ခင်၀မ်း - ၂
ကျွန်တော် ခင်၀မ်း ရူးရူးတော့သည် ။ အပေါင်းအသင်းများကိုလဲ နားထောင်စေခဲ့သည်။ သူငယ်ချင်းများ ဂစ်တာတီးသင်သောအခါ ခင်၀မ်းသီချင်းတီးချင်သဖြင့် ၀င်သင်သည် ။ Chord လွယ်လွယ်များဖြစ်သော C,D,G,F,Am များတတ်သောအခါ မြို့ထဲကျူရှင်သွားစဉ် သီချင်းစာအုပ် ရှာ၀ယ်သည် ။ Chord များဖတ်လိုက်သော် စိတ်ဓါတ်ကျသွားသည် ။ ကိုယ်မသိသည့် Chord များတွေ့ရသည် ။ F#,Bm,Em ၊ နောင်တော့မှ Key အကြောင်း သိသွားသည် ။ ခင်၀မ်း နဲ့လိုက်ဖက်သော Key များပင် ။
ထိုစဉ်က အင်္ဂလိပ် စာအတော်ဖတ်နေပြီ ဖြစ်သဖြင့် Crazy ဆိုသောစကားလုံးကို သိနေပြီ ။ ယခုခေတ်လို မတွင်ကျယ်သေးသဖြင့် ခင်၀မ်းကို ကိုးကွယ်သည် ဟုသုံးသဖြင့် သူငယ်ချင်းများ နှာခေါင်းရှုံ့ကြသည် ။ မမှု ၊ ဂုဏ်ပင်ယူနေလိုက်သေးသည် ။ တစ်ချို့သူငယ်ချင်းများကို နားထောင်ခိုင်းသောအခါ အပြင်းအထန်ရှုံ့ချကြသည် ။ ဘာတွေဆိုနေမှန်းမသိတဲ့ ။ တစ်ချို့က ပိုဆိုးသေးသည် ၊ ဆိုတာမဟုတ် ၊ ညီးနေတာ စာတမ်းဖတ်နေတာ ဟုအပြောခံရသော် သနားပင်သနားမိသေးသည် ။
နောင်နှစ်အနည်းငယ်အကြာ သိမ်ဖြူလမ်းပေါ်မှ အာကာထွန်း ကား၀ပ်ရှော့ဟု ထင်သည် ။ အဆောက်အဦး အ၀တွင် ကပ်ဖွင့်ထားသော ကက်ဆက်ခွွေ အငှားဆိုင်တွင် ခင်၀မ်းသီချင်းခွေ ကြော်ငြာအသစ်ကပ်ထားသည်ဟု ညီများကပြောသည်။ RC-1 ကျောင်းအသွား သိမ်ဖြူဈေးမှတ်တိုင်တွင်ဆင်း၍ သွားကြည့်မိသည် ။ ပြည်မှာဆောင်း တဲ့၊ အလွန်ပျော်သွားသည် ။ ခင်၀မ်းသီချင်းအသစ်နားထောင်ရတော့မည် ။ အခွေ၀ယ်ရန် ပိုက်ဆံကြိုစုရသည် ။ Hitachi အခွေဖြင့် ၂၅ ကျပ်ကိုချက်ချင်းဘယ်၀ယ် နိုင်မလဲ ။
ကျွန်တော်တို့ အလွန်အကျွန် ဖြစ်နေသည်ကို ကြည့်မရသော သူများက ပြည်မှာဘာဆောင်ရမှာလဲ ၊ ထီးလားဘာလားဖြင့် မခံချင်အောင်ပြောကြသော်လည်း ခင်၀မ်း ရဲ့မွေးရပ်မြေမှန်းမသိခ့ဲ ။ ပထမ အခွေမှ ဧရာ၀တီ သီချင်းကို INTRO မှအစကြိုက်သော်လည်း ဆက်စပ်မစဉ်းစားမိခ့ဲ ။ အခွေထွက်၍ နားထောင်မိသောအခါ အရမ်းကြိုက်သွားသည် ။ နောက်နောင်ထွက်သော အခွေအားလုံးကိုလဲ အားလုံးအရမ်းကြိုက်မိတာပါဘဲ ။ ။
No comments:
Post a Comment
Thank you.