aplar ----------------- အာပလာ: April 2020

30 April 2020

မိုးလေဝသဆရာကြီးကို သတိရမိချိန်

တကယ်တမ်းစစ်ကြည့်တော့ ဝူဟန်ကိုဗစ်ဗိုင်းရပ်စ်သာ ဒုက္ခမပေးဘူးဆိုလျှင် ဒီနှစ်နွေက အရင်နှစ်တွေထက် သက်သာသည်ထင်သည်။ ရန်ကုန်တွင် အပူစံချိန်သစ်တင်ခဲ့သော်လည်း ပူသည့်ရက် အရင်နှစ်တွေထက်နည်းတာ သေချာသည်။ ဆောင်းအငွေ့က ဧပြီလဆန်းထိရခဲ့သလို မိုးကစောနိုင်သေးသည်တဲ့။ သို့သော်လည်းလေ....
.
ယခုနှစ် မိုးအဝင် စောမစော၊ လေမုန်တိုင်းဘယ်နှစ်ကြိမ် ဘယ်အချိန် ဝင်မလည်း၊ လူတွေသိချင်နေကြပြီ။ ဒီနှစ် မိုးဦးကောင်းမှာလား၊ နောက်နှစ် အယ်နီညိုလာမှာလား၊ ဒါတွေကိုသိချင်လာတော့ မိုးလေဝသဆရာကြီးဦးထွန်းလွင်ကို သတိရလာမိပါသည်။
.
ဟိုးအရင်က မိုးလေဝသကို လူတွေစိတ်မဝင်စား။ ဂရုစိုက်ရကောင်းမှန်း မသိခဲ့ကြ။ မဆလခေတ်ကပင် မိုးလေဝသဌာနမှ တာဝန်ရှိလူကြီးများ သုံးလေးလတခါ ပြည်သူပိုင်သတင်းစာများမှာ မျက်နှာပြည့်ဆောင်းပါးများ ရေးခဲ့ဘူးပါသည်။ ဦးထွန်းလွင်တို့ဆရာကြီး ဦးသုတကိုတော့ မှတ်မိသည်။ ဆုံးအောင်ဖတ်ကြည့်သူပင် ရှိရဲ့လားမသိ။
.
၉၀ခုနှစ်လောက်တွင် မိုးလေဝသ လပတ်ခန့်မှန်းချက်ကို MRTV မှ တလတခါ စလွှင့်သည်။ ဦးစီးအရာရှ်ိဦးထွန်းလွင်ရဲ့ အက်တက်တက်အသံဖြင့် ''ကျန်းမာတော်မူကြပါစခင်ဗျာ။'' ဆိုတဲ့နှုတ်ခွန်းဆက်အသံ လူတွေမှတ်မိကုန်သည်။ လကုန်ရက်တိုင်း စောင့်ကြည့်ရသည်အထိ ဖြစ်ကုန်ပါသည်။ လူတွေစိတ်မဝင်စားခဲ့သော၊ လူတွေအတွက် အရေးကြီးသော မိုးလေဝသပညာကို လူအများစုကြီး စိတ်ဝင်စားလာအောင် လုပ်နိုင်ခဲ့ပါပြီ။
.
နောက်ပိုင်းတော့ ဆရာကြီး၏ မိုးလေဝသခန့်မှန်းချက်တွေကို ပြင်ပစာနယ်ဇင်းများတွင် မြင်တွေ့လာရသည်။ ဖေ့ဘုတ်ပေါ်လာသောအခါ အမြင့်ဆုံးသို့ ရောက်ရှိသွားတော့သည်။ ဖော်လိုဝါသန်းချီသည့်အပြင် မေးခွန်းမေးသည့် ကွန့်မန့်များ ပို့စ်တိုင်းတွင် သောင်းချီနေသည်။ ထင်ပါသည်။ မိုးလေဝသနှင့်ပတ်သက်လျှင် မြန်မာမှာမဆိုထားနှင့်။ ကမ္ဘာမှာပင် ဆရာကြီးလောက် လူထုကိုစွဲဆောင်နိုင်သူ ရှိမည်မထင်ပါ။
.
အကြောင်းပြချက် အများကြီး ရှိနိုင်ပါသည်။ ပထမဆုံးအချက်က ဆရာကြီး၏ ပညာပြည့်ဝမှုပါ။ သို့သော်လည်း ဆရာကြီးလို ခန့်မှန်းတွက်ချက်နိုင်သူမျိုး အရင်ကလည်း ရှိခဲ့နိုင်သည်။ ယခုလည်း ရှိနေနိုင်ပါသည်။
.
သို့သော် တင်ဆက်မှု presentation တွင် မည်သူမျှ မမှီခဲ့။ ဆရာကြီးရဲ့ဟန်၊ ဆရာကြီးရဲ့အသံက လူထုကိုစွဲဆောင်နိုင်ခဲ့သည်။ အစောကပြောခဲ့သလို တီဗီတွင်စမြင်လိုက်ချိန်တွင် ကြိမ်လုံးတုတ်လေးကိုင်၊ ခါးလေးညွတ်ပြီး ကျန်းမာတော်မူကြပါစခင်ဗျာ ဆိုကတည်းက ပေါက်တော့သည်။ ကြော်ငြာတောင် ရိုက်ရသေးဟု မှတ်မိနေပါသည်။
.
နောက်တချက်က ဟာသအနုပညာပါ။ ဆရာကြီးတွင် ဟာသအခံရှိနေသည်။ အရင်က လွန်စွာပျင်းစရာကောင်းသည်ဟု ထင်ခဲ့သည့် မိုးလေဝသကို မပျင်းရအောင် စွဲဆောင်နိုင်ခဲ့သည်။ ဟောပြောပွဲများနှင့် စာရေးရာတွင်လည်း ရယ်စရာစွက်ပြောနိုင်သဖြင့် လူအများအကြိုက်ဖြစ်ခဲ့ရသည်။
.
ယခု မိုးလေဝသခန့်မှန်းချက် သိချင်လျင် ဘယ်ကြည့်ရမည် မသိတော့။ မိုးလေဝသဌာနမှ နေ့စဥ်ထုတ်ပြန်နေသော်လည်း ရုံးစာပုံဖြစ်နေသဖြင့် စိတ်မဝင်စားကြ။ ဆရာကြီးရဲ့ ဖေ့ဘုတ်ပို့စ်လေးတွေကို ယခုလို မိုးဦးလေဦးမှာ ပိုသတိရနေကြမှာ အသေအချာပါ။ ဒါ့အပြင် ဆရာကြီးပြောခဲ့တဲ့ ဂေါက်သီးပြိုင်ပွဲဆုကြီးအကြောင်းနဲ့ ရွာရန်ရာနှူန်းငါးဆယ်ဖြစ်ပါသည် ဆိုတဲ့အကြောင်းတွေလည်း သတိရနေမိကြောင်းပါဗျာ။ ။

24 April 2020

Qစခန်းများမှာ ကုန်ကျငွေကောက်သင့်

ကမ္ဘာအနှံ့ပြန့်နေတဲ့ ကိုဗစ်19ဗိုင်းရပ်စ်က နောက်ကျသော်လည်း မြန်မာပြည်သို့ ရောက်လာပြီဖြစ်ပါတယ်။ အစိုးရနှင့်တကွ ကျန်းမာရေးဝန်ထမ်းများ၊ လုပ်အားပေးများနှင့် ပြည်သူများစုပေါင်း ဆောင်ရွက်မှုကြောင့် တော်တော်ထိန်းထားနိုင်တာလည်း တွေ့ရပါတယ်။
.
အထူးသဖြင့် ပြည်ပမှပြန်လာသူများကို Qထားကြရမှာ ကျေးရွာများအထိ ပါဝင်ခဲ့ကြရပါတယ်။ ရွာအပြင်မြို့အပြင်တွေ သို့မဟုတ် သတ်မှတ်နေရာတွေမှာ မိမိအစီအစဥ်တွေနဲ့ ဆောင်ရွက်ခဲ့ကြတာ တက်ညီလက်ညီပါဘဲ။ အလှူရှင်များလည်း မြို့ရွာအနှံ့ ပေါ်ပေါက်လာကြပါတယ်။ သာဓုအကြိမ်ကြိမ် ခေါ်မိပါတယ်။
.
ကိုဗစ်ကို ရင်ဆိုင်ဖို့ ဘယ်လောက်ကြာမယ် ဘယ်သူမှ မခန့်မှန်းနိုင်သေးပါဘူး။ ရေရှည်ကြာနိုင်တဲ့အတွက် ဆန္ဒပြုချင်တာလေးတခု ပြောချင်ပါတယ်။
.
မြန်မာနိုင်ငံသားတွေကို ပြန်လက်ခံတာ ဝူဟန်မှာဘဲ ကိုဗစ်ပြန့်ကတည်းကပါ။ ကျောင်းသားတွေကို ပြန်ခေါ်တာ တော်တော်စောခဲ့ပါတယ်။ သူတို့ကစပြီး ခုအချိန်ထိ Qထားသူတွေကို နိုင်ငံတော်နဲ့ အလှူရှင်တွေကဘဲ တာဝန်ယူခဲ့တာ အများစုဖြစ်ပါလိမ့်မယ်။
.
ဒီနေ့ဘဲ မကြာခင်အတွင်း စင်ကာပူမှာ သောင်တင်နေတဲ့ မြန်မာတွေသွားခေါ်မယ်လို့ မြန်မာ့လေကြောင်းက ကပ္ပတိန်တဦးက ပို့စ်တင်ပါတယ်။ လုပ်သင့်တဲ့ အလုပ်ပါ။ ဒီလကုန်ရင် ထိုင်းဘက်က ကန့်သတ်ချက်ပြည့်ပြီမို့ ထိုင်းမှမြန်မာတွေ အများကြီး ပြန်လာနိုင်ပါသေးတယ်။ ဒီလိုပြန်လာသူအားလုံးကို ကြိုဆိုရမှာဖြစ်သလို Qလည်းထားရမှာဖြစ်ပါတယ်။
.
ဒီတခါ ပြန်လာသူများကို Qစခန်းများမှာ ကုန်ကျငွေ မျှထည့်ခိုင်းသင့်ပါတယ်။ ဟိုတယ်အဆင့် နေလိုသူတွေကိုလည်း ကုန်ကျငွေ ပေးချေစေသလို အခြားစခန်းများမှာလည်း သင့်တင့်သော နှူန်းထားဖြင့် ကောက်သင့်ပါပြီ။ အထူးသဖြင့် လေယာဥ်နဲ့ ပြန်လာသူတွေကိုပါ။ ဘုန်းကြီးကျောင်း တရားစခန်းများမှာ နေသွားသူတွေကိုလည်း အလှူငွေကောက်သင့်ပါတယ်။ တရားစခန်းဝင်တောင် ငွေလှူရသေးတဲ့ဥစ္ဆာ။
.
ဒီလိုကောက်ခံခြင်းအားဖြင့် ရတဲ့ငွေကို မြေပေါ်မှပြန်လာသူတွေထဲက မတတ်နိုင်သူများအတွက် သုံးသင့်ပါတယ်။ မဟုတ်ပါက ရေရှည်မှာ အလှူရှင်နည်းပါးသွားရင် ကာမိမှာမဟုတ်ပါ။ နိုင်ငံတော်ဘဏ္ဍာကို ကုသရေးစားရိတ်အပါအဝင် တခြားနေရာတွေမှာလည်း ပိုသုံးနိုင်မယ် ထင်မိလို့ပါဗျာ။

17 April 2020

သမတကြီးရဲ့ လွတ်ငြိမ်းခွင့်အမိန့်

ယနေ့ မြန်မာနှစ်ဆန်းတရက်နေ့မှာ သမတကြီးဦးဝင်းမြင့်အမိန့်နဲ့ လွတ်ငြိမ်းချမ်းသာခွင့်တွေပေးခဲ့ပါတယ်။ မြန်မာတွေက ဗုဒ္ဓဘာသာဝင်များပီပီ မြန်မာနှစ်ဆန်းတရက်နေ့မှာ ကုသိုလ်ယူသောသဘောဖြင့် ငါးတွေလွှတ်ကြ၊ ငှက်တွေလွှတ်ကြ၊ တိရိစ္ဆာန်တွေဘေးမဲ့ပေးကြ အလှူပြုတတ်ကြပါတယ်။
.
ဒီသဘောအတိုင်းဘဲ နှစ်ဆန်းရက်တွေမှာ အကျဥ်းကျနေသူတွေကိုလည်း လွှတ်ငြိမ်းခွင့် ကြေငြာလေ့ရှိပါတယ်။ ဟိုပါလီမန်ခေတ်ကစလို့ စစ်အစိုးရခေတ်အထိ အဆက်ဆက်ပါဘဲ။
.
စစ်အစိုးရခေတ် လွတ်ငြိမ်းခွင့်တွေမှာတော့ ရောသကောတွေပါတတ်လို့ အမြဲအပစ်ပြောခံရတတ်ပါတယ်။ သေဒဏ်ကျသူတောင် ၇နှစ်လောက်နဲ့ လွတ်လာတတ်လို့ ပြက်ရယ်ပြုစရာ ဖြစ်ခဲ့ပါတယ်။ သူတို့လွှတ်ချင်သူများကိုလည်း ရောလွှတ်ခဲ့ဟန်တူပါတယ်။ ဖမ်းချင်လည်း ဥပဒေပဖမ်းပြီး လွှတ်ချင်လည်း လွှတ်ခဲ့ကြတာပါ။
.
ယခုတခေါက် လွှတ်မိန့်ကိုသေချာကြည့်ရင် သမတကြီးလည်း သေမိန့်ပေးချင်ဟန်မတူပါ။ သေဒဏ်ကို လွတ်ရက်မရှိထောင်အဖြစ် ပြောင်းပေးခဲ့ပါတယ်။ နှစ်ကြီးသမားတသက်တကျွန်တွေကိုလည်း နှစ်လေးဆယ်အထိ လျော့ပေးခဲ့ပါတယ်။ ဒါပေမယ့် အရင်ကလျော့ခွင့် ခံစားထားသူတွေမပါအောင် သေချာထိန်းထားတာ တွေ့ရပါတယ်။ ကျန်သူများကိုတော့ ထောင်ကျရက် လေးပုံတပုံလျော့ပေးခဲ့ပါတယ်။
.
အခုတခေါက် အကျဥ်းသားနှစ်သောင်းငါးထောင်ခန့် လွှတ်ခဲ့ပါတယ်။ ကိုဗစ်၁၉ပြန့်နေချိန် လူနေစိတ်တဲ့ထောင်ထဲမှာ အလွယ်တကူပြန့်နိုင်တာမလို့ အချိန်ကိုက်ပါဘဲ။ ဒါ့အပြင် ပစ်ဒဏ်ကျခံနေရတဲ့ နိုင်ငံခြားသား ၈၇ဦးကိုလည်း အပစ်မှလွှတ်ပြီး ပြည်နှင်ဒဏ်ပေးခဲ့ပါတယ်။
.
အခုလို စံနစ်တကျ စိစစ်ပြီးလုပ်ခဲ့တဲ့အတွက် သာဓု သာဓု သာဓုပါ သမတကြီးခင်ဗျား။

မြန်မာနှစ်သစ်ကူး ဆုတောင်း၊

10 April 2020

Covid19 သင်နဲ့နီးလာပါပြီ၊

မနေ့က မြန်မာနိုင်ငံမှာ ကိုဗစ်လူနာ ငါးဦးတိုးပါသည်။ ပေါ့တိပေါ့ဆနေလေ့ရှိသော မြန်မာတို့အနီးသို့ တဖြေးဖြေးနီးလာပါပြီ။ ဗိုင်းရပ်စ်ရုတ်တရက် ပြန့်ပွားခြင်း(out break) ထက် ပြင်ဆင်ချိန်ပိုရသဖြင့် ကံကောင်းတာဟု ကြံဖန်တွေးမိရပါသည်။
.
မနေ့ည ၈နာရီကြေငြာသော လူနာအမှတ်(၂၃)သည် ချင်းပြည်နယ် တီးတိန်မှ လူနာအမှတ်(၁)၏ အမေဟုသိရသည်။ ရောဂါလက္ခဏာ ပြလို့စမ်းတာ မဟုတ်ပါ။ ကြည့်ရသည်မှာ ယခင်က လူအင်အား စမ်းသတ်ပစ္စည်းအနေအထားအရ ရောဂါလက္ခဏာပြမှ စမ်းပုံရသည်။ ယခုနောက်ပိုင်း တရုပ်ပြည်မှ အကူအညီအင်အားရလာတော့မှ လူနာနှင့်ထိတွေခဲ့၍ ကွာရန်တိန်းခံထားရသူများကိုပါ ၁၄ရက်ပြည့်ကာနီးစမ်းသတ်ပြီး တွေ့သွားပုံပါသည်။ အခြားပတ်သက်ခဲ့သူများကိုလည်း စမ်းသတ်နိုင်စေရန် ဆန္ဒပြုပါသည်။
.
အားလုံးကို စမ်းမပေးဘူးလားဟု အပစ်တင်မစောကြစေချင်ပါ။ test kit နှင့် ကျွမ်းကျင်သူအရည်အတွက်က သံသယလူနာတိုင်းလောက် စမ်းဖို့မလွယ်ပါ။ ကမ္ဘာမှာပင် ကိုရီးယားတနိုင်ငံထဲ အများဆုံးစမ်းနိုင်သည်ဟု ကြားမိသည်။ ထို့အပြင် ဤဗိုင်းရပ်စ်က အသစ်ဖြစ်နေသဖြင့် သူ၏လက္ခဏာ၊ ပြန့်ပွားပုံ၊ အသက်ရှင်ပုံများကို အတိအကျမသိကြရပါ။ အနီးဆုံးပုံစံတူသည့် ဗိုင်းရပ်စ်ဖြင့်သာ ခန့်မှန်းလုပ်နေရပုံရသည်။ တကမ္ဘာလုံးမှာပါ။
.
မနက်သုံးနာရီကြေငြာသည့် လေးယောက်ထဲမှ လူနာ(၂၅)နှင့် (၂၆)သည် ပြည်ပသို့မသွားခဲ့။ ကိုဗစ်ရှိသည်ဟု သတ်မှတ်ခံရသည့်လူနာများနှင့် ဘယ်နေရာမှာ ထိတွေ့ခဲ့မှန်း မသိခဲ့ရ။ ပြည်တွင်းတွင် ကူးစက်ခံခဲ့ရတာ သေချာသည်။ ဇစ်မြစ်ကိုတော့ စုံစမ်းဆဲဖြစ်မည်ထင်သည်။
.
ထိုလူနာနှစ်ယောက်ကတော့ မြန်မာတွေအတွက် ခေါင်းလောင်းထိုးလိုက်သံပါဘဲ။ ကိုဗစ်ပိုးရှိမှန်း မသိသောလူသည် သင့်ပတ်ဝန်းကျင်တွင် ရှိနေပြီ။ ကိုဗစ်ကို ကာကွယ်နိုင်သည့်ဆေး၊ ကုသနိုင်သောဆေး မပေါ်သေးသဖြင့် လုပ်စရာတနည်းသာရှိပါတော့သည်။ အပြင်မထွက်ဘဲ မိမိကိုယ်ကို ကျန်းမာအောင်နေဖို့ဘဲဖြစ်သည်။
.
ထပ်မံပြီး ကံကောင်းပြန်ပြီဟု ကြံဖန်တွေးစရာက မြန်မာတို့၏ သင်္ကြန်ပွဲရုံးပိတ်ရက် ယနေ့မှစပြီဖြစ်သဖြင့် ရုံးကိစ္စများ အပြင်ထွက်စရာမရှိတော့။ လက်လုပ်လက်စား နေ့စားများအတွက်လည်း နိုင်ငံတော်နဲ့အလှူရှင်များက စားနပ်ရိက္ခာတွေ ကူညီနေပြီဖြစ်ရာ ဒီဆယ်ရက် အပြင်ထွက်စရာ သိတ်မလိုလောက်ဟုထင်မိပါသည်။
.
တတ်နိုင်သလောက် အပြင်မထွက်ခြင်းဖြင့် မိမိကိုယ်ကို၊ မိမိမိသားစုကို၊ မိမိအိမ်နီးနားခြင်းများကို နောက်ဆုံး မိမိနိုင်ငံက်ို ကာကွယ်ကြပါစို့ဗျာ။

08 April 2020

UK in Myanmar သို့ပေးစာ၊

UK in Myanmar တို့

ကျနုပ် ဆာဟင်နရီဂွတိုနှင့် ဇနီးမဒမ် လေဒီမိတုပ်တို့ အင်္ဂလန်ဘောပွဲများအားပေးရန် တည်ထောင်ထားသော #ဗြိတိသျှဖွတ်ဘောကမ်ပိန်း(မြန်မာပြည်) မှ ကြေငြာပါသည်။

ယနေ့ကမ္ဘာပေါ်တွင် မြန်မာတွေကြောက်ရသော ဦးပိုင်ထက်ဆိုးသော ကိုဗစ်ဆိုသူသောင်းကျန်းနေတာ ကြားသိကြမှာပါ။ ကိုဗစ်ကြောင့် ဘောပွဲတွေရပ်ထားရလို့ ဗီဒီယိုရုံပိုင်ရှင် လေဒီမိတုပ်လဲ ဝင်ငွေမရှိဖြစ်နေပြီ။

ပို၍ဆိုးသည်မှာ ဒီရောဂါ မြန်မာပြည်ထဲမပြန့်ဖို့ဘဲ။ ဆေးရုံဆေးခန်း၊ ကျန်းမာရေးစောင့်ရှောက်မှု ကောင်းလှပါရဲ့ ပြည့်စုံလှပါရဲ့ဆိုတဲ့ သူတို့အင်္ဂလန်ပြည်မှာ လူသောင်းချီရောဂါကူးပြီး လူငါးထောင်ကျော်သေဆုံးခဲ့ပြီ။ ကြည့်ရတာ ဆေးတွေပြည့်စုံသော်လည်း အင်္ဂလိပ်တွေ အနေအထိုင် ညစ်ပတ်ကြဟန်တူရဲ့။ သူတို့ဝန်ကြီးချုပ်ပင် ဆေးရုံတက်နေရပြီတဲ့။

ဒီအင်္ဂလိပ်တွေ အလာခံလို့ မဖြစ်ဘူး။ အင်္ဂလိပ်တွေ မပြောနဲ့၊ ခုရက်ပိုင်း မြန်မာပြည်ထဲ ရောဂါရှိသူတွေ့တာ နှစ်ယောက်က အင်္ဂလန်ပြန်တဲ့။

ဒါကြောင့် ရွာသားတို့ မိမိအသင်းကို ဘယ်လောက်အားပေးကြစေကာမူ ဘောသမားများကို အိမ်လည်မခေါ်ကြပါနဲ့။ မဖိတ်ကြပါနဲ့။ ဘောသမားတွေလည်း ကူးနေလောက်ပြီ။

''ဘယ့်နှယ်အေ၊ အင်္ဂလိပ်တွေ ညစ်ပတ်တာသေချာတယ်။ ဘုရင်မကြီးသား အိမ်ရှေ့စံမင်းသားတောင် ကူးနေပြီတဲ့၊ ဒီမှာသာဆို မင်းသားကို ဖူးဖူးမှုတ်ထားမှာလို့'' မိတုပ်ကတောင် ပြောနေပြီ။

သတိပေးလိုသည်မှာ ရောဂါပျောက်ပြီး ဘောပွဲများပြန်စလို့ အားပေးချင်ရင်တောင် တီဗီနဲ့ခြောက်ပေအကွာမှသာ အားပေးကြရန် #ဗြိတိသျှဖွတ်ဘောကမ်ပိန်း(မြန်မာပြည်) မှ ထပ်ဆင့်သတိပေးလိုက်သည်။ အင်္ဂလိပ်တွေ အားကြီးညစ်ပတ်တယ်။

03 April 2020

COVID19နဲ့ အစိုးရထိန်းချုပ်ပုံများ

ဝူဟန်ကစတဲ့ ကိုဗစ်၁၉ကို အားလုံးသိနေပါပြီ။ မြန်မာပြည်သာမက တကမ္ဘာလုံးလည်း ထိန်းမနိုင်အောင်ပြန့်မှာ (outbreak) စိုးနေကြပါပြီ။ နိုင်ငံတိုင်း မိမိအထွာနဲ့ ကြိုးစားထိန်းနေကြပေမယ့် ထိန်းပုံမတူတာတွေ သတိထားမိပါတယ်။
.
ပထမဆုံးစဖြစ်တဲ့ တရုပ်ပြည်က ကွန်မြူနစ်နိုင်ငံ၊ အာဏာရှင်နိုင်ငံပါ။ ရောဂါစဖြစ်ပြီလို့ သတိပေးတဲ့ဆရာဝန်တောင် အရေးယူခံလိုက်ရသေးတယ်။ နောက်ပိုင်းတကယ်ပြန့်မှန်းသိတော့ မြို့ကိုအဝင်အထွက် ပိတ်လိုက်တယ်။ တအိမ်တက်ဆင်းရောဂါရှိမရှိစစ်နိုင်သလို ရိက္ခာလည်းပို့နိုင်တယ်။ သတ်မှတ်အမိန့် မနာခံရင်လည်း အကျဥ်းရုံးထောင်ချပစ်တယ်။ အာဏာရှင်နိုင်ငံဆိုတော့ ထိန်းသိမ်းရလွယ်တယ်ပြောရမှာပေါ့။
.
ဒုတိယလှိုင်းပြန့်တဲ့ အနောက်ဥရောပနဲ့ အမေရိကားကျတော့ ဒီမိုကရေစီနိုင်ငံတွေ၊ လူ့အခွင့်အရေး အလွန်အော်တဲ့နိုင်ငံတွေ။ မြို့တွေကို အလွယ်တကူ မပိတ်ဆို့နိုင်ဘူး။ တော်တော်ဖြစ်မှသာ ထိန်းလို့ရသွားတာ။ ဒါတောင်ခုထိ အမေရိကားမှာ ထွက်နေကြတုံး။ ထိန်းရခက်သော်လည်း ပညာနဲ့ဘဏ္ဍာတောင့်လို့သာ တော်တော့တယ်။
.
နိုင်ငံမချမ်းသာဘဲ လူဦးရေများတဲ့နိုင်ငံတွေ ထိန်းဖို့ပိုခက်ပါတယ်။ အန္ဒိယဝန်ကြီးချုပ်မိုဒီက စောစောဘဲပိတ်မိန့်ထုတ်တယ်။ မြို့ပေါ်လာအလုပ်လုပ်နေသူတွေ ကိုယ့်အိမ်အပြန် ရောဂါပါမသွားအောင်လုပ်တာ ဖြစ်မှာပါ။ ဒါပေမယ့် နေ့စား၄၅သန်း ကျော်ရဲ့ စားဝတ်နေရေးကို ဘယ်လိုရှင်းကြမယ်မသိဘူး။ အလားတူဘရာဇီးကြတော့ မပိတ်ဆို့တဲ့အပြင် သမတကပါ အပြင်ထွက်ပြနေပါတယ်။ စီးပွားရေးရပ်သွားလို့ မဖြစ်ဘူးတဲ့။ ပုံစံမတူစီမံကြတဲ့ နှစ်နိုင်ငံလုံး လူဦးရေများတဲ့ ဒီမိုကရေစီနိုင်ငံတွေပါ။
.
ပိုက်ဆံလည်းရှိ၊ နည်းပညာလည်းရှိတဲ့ စင်ကာပူလည်း သူ့နည်းသူဟန်နဲ့ ဖြေရှင်းနေရပါတယ်။ အိမ်မှနေအလုပ်လုပ်လို့ရသူတွေ အိမ်ကဘဲလုပ်စေတယ်။ အပြင်မထွက်ရ မသတ်မှတ်ပေမယ့် မိမိအသိနဲ့ ခွာခွာနေခိုင်းတယ်။ ပြည်ပကပြန်လာလို့ အိမ်မှာကြူရသူတွေကိုလည်း သေချာစစ်တယ်။ မလိုက်နာရင် အရေးယူတယ်။ သူတို့ကလည်း နိုင်ငံကျဥ်းတော့ အဆင်ပြေတယ်။ ဆိုလိုတာက တနိုင်ငံသုံးတဲ့ပုံစံကို ပုံတူကူးပြီးလုပ်ဖို့ မဖြစ်နိုင်ဘူး။
.
မြန်မာအစိုးရကလည်း မိမိရှိသမျှ လူအရင်းအမြစ်၊ ပိုက်ဆံအရင်းအမြစ်၊ နည်းပညာအရင်းအမြစ်နဲ့ ထိန်းနေပါတယ်။ ခုချိန်ထိ လုံလောက်ထိရောက်နေပါတယ်။ အရေးကြီးတဲ့အချက်က လူတွေကပူးပေါင်း ဆောင်ရွက်ဖို့ပါဘဲ။ တနေ့က တယ်လီကွန်ဖရန်စ်မှာ အလုံးစုံပိတ်ဆို့မှာမဟုတ်ဘဲ လိုအပ်မှသာ လိုအပ်တဲ့နေရာကို ပြင်ဆင်ပြီးပိတ်ဆို့မယ့်သဘော အမေစုပြောသွားပါတယ်။
.
အရေးကြီးတာက ကျန်းမာရေးဌာနက ညွှန်ကြားချက်တွေကို လိုက်နာဖို့ပါဘဲ။ ခုအချိန်ထိလိုက်နာရမှာကလည်း ခဲခဲယဥ်းယဥ်းမဟုတ်ပါ။ မလိုအပ်ဘဲအပြင် မထွက်ပါနဲ့။ လူစုလူဝေးမလုပ်ပါနဲ့။ အပြင်မှပြန်လာတိုင်း၊ အခွင့်ရတိုင်း သေချာလက်ဆေးပါ။ အစိုးရနဲ့ပြည်သူညီရင် ကိုဗစ်ကိုကျော်ဖြတ်နိုင်မှာပါခင်ဗျား။