပေမယ့် တကြိမ်မှမထိုးရသေးသူတွေ အများကြီး ရှိနေပါသေးသတဲ့။ မြန်ပြည်မှာလည်း အစိုးရအစီအစဥ်နှေးနေလို့ ကွကိုယ်ရှာထိုးနေကြရတယ်။

.

မြန်ပြည်မှာ စာရင်းအမှန် မရနိုင်ပါ။ မနေ့ကအထိ ငါးသိန်းလေးသောင်းခန့် ဝူခဲ့ပြီး နှစ်သောင်းခန့်သေဆုံးခဲ့တယ် ဆိုပေမယ့် မနှစ်ဇူလိုင် ဩဂုတ်မှာ စာရင်းအမှန် မရနိုင်တာ လူအများမှတ်မိကြမှာပါ။ ယခုလည်း ကူးစက်မြန် အိုမိုင်ခရွန် စပြန့်နေပေမယ့် အများစု ပြင်းထန်စွာခံစားရတယ်တော့ မကြားရသေးပါ။ ဒီရက်ပိုင်းအတွင်း ဝူဟန်ကိုဗစ် မြန်မာပြည်အတွက် အဆုံးအဖြတ်ဖြစ်လာတော့မှာပါ။

.

အိုမိုင်ခရွန်က ပျော့တယ်ဆိုပေမယ့် မပေါ့စေချင်ပါ။ ပြင်းထန်စွာ ခံရသူအချို့ ရှိနေပါသေးတယ်။ ကာကွယ်ဆေးထိုးထားပြီးသူ၊ အရင်က ကိုဗစ်ဖြစ်ထားသူတွေလည်း ကူးစက်ခံရကြောင်း ကြားနေရတယ်။ ဒီတော့ အပြင်ထွက်ရင် မတ်စ်​်တပ်ပါ၊ အခွင့်ရရင် လက်ဆေးပါ။ လူအများကြား တတ်နိုင်သမျှ ရှောင်ကြပါအုံး။

.

ဝူဟန်ဘေးကင်းဝေးကြပါစေ။

လွတ်လပ်ရေးနေ့တံဆိပ်ခေါင်း၊

 

၇၄ကြိမ်မြောက် လွတ်လပ်ရေးနေ့ အထိမ်းအမှတ် တံဆိပ်ခေါင်း ထွက်ပါတယ်။ ထုံးစံအတိုင်း ပိုစတာပုံတွေနဲ့ ၂၀၀ ကျပ်တန် သုံးခေါင်းပါ။

.

ဒီတခါ ပိုဆိုးတာက နီးမှ တက်သုတ်ရိုက် ထုတ်လိုက်ရပုံပါ။ တံဆိပ်ခေါင်းထွက်ဖို့ နှစ်ရက်အလိုမှ သတင်းစာမှာ ကြေညာနိုင်ပါတယ်။ FDC ရိုက်ဖို့ အချိန်မရှိလို့ မထုတ်တော့တာဖြစ်နိုင်ပါတယ်။

.

ပုံတွေက အရင်နှစ်တွေကလိုဘဲ ပိုစတာပုံတွေ သုံးတာပါ။ ဒါပေမယ့် ဒီနှစ်ခေါင်းတွေကြည့်ရတာ အရင်နှစ်တွေကလို သေချာဒီဇိုင်းလုပ်ချိန်မရလို့ ရှိပြီးသားပုံပေါ် ဖိုတိုရှော့နဲ့ စာတွေတပ်လိုက်ပုံပါဘဲ။ သုံးလုံးတစုံလို့ပြောရအောင် ဒီဇိုင်းဆင်တူမှု တခုမျှ မရှိပါ။ သေချာစီစဥ်တာဆိုရင်တော့ လေးစားပြီလေ။