သတိထားမခံရသော သူရဲကောင်းများ

ဝူဟန်မှ ကျောင်းသားများပြန်ခေါ်လာသည့် လေယာဥ်ပြန်ရောက်ပြီ။ ခရီးစဥ်တွင် လိုက်ပါတာဝန်ထမ်းသော ကပ္ပတိန်ကြီးများနဲ့တကွ လေယာဥ်မောင်များ အင်ဂျင်နီယာများ ကျန်လေယာဥ်အဖွဲ့သားများကို ကျေးဇူးတင်ပါသည်။

.
သတိမထားမိကြတာက ထိုလေယာဥ်ပြန်ရောက်မှ အလုပ်လုပ်ရမည့်သူတွေရှိသည်။ လေယာဥ်အတွင်းခန်း သန့်ရှင်းရမည့်သူများနှင့် ဤလေယာဥ်ကြီးကို ခရီးစဥ်များတွင် နောက်တကြိမ်သုံးနိုင်အောင်အတွက် စည်းကမ်းနှင့်အညီ ပြန်ထိမ်းသိမ်းပေးရမည့်သူများပါ။
.
လေယာဥ်ပေါ်မှာ ဝူဟန်ဗိုင်းရပ်စ်နှင့် ထိတွေခဲ့သူများ ပါလာနိုင်သည်။ ထို့အတွက် လေယာဥ်အတွင်းပိုင်းကို သတ်မှတ်စည်းကမ်းများနဲ့အညီ ပိုးသတ်ရမည်။ အလွယ်စဥ်းစားလျှင် လေယာဥ်ခုံအစွတ်များ၊ အခင်းများလဲရမည်။ လေယာဥ်တွင်းသုံးထားသော လေစစ်များလဲရမည်။
.
သာမန်အပြင်လူများမသိနိုင်သော အခြားအလုပ်များလဲ လုပ်ရဦးမည်ထင်သည်။ အဘယ်ကြောင့်ဆိုသော် လေယာဥ်များသည် လေလုံအောင်ပိတ်ထားသော နေရာဖြစ်သဖြင့် ရောဂါဗိုင်းရပ်စ် မကျန်အောင်လုပ်ရမည်မှာ သေချာပါသည်။ သို့မှသာ နောက်ပိုင်းခရီးစဥ်များတွင် စိတ်ချစွာသုံးနိုင်ပါမည်။
.
ပိုသေချာတာကတော့ ထိုအလုပ်လုပ်နေသူများကို လူတွေမသိတော့ခြင်းပါ။ လူအမြင်တွင် တာဝန်ထမ်းသူများကို ဂုဏ်ယူအသိအမှတ်ပြုလေ့ရှိသော်လည်း ယခုအလုပ်များ ဆက်လုပ်နေသူတွေကို သတိမထားမိတော့တာ ပုံမှန်လိုဖြစ်နေပြီ။ သတိထားမခံရသော သူရဲကောင်းများ unsung heroes လို့သုံးလို့ ရမည်ထင်ကြောင်းပါဗျာ။