ကျား(၃)မျိုး တံဆိပ်ခေါင်း၊

၂၀၂၂ စက်တင်ဘာလက ထုတ်ပြီးသော တံဆိပ်ခေါင်း၃လုံးကို ဘလောက်တံဆိပ်ခေါင်းအဖြစ် ပြန်ထုတ်တယ်။ ယခင်ထုတ်စဥ်က ''ဒုတိယအကြိမ်မြောက် အပြည်ပြည်ဆိုင်ရာ ကျားကောင်ရေ တည်တံ့ရေးဖိုရမ် အထိမ်းအမှတ်'' ထုတ်ဝေခဲ့သော်လည်း ယခုတခေါက်ပြန်ထုတ်တော့ ''ကျား(၃)မျိုး'' တံဆိပ်ခေါင်းတဲ့။ မြန်မာရုရှ ချစ်ကြည်ရေးလိုလို တံဆိပ်ခေါင်းတွေလေ။ မူလခေါင်းတွေလောက် ဆေးရောင်မကောင်းပါ။ တခေါင်း ၂၀၀ကျပ် ဖြစ်သဖြင့် စုစုပေါင်း တရွက် ၆၀၀ကျပ်ပါ။ အထူးဖျက်တုံး ထုပေးပါတယ်။ . ဘလောက် တံဆိပ်ခေါင်းတွေ ဆက်တိုက်ထုတ်နေတာ ကြိုဆိုပါတယ်။ သို့သော် အထူးထုတ် အထိမ်းအမှတ်ထုတ်အဖြစ် ထုတ်ခဲ့တဲ့ တံဆိပ်ခေါင်းတွေကို ဘလောက်ပြန်တွဲထုတ်တာတော့ မတွေ့ဘူးသေးပါ။ အထူးထုတ် အထိမ်းအမှတ်ထုတ် ဆိုတာ သူ့နေ့စွဲနဲ့ သူ့ပွဲအတွက် တခါဘဲထုတ်သင့်တယ်လို့ ထင်ပါတယ်။ အဲဒီနေ့မှာ ဘလောက်တံဆိပ်ခေါင်းတွဲ တခါထဲထုတ်ချင်လည်း ထုတ်ပါ။ . အရင်ထုတ်ခဲ့တဲ့ thematic ခေါင်းမျိုးကို တခေါင်းချင်းထုတ်ခဲ့ပြီးမှ ဘလောက်ထုတ်တာ အရေးမကြီးပါ။ အဲဒီခေါင်းတွေအတွက် နေ့စွဲက အရေးမပါ၊ သတ်မှတ်ချက်မရှိပါ။ Commemorative တံဆိပ်ခေါင်းတွေကျ ရက်စွဲက အရေးပါပါတယ်။ ထပ်မထုတ်သင့်ဘူးပေါ့။ . အချို့နိုင်ငံတွေမှာ တခေါင်းချင်း မထုတ်ဘဲ ဘလောက်အဖြစ် တန်းထုတ်တာတွေလည်း တွေ့ဘူးပါတယ်။ တန်ဖိုးနည်း တံဆိပ်ခေါင်း အရွယ်သေးလေးတွေပါ။ သက်ဆိုင်ရာခေါင်းစဥ်တခုအောက်မှာ ပုံအမျိုးမျိုးနဲ့။ လှပါဘိသေးတော့။ . အခုအတိုင်း ဘလောက်တွေ ဆက်ထုတ်မယ်ဆို လွတ်လပ်ရေးနေ့တိုင်း ထုတ်ခဲ့တဲ့ တံဆိပ်ခေါင်း ၃လုံးတွေကိုများ ပြန်ထုတ်ကြဦးမှာလားဗျာ။ မသင့်တော်ပါဘူး။ နောက်ဆုံး တလုံးချင်းထုတ်ထားတဲ့ လိပ်ပြာစီးရီးကလည်း တလုံးပျက်ပြီး ၁၁ခေါင်းဖြစ်နေတော့ ဂွကျနေကြပြီထင်ပါရဲ့။

787 ၊ အီလက်ထရွန်းနစ် ၊ ဝတ္ထု။

လေယာဥ်နဲ့ပတ်သက်တာ ရေးမလို့ပါ။ နည်းနည်းဘဲသိခဲ့ပြီး အခု အတော်များများမေ့ကုန်ပြီဖြစ်တဲ့သူ တယောက်အနေနဲ့ မရေးပါ။ အရမ်း အဖတ်များခဲ့တဲ့ ဝတ္ထုဖတ်သူတယောက် အနေနဲ့ ရေးမှာပါ။ . လွန်ခဲ့တဲ့ နှစ်လေးငါးဆယ်က ဘာသာပြန်တအုပ် ဖတ်ဘူးတာ ပြန်ပေါ်လာတာ။ ဗိုလ်မြင့် ဘာသာပြန်တာ မှတ်မိပေမယ့် စာအုပ်အမည် မမှတ်မိ။ မူရင်းဝတ္ထုနဲ့ ​ရေးသူအမည်တော့ဝေးရော။ နတ်မောက်တိုက်မှာနေတုံးက ဦးကျော်လှိုင်(ပိုက်) စီက ဖတ်တာတော့ မှတ်မိတယ်။ အဲဒီဆရာအိမ်မှာ စာအုပ်တွေ အများကြီးရှိခဲ့တယ်။ . ဇတ်လိုက်က အမေရိကန် သမတတွေ သွားလေရာယူတယ်ဆိုတဲ့ ဘလက်ဘောက်လေး။ အဲ့အချိန်က အရမ်းဟော့ဖြစ်နေတဲ့ နျူကလိယားစစ်ပွဲဖြစ်ဖို့ အမိန့်ပေးနိုင်တဲ့ ဘလက်ဘောက်လေးပေါ့။ . အဲဒီဘောက်က အချက်ပေးလိုက်ရင် လက်ခံပြီး ဆက်ဆောင်ရွက်မယ့် ရီဆီဗာစက်ခန်းက ပင်တဂွန်မှာ ထင်တယ်။ (နှစ်ကြာတော့ အတိအကျ မမှတ်မိပေမယ့် မူရင်းဇတ်လမ်း မထိခိုက်စေပါ။😆) အဲဒီအခန်းထဲမှာရှိတဲ့ ကွန်ပြူတာစက်ကြီးနားမှာ တာဝန်ကျနေတဲ့ တပ်ကြပ်ကြီးက တနေ့ ​ညှော်နံ့လို့အနံ့ ရလိုက်တယ်တဲ့။ သူသေချာ လိုက်စစ်တော့ ဘာမှ မျက်မြင်ထူးခြားမှု မတွေ့ဘူး။ . တကယ်က ကွန်ပြူတာကြီးထဲက ရီစစ္စတာလား၊ ထရန်စစ္စတာလား တခုလောင်သွားတာတဲ့။ (ဝတ္ထုနော် ဝတ္ထု၊ ကျော်လဲ လေးငါးတန်းလောက်ဘဲရှိတော့ ဒါတွေမသင်ရသေး 😄) ။ အဲဒီလိုလောင်ချိန်မှာ ကွန်ပြူတာကို ဘလက်ဘောက်က အနုမြူဗုံးကြဲဖို့ အချက်ပေးသလို ဖြစ်သွားတယ်တဲ့။ ကြဲရမယ့်နေရာက ဆိုဗီယက်ပြည်ထောင်စုမြို့တော် မော်စကို။ . အချက်ပေးတာ ရရချင်း ရောပမှာရှိတဲ့ နေတိုးအဖွဲ့ရဲ့ လေပျံတွေ ထပျံကြတယ်။ မှားအချက်ပေးကြောင်း သိသိချင်းဘဲ ရေဒီယိုနဲ့ဆက်သွယ်ပြီး ပြန်ခေါ်တော့ တစီးကပြန်ခေါ်မရဘူး။ အဲ့ပိုင်းလော့ရဲ့ နားကြပ်ထဲကို ပြန်လာဖို့ အမေရိကန် ကာချုပ်အမိန့်ပေးသံ ဝင်လာချိန်မှာ သူ့ကို ဒီတာဝန်အတွက် လေ့ကျင့်ပေးတုံးက ဆရာတဦးပြောသံ ပြန်ကြားလာတယ်။ ''ဒီ အချက်ပေးသံရပြီးရင် မစ်ရှင်ခိုင်းတဲ့အတိုင်း လုပ်ရမယ်၊ ကြားမှာလာဖြတ်တိုက်မယ့် လေယာဥ်တွေလဲ လွတ်အောင်လုပ်သွားရမယ်။ ဘယ်လို ကြုံတွေ့တွေ့ မရပ်ရဘူး။ ကုန်ကုန်ပြောမယ်၊ အမေရိကန်သမတဆိုပြီး အမိန့်ပေးသံရရင်တောင် ဒါရုရှတွေ အတုလုပ်တာဖြစ်မယ်'' . ဒါနဲ့ အဲ့ဒီပိုင်းလော့က ရေဒီယိုစက် ပိတ်ချလိုက်ပြီး ရုရှလေပျံတွေကို ကျော်လွှားပျံပြီး အနုမြူဗုံးကြဲချလိုက်တယ်။ အမေရိကန်သမတက အချိန်မှီဖုန်းဆက်ပြောလို့ ရုရှခေါင်းဆောင်ကြီး လွတ်သွားပေမယ့် မတော်တဆဆိုတာ ဘယ်လိုမှ မယုံဘူး။ ပြန်ပြီး အနုမြူဗုံးကြမယ်လုပ်တယ်။ အမေရိကန်သမတကဘဲ အနုမြူစစ်ပွဲမဖြစ်အောင် အမေရိကန်မြို့တမြို့ကို အမေရိကန်ကဘဲ ဗုံးပြန်ကြဲရင် ယုံမလားဆိုပြီး ကြဲပြလိုက်တယ်။ အဲ့မြို့မှာ ပထမလေဒီရောက်နေတုံးဆိုတော့ ဇတ်လမ်းလေးပေါ့လေ။ . ဆိုလိုတာက အီလက်ထရွန်းနစ်ပစ္စည်းဆိုတော့ လူမလုပ်ဘဲ လုပ်သလိုဖြစ်သွားနိုင်တယ်ပေါ့။ အခု ပျက်ကျတဲ့ ဘိုအင်း787က ဘိုအင်းရဲ့ တစီးထဲသော fly by wire။ လေယာဥ်ရဲ့ ဖှန်ရှင်တော်တော်များများကို ကွန်ပြူတာတွေကတဆင့် ခိုင်းနေတာ။ ဒီတော့ မတော်တဆ၊ (အတော့ကို မဖြစ်နိုင်တဲ့ မတော်တဆဘဲ ထားပါ) ဝတ္ထုထဲကလို ဆီပိတ်တဲ့ အချက်ပေးမှု လုပ်ဆောင်လိုက်မိရင် အခက်သားကလား။ ပိုင်းလော့တွေ ဖှီဆီကယ်လီး မပိတ်၊ ခလုတ်တွေ နေရာမရွေ့ဘဲ ဒီဂျစ်တယ်ဆစ်ဂနယ်လေး အင်ဂျင်ထိန်းကွန်ပြူတာတွေစီ ရောက်သွားခဲ့ရင်.... . ဒန်တန့်တန်။ လေယာဥ်အကြောင်း သိသူမဟုတ်။ ဝတ္ထုဖတ်သူတယောက် အနေနဲ့ ရေးမိတာပါလို့ ထပ်လောင်း သတိပေးပါရစေ။

ဒေါ်နွယ်ထွမ်းအခွန်၊

သိတ်တော့ နားမလည်ပါ။ ပတ်လည်း မပတ်သက်ပါ။ သို့သော် ထင်တာတော့ ဝင်ပြောကြည့်အုံးမှ။ . ဩဂတ်စ်တရက်နေ့ကစ မြန်မာ့ထုတ်ကုန်တွေကို ဒေါ်နွယ်ထွမ်းက ၄၀% အခွန်ကောက်မတဲ့။ အရင်က ဘယ်လောက်ကောက်လဲ မသိပါ။ မသိတာ ဒီကစပေမယ့် ဒီကိစ္စ မြန်မာနှစ်ခါနာတယ်လို့ ထင်မိလို့ပါဗျာ။ . ဒေါ်နွယ်ထွမ်း ဆော်ချင်တာတော့ တုတ်ကြီးလို့ပြောတာဘဲ။ ဒါပေသည့် သီးသန့် ဒဲ့မဆော်ရဲတော့ ပတ်ဆော်တဲ့သဘောဘဲ။ တုတ်ကြီးရဲ့လုပ်ငန်းရှင်တွေ ပြင်ပနိုင်ငံမှာ ကုန်ချောသွားထုတ်ပြီး အဲ့နိုင်ငံရဲ့ပို့ကုန်အဖြစ် အမေရိကန်သို့တင်သွင်းတဲ့ နိုင်ငံတွေကို အခွန်သိသိသာသာ တိုးကောက်ပါတယ်။ . ကြည့်ရတာ အမေရိကန်နဲ့ နိုင်ငံတနိုင်ငံချင်းရဲ့ ကုန်သွယ်မှုဘဲလဲန့်စ်ကိုကြည့်ပြီး ဒေါ်နွယ်ထွမ်း ဆုံးဖြတ်လိုက်ပုံဘဲ။ အဲဒီမှာ မြန်မာပြည် ပအကြိမ် နာတာ။ ဘာလို့လဲဆိုတော့ မြန်မာပြည်ရဲ့ ပို့ကုန်စာရင်းပေါက်ပေမယ့် တကယ်အကျိုးအမြတ် အများဆုံးရတာ တုပ်ကြီးတို့ကုမ္ပဏီ အများစုပါ။ မြန်မာတွေက လက်ခစားခသာ ရလိုက်တာပါ။ မြန်မာကုမ္ပဏီအနေနဲ့ တိုက်ရိုက်အကျိုးရှိသူ တစ်ရာခိုင်နှုန်းတောင် ရှိပါ့မလား။ အလုပ်သမားခသာ ရလိုက်တာပါ။ . ဒုအကြိမ် နစ်နာတာက အမေရိကန်ပစ္စည်း မြန်မာပြည်သို့ သွင်းကုန်ကိစ္စ။ သွင်းကုန်နည်းနည်းဘဲ ရှိနိုင်ပေမယ့် အဲ့ဒီသွင်းကုန်ရဲ့ အများစုကို အခြားနိုင်ငံမှတဆင့် သွင်းတာ များမယ်။ အထူးသဖြင့် စလုံးကတဆင့်ပေါ့။ ဘာလို့လည်းဆိုတော့ ၈၈နောက်ပိုင်းကတည်းက ဆဲန်ရှင်ပိတ်ထားတော့ တိုက်ရိုက်ဆက်ဆံမှု မရှိတော့ဘဲ တနိုင်ငံငံ ခြားခံပြီးသွင်းနေရလို့လေ။ မြန်မာဝယ်တဲ့ အမေရိကန်ကုန်စာရင်း စလုံးဝယ်တဲ့ သဘောဖြစ်သွားလို့ စလုံးအတွက်ဘဲ အကျိုးရှိမှာပါ။ . ဒီတော့ အမေရိကန် ကုန်သွယ်စာရင်းမှာ မြန်မာပြည်က အဝယ်နည်းပေမယ့် ပို့ကုန်တွေကျ အတော်ပို့သလို ဖြစ်နေမှာဘဲ။ ပုံပါဇယားနဲ့ သတင်းအချို့အရ ခန့်မှန်းရေးတာပါ။ ဖြစ်နိုင်တယ်ဆို ဒေါ်နွယ်ထွမ်းကို ပြောပေးကြပါအုံး။ 😎

ခေတ်အဆက်ဆက် ဘလောက်တံဆိပ်ခေါင်း၊

ယခင် တစုံနှစ်ခေါင်းစီ ထုတ်ထားပြီးတဲ့ ခေတ်အဆက်ဆက် ဝတ်စားဆင်ယင်မှု တံဆိပ်ခေါင်းများကို ဘလောက်တံဆိပ်ခေါင်း အတွဲအဖြစ် ပြန်ထုတ်တယ်။ လောလောဆယ် တတိယမြောက် ဘလောက်တံဆိပ်ခေါင်းပေါ့။ . မှင်ရောင်ပိုထည့်လို့လား၊ အနက်လိုင်း ပိုပေါ်လို့လားတော့ နားမလည်ပါ။ ပြီးခဲ့တဲ့ ဘလောက်တံဆိပ်ခေါင်းထက်တော့ အရောင်ပိုထွက်တယ်။ ၂၀၀ ကျပ်တန် ၁၂လုံးဆိုတော့ ဘလောက်တရွက် ၂၄၀၀ ကျပ်ကျပါတယ်။ အထူးဖျက်တံဆိပ်တုံးလည်း ထုပေးတယ်။ . တခေါင်းစီထုတ်ထားတာ ဘလောက်ထုတ်မယ်ဆို နှစ်မျိုးကျန်သေးတယ်။ ငှက်တံဆိပ်ခေါင်းတွေက ၉လုံးဆိုတော့ သုံးတိုင်သုံးလုံးတန်း ထုတ်ရင်ရမယ်။ စိတ်ဝင်စားမိတာက လိပ်ပြာစီးရီးဘဲ။ ၁၂လုံး ထုတ်မယ်ကြားတာ အကြောင်းတခုခုကြောင့် တမျိုးမထုတ်တော့ ၁၁ခေါင်းကို ဘယ်လို ဘလောက်တွဲမလဲဆိုတာပါ။ . မိမိတဦးထဲသဘောပြောရရင် မထုတ်ဖြစ်တဲ့ လိပ်ပြာခေါင်းပါတွဲပြီး ၁၂လုံး ဘလောက်သာ ထုတ်ပါ။ စုတဲ့သူ သိမ်းချင်တဲ့သူတွေကတော့ ဝယ်ကြမှာပါဘဲ။ တလုံးချင်း မထုတ်ဖြစ်လို့ ဘလောက်မထုတ်ရဘူးလို့ စည်းမျဥ်းရှိမယ် မထင်ပါ။ ကွာလတီလေးသာ ကောင်းအောင်လုပ်ပေးပါလို့ ပြောလိုကြောင်းပါဗျာ။

ဘီး

ဒီနေ့ မြို့ထဲလျောက်ရင်း သတိရလို့ ဒီဘီးလေးဝယ်လိုက်တယ်။ ၅၀၀ ကျပ်တဲ့။ . ဘဝမှာ ဒီဘီးက ဝယ်တာထဲ ပထမဆုံး မဟုတ်တောင် ဒုတိယ တတိယဘဲ။ ငယ်စဥ်က ခေါင်းဖီးလေ့ မရှိ။ လက်နဲ့သပ်ပြီး ကျောင်းသွားတာဘဲ။ အလုပ်ထဲဝင်တဲ့အထိ အိမ်မှာရှိတဲ့ဘီးနဲ့ ဖီးတဲ့အခါ ဖီးပါလိမ့်မယ်၊ သီးသန့် ဝယ်ဘူးတာမမှတ်မိ။ . အလုပ်ထဲ သုံးလေးနှစ်လောက်ကြာတော့ ခရူအတူဆင်းတဲ့ ဘော်ဒါလေးက ''ခင်ဗျားဗျာ၊ အင်ဂျင်နီယာဖြစ်နေပြီ၊ ခေါင်းလေးဘာလေးဖီးပါအုံး'' ဆိုပြီး ဘီးတချောင်း ဝယ်လာပေးလေရဲ့။ လော့ကာထဲထားပြီး သုံးခဲ့တာ အလုပ်က ထွက်တဲ့အထိဘဲ။ . ဒါဆို အိမ်မှာ ဘယ်ဘီးနဲ့ဖီးလည်း မေးစရာရှိတယ်။ အလုပ်ဝင်ပြီး သုံးလေးနှစ်ကစ တနှစ်နှစ်နှစ် တခါလောက် ဟိုတယ်တွေတည်းရတော့ ဟိုတယ်ရေချိုးခန်းထဲ ထားပေးတဲ့ဘီးတွေနဲ့ပါဗျား။ ပြန်ရင်ယူလာပြီး မပျက်မချင်းသုံးတယ်လေ။ . အစောပိုင်းက ဟိုတယ်တံဆိပ်ပါရင် လိုလိုမလိုလို ယူသိမ်းသေးတယ်။ နောက်ပိုင်းကျ ပြည်တွင်းပြည်ပ အတော်များများမှာ တံဆိပ်မပါတော့ မလိုရင် ယူမနေတော့ပါ။ . ကိုဗစ်နဲ့ကိုငြစ်ကြောင့် ခရီးမသွားဖြစ်တာ သုံးလေးနှစ်ဖြစ်တော့ ဖီးစရာ မရှိဖြစ်သွားတယ်။ ဒါနဲ့ အံဆွဲထဲလျောက်ရှာတော့ ကူမင်းဟိုတယ်တံဆိပ်နဲ့ ဘီးတချောင်းတွေ့တယ်။ ပထမဆုံးအကြိမ် ဖီးလိုက်တာနဲ့ ချွတ်ကနဲကျိုးတော့တာဘဲ။ နှစ်သုံးဆယ်ခန့် ရှိပြီကိုး။ ဒါနဲ့ အပြင်အန်ဆွဲထဲက တံဆိပ်မပါတာ ရှာတွေ့တာနဲ့ သုံးနေတာ ဘီးအဆန်လေးတွေ ကျိုးကုန်လို့ အသစ်ဝယ်ဖြစ်သွားတာပါ။ . ပြောချင်တာက ခုမှလာတာ။ ကျော်က စီးပွားရေး စိတ်ပါသူဆိုတော့ စဥ်းစားမိတယ်။ ငါ ပလတ်စတစ်လုပ်ငန်းလုပ်ရင် ဘီးထုတ်လို့မဖြစ်ဘူး။ နှစ်သုံးဆယ်လောက်မှ တချောင်းဘဲ ဝယ်ဖို့လိုတဲ့ဟာမျိုးကြီး။ မဖြစ်ဘူး။ ဒီနေ့ တလက်စတည်း ဝယ်ဖြစ်တဲ့ ဘရပ်ရှ်ကမှ ၁၅၀၀ ကျပ်ပေးလိုက်ရသေး။ ဒီတော့ ထုတ်ချင်းထုတ် ဘရပ်ရှ်ဘဲ ထုတ်မှ။

အိုးခိုင်မော့၊

လွန်ခဲ့တဲ့ ဆယ်နှစ်ဝန်းကျင်က မျက်စိနီလာပြီး ယားယားနေလို့ မျက်စဥ်းခပ်အုံးမှပါဆိုပြီးလိုက်ဝယ်တယ်။ ဆေးဆိုင်တော်တော်များများက မရောင်းကြဘူး။ ဆရာဝန်ညွှန်ကြားလွှာ ယူခဲ့ပါတဲ့။ မတည့်လို့ ဇတ်လမ်းဖြစ်တတ်လို့တဲ့။ . တဆိုင်ကတော့ ဘယ်လိုမျက်စဥ်းလည်းတဲ့။ ငယ်ငယ်က ကြားဘူးတဲ့ တက်ထရာဆိုက်ကလင်းလို့ ပြောလိုက်တော့ မကြားဘူးဘူးတဲ့။ နောက်တဆိုင်ရောက်တော့ မျက်စဥ်းဆေးတော့မဟုတ်။ မျက်စိကြည်ဆေးဆိုပြီး ပုလင်းလေးပြတယ်။ မဂ္ဂဇင်းတွေထဲ ကြော်ငြာမြင်ဘူးတာနဲ့ ဝယ်သုံးကြည့်လိုက်တယ်။ ဗီရိုတိုတဲ့။ . မျက်စိနဲ့ တည့်သွားတယ်ထင်တယ်။ နီတာယားတာ သက်သာသွားတယ်။ အမြဲလည်းမခပ်ဖြစ်ပါဘူး။ သက်သာနေရင် မေ့နေတာပေါ့။ စဝယ်တုံးက တပုလင်း တထောင်ကျော်ဘဲ ပေးရတယ်ထင်တာဘဲ။ . တပုလင်းကိုသုံးတာ နှစ်မချီတောင် လအတော်ကြာပါတယ်။ ဒီတော့ ဈေးတဖြေးဖြေးတက်တာပေါ့။ နောက်ဆုံးဝယ်တာ လွန်ခဲ့တဲ့ လေးငါးလဖြစ်မယ်။ ဘယ်မှာမှ ရှာမရတော့။ ထိုင်းအဝင်ကုန်တွေ ပိတ်ဖမ်းလို့ ပစ္စည်းမဝင်တော့လို့တဲ့။ . ဒီလိုနဲ့ဘဲ တရက်လမ်းလျောက်ရင်း လမ်းဘေးဆေးဆိုင်တဆိုင် ဝင်မေးကြည့်တော့ ရှိတယ်။ တပုလင်း ခြောက်ထောင့်ငါးရာတဲ့။ ဟာ နောက်ဆုံးဝယ်တုံးက သုံးထောင်ကျော်ပါ (တကယ်က သေချာမမှတ်မိ) မများဘူးလားဆိုတော့ ထိုင်းကုန်တွေ ဖမ်းနေလို့၊ ဆိုင်ပေါ်တင်ရင်တောင် လိုက်သိမ်းမယ်တဲ့ဆိုပြီး ရှင်းပြနေတာနဲ့ ဝယ်ခဲ့ရတာဘဲ။ . ပြီးခဲ့တဲ့တပတ်က လဘက်ရည်ဆိုင်ထိုင်ရင်း ဘရိုတယောက်ကပြောတယ်။ သူလိုချင်လို့ ရှာတာ မရတဲ့။ ဒါနဲ့ ညနေလမ်းလျောက်ရင်း အရင်ဝယ်ခဲ့တဲ့ဆိုင် သွားမေးကြည့်တယ်။ . ပစ္စည်း မလာတော့ဘူးတဲ့။ ပစ္စည်းရှိသူကလည်း ဈေးတင်တာ တပုလင်း ကျပ်သုံး/လေးသောင်းမလို့ မတင်တော့ဘူးတဲ့။ အိုးခိုင်မော့ဘဲ။ ပုလင်းသေးလေး၊ ဆယ့်သုံးml ဘဲ ရှိတာ။ ရေမွှေးထက်တောင် တန်နေပြီ။ စီးပွားရေး ဦးမော့လာတဲ့ သဘောများလားမသိ။

ရိုးရာပန်း၁၀မျိုး Block stamp.

တစ်လတစ်ခေါင်းနှုန်းနဲ့ ၂၀၂၀ ခန့်ကထုတ်ဝေခဲ့သော မြန်မာ့ရိုးရာပန်း(၁၀) မျိုး တံဆိပ်ခေါင်းများကို Block set အဖြစ်ပြန်ထုတ်ဝေပါသည်။ ၂၀၀ကျပ်တန် တံဆိပ်ခေါင်း ဆယ်လုံးဖြစ်လို့ တရွက်နှစ်ထောင်ကျပ်ပါ။ . တံဆိပ်ခေါင်း အရည်အသွေးနဲ့ပတ်သက်ပြီး ပြောရမယ်ဆိုရင် စိတ်မပါလည်း မထုတ်ကြပါနဲ့လို့ဘဲ ပြောရမှာပါ။ ခပ်ညံ့ညံ့ကော်ပါသော စာတရွက်ပေါ်တွင် အညံ့စားပရင်တာနဲ့ ပုံနှိပ်ပေးလိုက်တာကမှ တော်ပါဦးမည်။ perforation ခွေးသွားစိတ်စက် မရှိလည်း အပ်ချုပ်စက်နဲ့ဘဲ ဖောက်ပေးလိုက်ကွာလို့ ခိုင်းလိုက်သလား မသိပါ။ ပိုနေသည့် စာရွက်ကိုလည်း ဖြတ်မထားပါ။ . တံဆိပ်ခေါင်း ၂၀၀ကျပ်တန်မလို့ အရည်အသွေးညံ့တာ လက်ခံနိုင်ပါသေးသည်။ သုံးဖို့ထုတ်တာကိုး။ Block stamp ဆိုတာမျိုးက စုဖို့သက်သက်ထုတ်ကြတာပါ။ ဒီကွာလတီမျိုးနဲ့ တံဆိပ်ခေါင်းပြပွဲမှာ ပြကြမှာလား။ ဈေးကွက်မှာ တင်ပြီး ရောင်းကြမှာလား။ နိုင်ငံ့သိက္ခာ မချကြပါနဲ့ဗျာတို့ရယ်။ . ပုံနှိပ်ခ ပစ္စည်းခ ဈေးတွေတက်လာလို့ဆိုလည်း တံဆိပ်ခေါင်းအရွယ်ကို တဝက်သေးလိုက်ပါ။ အရင် တိုင်းရင်းသားအစဥ်သုံး အရွယ်ပေါ့။ ခွေးသွားစိတ်ဖြတ်စက်လည်း ရှိပါလိမ့်အုံးမယ်။ ပုံနှိပ်ဖို့ ဒီဇိုင်းကိုလည်း တရောင်ထဲနဲ့ လှအောင်ထုတ်ရင် ဖြစ်နိုင်မှာပါ။ စာပို့ခ ပြင်လို့မရသေးလည်း မတတ်သာသည့်အဆုံး ၅၀၀ကျပ်တန် တံဆိပ်ခေါင်းအဖြစ် ထုတ်ကြပေါ့ဗျာ။ အခုထုတ်တာတွေလည်း စာပို့ဖို့မဟုတ်ဘဲ ဝါသနာရှင်တွေ စုဖို့သက်သက်ဖြစ်နေတာဘဲလေ။

၁၂လ ပန်းနဲ့ပွဲ Block stamp.

၂၀၁၉တုံးက ထွက်ခဲ့တဲ့ (၁၂)လရာသီ ပွဲတော်နှင့် ပန်းများ တံဆိပ်ခေါင်း ၁၂လုံးကို ဘလောက်ဆက်အဖြစ် ထုတ်တယ်။ မြန်မာ့တံဆိပ်ခေါင်းသမိုင်းမှာ ပထမအကြိမ်ဖြစ်မယ်။ အရင်က မှတ်မိသလောက် မတူတဲ့တံဆိပ်ခေါင်းတွဲထုတ်တာ souvenir sheet အဖြစ်သာ ထုတ်ဘူးတယ်။ ပအကြိမ် မဆလညီလာခံနဲ့ အာဆီယံစာတိုက်ပုံတွေ ထုတ်ခဲ့ဘူးတယ်။ ထုတ်ပြီးသားတံဆိပ်ခေါင်းတွေကို Block set အဖြစ် ပြန်စုထုတ်တာ ဒီတခါ ပထမဆုံးပါ။ . မူလ ၂၀၀ကျပ်တန် တံဆိပ်ခေါင်း ၁၂လုံး ပေါင်းထုတ်တာဆိုတော့ sheet တရွက် ၂၄၀၀ကျပ်ပါ။ FDC မထွက်ပါ။ ဖောမက်အတိုင်းတင်လေ့ရှိတဲ့ Myanmar Post ရဲ့ ဖေ့ဘုတ်မှာတော့ ထုတ်မယ်လို့ ကြေညာပါတယ်။ FDC ထုတ်ရင်လည်း A4 အရွယ် ထုတ်ရပါလိမ့်မယ်။ . တံဆိပ်ခေါင်းဖျက် တံဆိပ်တုံးဒီဇိုင်းက ထူးဆန်းပါတယ်။ တံဆိပ်တုံးအဝိုင်းမှာ ပန်းနဲ့ပွဲတွေ ၁၂ကန့် ကန့်ပြီး ထည့်ထားဟန်ရှိတယ်။ ဘာပုံမှမပေါ်ပေမယ့် စတိုင်တမျိုးပေါ့။ . ဒီနေ့တွက်ကိန်း မှန်သွားတယ်။ FDCလည်း မထွက်၊ တံဆိပ်ခေါင်းကလည်း ဈေးကြီးတော့ လူရှင်းမှာဘဲလို့ တွက်မိတာ။ တနင်္လါနေ့မလို့ ရန်ကုန်ဒေါင်းတောင်းမှာ လူတွေကားတွေ ရှုပ်နေပေမယ့် စာတိုက်ကြီးအပေါ်ထပ်မှာ ၁၁နာရီကျော်ရောက်သွားတာ တယောက်မှမရှိတော့။ . အခုနောက်ပိုင်း မြန်မာ့စာတိုက်က တံဆိပ်ခေါင်း ပုံမှန်ထုတ်လာတယ်။ အစဥ်သုံးတံဆိပ်ခေါင်းစီးရီး အသစ်တော့ မထုတ်သေး။ ကမ္ဘာမှာ တံဆိပ်ခေါင်းစု ခေတ်အစားဆုံးအချိန် ၁၉၈၀/၉၀ နှစ်တွေကသာ ဒီလိုထုတ်ခဲ့ရင် ဘယ်လောက်ကောင်းလိုက်မလဲဗျာ။

ရီပါကပ်ရှင်း၊

အင်္ဂလိပ်လို ရီပါကပ်ရှင်း (Repercussion) ဆိုတာ အပြုအမူတခုပြုလိုက်တာ မထင်တဲ့ရလာဒ် ပြန်ရတာကို ဆိုလိုတာပါ။ မထင်တာပြန်ရယုံတွင်မက မလိုချင်တဲ့ရလာဒ် ပြန်ရတာမျိုးကို ဆိုလိုတာပါ။ . ဒီအချက်ကို အများနဲ့ပတ်သက်သူတွေ သတိထားသင့်တယ်။ ရီပါကပ်ရှင်း ရလာဒ်ရမယ့် အပြုအမူမျိုးဆို မလုပ်လိုက်တာကမှ မိမိအတွက် အကျိုးရှိအုံးမယ်။ မဟုတ်ရင် မိအေးနှစ်ခါနာ။ . ပြီးခဲ့တဲ့ မတ်လ၂၈ရက်နေ့က စစ်ကိုင်းငလျင်ကြောကြောင့် မြန်ပြည်အလယ်ပိုင်းမှာ ပြင်းထန်ငလျင်ကြီး လှုပ်သွားပါတယ်။ အစပိုင်းမှာ တပြိုင်နက်လှုပ်သွားတဲ့ ဘန်ကောက်ငလျင်ကြောင့် ဆောက်လက်စကွန်ဒိုပြိုတာလောက် ကမ္ဘာကမသိကြသေး။ ပြည်ပမီဒီယာတွေမှာလည်း ''မြန်မာပြည်အလယ်ပိုင်းငလျင်ကြောင့်၊ မြန်မာပြည်ငလျင်ကြောင့်'' လို့ဘဲ သုံးကြတာ တွေ့ရပါတယ်။ . ငလျင်လှုပ်ပြီး တပတ်လောက်ကြာတော့မှ မြန်မာဆိုရှယ်စာမျက်နှာတွေမှာ အဲဒီငလျင်ကို ''စစ်ကိုင်းငလျင်'' လို့ မသုံးဘဲ ''မန္တလေးငလျင်'' လို့သုံးဖို့ အမိန့်ထုတ်တယ်ဆိုပြီး ပြန့်လာပါတယ်။ မူရင်းစာကိုတော့ ယနေ့အထိ မတွေ့မိပါ။ . အဲဒီပို့စ်တွေတွေ့မှ ပြန်သတိထားကြည့်မိတယ်။ မျိုးစုံခေါ်နေကြတာပါ။ ပို့စ်တခုမှာဆို ရှေးနှစ်ရာကျော်မှ ယနေ့အထိ နန်းစိုက်ရာနေပြည်တော်တွေ (စစ်ကိုင်း အင်းဝ အမရပူရ ရတနာပုံ မန္တလေး ယခုခေတ်နေပြည်တော်) အဓိကထိခိုက်လို့ ''နေပြည်တော်ငလျင်'' လို့ပင် ခေါ်သင့်ပါသတဲ့။ . အဲ့လိုအမိန့်ထုတ်လို့ဆိုပြီး အရွဲ့တိုက် ''စစ်ကိုင်းငလျင်'' လို့ ခေါ်ကြရေးကြပါတော့တယ်။ အချို့များ # ခံပြီး ဘာစာမှမပါဘဲ #စစ်ကိုင်းငလျင် ဆိုပြီး ပုံထဲကလို ပို့စ်တင်သူတောင် တွေ့ရသေး။ ရီပါကပ်ရှင်းအဖှက် ဖြစ်ကုန်တာပေါ့။ ခေတ်က စာပေစိစစ်ရေးတင်မှ စာရေးလို့ရတဲ့ခေတ် မဟုတ်တော့တာ သတိထားသင့်ပြီ။ အမိန့်တခုထုတ်ယုံနဲ့ တားမရတဲ့ခေတ်။ . အမိန့်ထုတ်ရင်လည်း အဆင်ပြေ အဓိပ္ပယ်ရှိမယ့် အကြောင်းရင်းလေး ပြောပြပေါ့။ ဥပမာ အရင်က စစ်ကိုင်းငလျင် ရှိခဲ့ဘူးလို့ ကွဲပြားအောင်လို့ပါပေါ့။ မဟုတ်လည်း မြန်မာအများစု ယုံနေကြသလို ဗေဒင်ယတျာအတွက်ပါ၊ မန္တလေး ကျိန်းကြေသွားအောင်လို့ပါ စသဖြင့်ပေါ့။ ရှေ့ဖြစ်ဟောဆရာတွေ တွက်ချက်မှုအရ မန္တလေးမှာ အပျက်အစီး များမယ်ဆိုလို့ ဒီငလျင်ကြောင့်ပျက်စီးတာနဲ့ ကြေသွားအောင်လို့ပါဆိုပြီး ထည့်ကြေညာပေါ့။ အဲ့လိုကြေညာရင်တောင် ယုံသူတွေက မန္တလေးငလျင်လို့ ခေါ်ကြသုံးကြအုံးမှာ။ အခုတော့ .....

မြန်မာ့လိပ်ပြာတံဆိပ်ခေါင်း(၁၁)

မြန်မာ့လိပ်ပြာမျိုးစိတ်များ တံဆိပ်ခေါင်း စီးရီးစ်ရဲ့ ဧကဒဿမ ေမြာက် တံဆိပ်ခေါင်း ထွက်တယ်။ ၁၁ လုံးမြောက်ပေါ့။ မှိန်လိုက်တာ မပြောပါနဲ့တော့။ ရောင်းတဲ့ကောင်တာမှာ စမြင်လိုက်တော့ အဖြူပြင်မှာ အစွန်းအချို့ပေနေသလား ထင်ရရဲ့။ ဒီစီးရီးစ်က ၁၂လုံး ထုတ်မှာဆိုတော့ နောက်ဆုံးအလုံးဆို ဖြူဖွေးနေမလား မသိ။ . တံဆိပ်ခေါင်း တန်ဖိုးက ၂၀၀ကျပ်ပါ။ FDC လည်းထွက်တယ်။ ၆၀၀ကျပ်ပါ။ ဒေတာကဒ်လှလှလေးက ခုနောက်ပိုင်း ဝယ်လို့ရလာတယ်။ ၆၀၀ ကျပ်ပါဘဲ။ ခုနောက်ပိုင်းထုတ်တဲ့ တံဆိပ်ခေါင်းတွေ ဒီဇိုင်းလှတယ်။ FDC ကောင်းတယ်။ ဒေတာကဒ်တွေကလည်း ဝယ်သိမ်းထားချင်စရာ။ အဲ အဓိက တံဆိပ်ခေါင်း တွေဘဲ ဆေးရောင်မှိန်လွန်းနေတယ်။ . လိပ်ပြာအမည်က Red Lacewing ။ မြန်မာအမည် ရှိဟန်မတူ။ စီးရီးစ်ရဲ့ ထုံးစံအတိုင်း နိုင်ငံအမည် မြန်မာလို မပါပါ။ . ပုံမှာ တံဆိပ်ခေါင်းကို မြင်ရအောင် အရောင်ဆွဲတင်ထားတယ်။ ကြေညာတဲ့ပုံကအရောင်နဲ့ နှိုင်းယှဥ်မြင်ရေအာင် ထည့်ပေးထားတယ်။

ရိုးမကိုကျောခိုင်း၍၊

ဦးတင်ညွန့်ရဲ့ စာအုပ်။ ''ရိုးမကိုကျောခိုင်း၍'' ဆိုလို့ တောခိုတဲ့အကြောင်းများလားလို့။ အဖုံးပုံကလည်း ''သူတိုပြန်ကြလေပြီ'' နဲ့ ခပ်ဆင်ဆင်။ . စာဖတ်ကြည့်မှ ရိုးမကိုတော့ ကျောခိုင်းခဲ့ပါရဲ့၊ ရန်ကုန် စာပေလောကသို့ ဖြစ်နေတယ်။ ယနေ့ ကျနော်တို့ ဆရာတင်ညွန့်စာတွေဖတ်ရဖို့ ဇတ်လမ်းအစပေါ့။ . ဆရာက အရင် သူ့ကျောင်းဆရာဘဝကို အခြေခံပြီး ''၃၃'' ဆိုတဲ့ ဝတ္ထုတအုပ် ရေးဘူးတယ်။ ဒီစာအုပ်က ''၃၃'' အဆက် ''၃၄'' ဆိုပြီး ရေးခဲ့တာတဲ့။ . "၃၃'' ထဲက ဇတ်လမ်းကို အခြေခံပေမယ့် ဒီစာအုပ်မှာ ၈၈ အရေးအခင်းအချိန် အသားပေးဖြစ်နေတယ်။ အဲ့တုံးက ဆရာပတ်သက်ခဲ့ရာ ပဲခူးမြို့သပိတ်အကြောင်း မှတ်တမ်းပေါ့။ . ဆရာရဲ့ အရေးအသား ကျွမ်းကျင်မှုကြောင့် မူရင်းဝတ္ထုဇတ်လမ်းလည်း ထည့်ရေးသွားနိုင်တယ်။ မြန်မာတွေ တမျိုးထင်လေ့ရှိတဲ့ရောဂါကို ဘရိန်းကျူမာကြောင့်လို့လည်း ရေးပြနိုင်တယ်။ တခါတခါ ဆရာရေးပြလေ့ရှိတဲ့ ဂမ္ဘီယစတိုင်နဲ့ပေါ့။ . အဆုံးသတ်အထိ ဖတ်ပြီးတော့မှ ဘာလို့ ဒီစာအုပ်ကို ၃၄ လို့ အမည်မပေးလည်း နှမြောမိတယ်။ ဆရာတင်ညွန့် ပရိဿတ်ကတော့ သဘောကျကြမှာပါ။ သုတရော ရသပါပေးတဲ့ စာအုပ်တအုပ်ပါ။

ဒေါ်နွယ်ထွမ့်အဖြစ်တွေ၊

ဒေါ်နွယ်ထွမ်း သံပဒတ် ဖြစ်တာ တလကျော်လာပြီ။ ယူတုကတဆင့်ကြည့်တဲ့ သတင်းတွေမှာ သတိထားမိတာတခုရှိတယ်။ သူရဲ့အင်တာဗျူးတွေ မေးခွန်းအဖြေတွေမှာ အရင်သံပဒတ်ဟောင်း ဘိုင်ဒဲန်ကို ထည့်ထည့်ပြောလေ့ရှိတယ်။ နာမည်တပ်ပြီးတော့ကို မကောင်းကြောင်း ပြောလေ့ရှိတယ်။ . ဘိုင်ဒဲန်က ထူးချွန်တဲ့သမတ မဟုတ်ခဲ့ပါ။ သို့သော် ဟိုးအရင် သမတအဆက်ဆက်လည်း ပြုတ်သွားပြီဖြစ်တဲ့ သမတဟောင်းတွေကို နာမည်ခေါ်ပြီး ဒီလိုနာနာကျည်းကျည်း အပစ်တင် ပြောတာမျိုး မကြားဘူးပါ။ မသကာ ''အရင်အစိုးရ'' ဆိုပြီး သုံးတာမျိုးဘဲ တွေ့ဘူးတယ်။ မိမိက လက်ရှိသမတဖြစ်နေပြီဆိုတော့ လုပ်စရာရှိ လုပ်သွားကြတာဘဲ။ . ခု ဒေါ်နွယ်ထွမ့်ကျမှ ဘိုင်ဒဲန်ကို အညှိုးတကြီး ထည့်ထည့်ပြောနေတာ သတိထားမိတာ။ ဒါနဲ့ ဘာကြောင့်များလည်း စဥ်းစားကြည့်တော့ ဖြစ်နိုင်တာ သွားတွေ့တယ်။ . ဒေါ်နွယ်ထွမ်းက ဘိုင်ဒဲန်ကို မဲရှုံးလို့ သမတပြုတ်ခဲ့တာ၊ ဘိုင်ဒဲန်က ဒေါ်နွယ်ထွမ်းကို မရှုံးဘူးဘူး။ သူ့ဖာသာ မပြိုင်တော့လို့ နားသွားရတာ။ ဒီအဖြစ်ကို အညှိုးကြီးဟန်တူတဲ့ ဒေါ်နွယ်ထွမ်း အခဲကြေဟန်မတူ။ ရှုံးခဲ့တဲ့ လွန်ခဲ့တဲ့ လေးနှစ်ကလည်း အေးဆေးအရှုံးပေးခဲ့တာ မဟုတ်ဘဲ ပြဿနာတွေရှာခဲ့သေးတာ။ ဘယ်လိုမှမရလို့သာ သမတကနေ ထွက်ပေးလိုက်ရတာကိုး။ . ဒီတော့ အညှိုးထားဟန်ရှိတယ်။ နောက်တကြိမ်ပြန်ပြိုင်လို့ ငါပြန်နိုင်ရင် အပြတ်သိပ်မယ်လို့ တေးထားလိမ့်မယ်။ သို့သော် အခြေအနေတွေက သမတသာဖြစ်လာတယ်။ ဘိုင်ဒဲန်ကို မနိုင်လိုက်ရဘူး။ ဒီတသက်လည်း နိုင်ဘူးတော့မှာ မဟုတ်။ . ငယ်ငယ်က ကလေးတွေ စကားအနိုင်ယူပြောသလို ပြောရရင် ''ထွမ့်ရာ၊ မင်းသမတသာ ပြန်ဖြစ်တာပါ၊ ငါ့ကိုမနိုင်ဘူးပါဘူး။ ငါကသာ မင်းကိုနိုင်ပြီး သမတဖြစ်ခဲ့တာကွ'' ဆို ဒေါ်နွယ်ထွမ်း ဒေါသအချောင်းချောင်း ထွက်နေမှာဘဲ။ . ပိုဆိုးတာက gender ခွဲတာ မဟုတ်ပေမယ့် ဗမာဆန်ဆန် စကားနိုင်လု ပြောလို့ရတာ ရှိသေးတယ်။ ''ဒေါ်နွယ်ထွမ်းရာ၊ မင်းသမတရွေးပွဲမှာ နိုင်ဘူးတာ ဒီမိုကရက်အမတွေကိုသာ နိုင်ဘူးတာပါကွ၊ ဒီမိုကရက်အထီးတွေကို မင်း တခါမှ မနိုင်ဘူးပါဘူးကွာ'' လို့စ်။

မြန်မာ့လိပ်ပြာတံဆိပ်ခေါင်း(၁၀)

မြန်မာ့လိပ်ပြာ တံဆိပ်ခေါင်းစီးရီးအတွက် ဆယ်ခေါင်းမြောက်ထွက်တယ်။ တံဆိပ်ခေါင်းတန်ဖိုး ၂၀၀ကျပ်ပါ။ FDC လည်းထွက်တယ်။ ၆၀၀ကျပ် ဖြစ်သွားပြီ။ . ဒီနေ့ တံဆိပ်ခေါင်းအကြောင်းကဒ်ပြားတွေ ရောင်းမကုန်သေးတာတွေ့ရတယ်။ အရင်က ခဏနဲ့ကုန်လို့ ပြဿနာတက်သံကြားရတတ်တယ်။ နှစ်ခါသုံးခါလောက် ရောင်းတယ့်အထဲ မပါလာ၊ ကြိုမှာထားသူတွေနဲ့တွင် ကုန်သွားလို့ပါတဲ့။ . လိပ်ပြာအမည်က Green Spotted Triangle ပါတဲ့။ မြန်မာလို လိပ်ပြာအမည် ရှိဟန်မတူ။ စီးရီးထုံးစံအတိုင်း နိုင်ငံအမည် မြန်မာဘာသာဖြင့် ဖော်ပြမထားပါ။ . The Burma Fantail စာစောင်မှာ ဖော်ပြတုံးက အရောင်အထွက်ဆုံး တံဆိပ်ခေါင်းလို့ထင်မိတယ်။ အခုအပြင်မှာ အရောင်မှိန်ပါတယ်။ . ဒီနေ့ ရန်ကုန်စာတိုက်ကြီးမှာ လူငယ်လူသစ်အချို့တွေ့တယ်။ တံဆိပ်ခေါင်းစုတဲ့လူ အသစ်တိုးမလာတာ ကြာပြီ။ မြင်နေကျ လူဟောင်းတွေဘဲ တွေ့နေရတာ။

လွတ်လပ်ရေးနေ့ တံဆိပ်ခေါင်း၊

ပုံမှန်အတိုင်းဘဲ လွတ်လပ်ရေးနေ့မှာ အထိမ်းအမှတ် တံဆိပ်ခေါင်း ထုတ်ပါတယ်။ သုံးခေါင်းပါ။ မြန်မာ့စာပို့ဌာနအနေနဲ့ အကြိမ်အများဆုံး ထုတ်ဝေလေ့ရှိတဲ့နေ့ပါ။ . ၂၀၀ ကျပ်တန် သုံးခေါင်းပါ။ ရန်ကုန် ပုဂံ နဲ့ အင်းလေးဒေသ ပုံတွေနဲ့ပါ။ FDCလည်း တံဆိပ်ခေါင်းပုံနဲ့အတူ သုံးမျိုးပါ။ ၂၀၂၅ နှစ်သစ်နဲ့အတူ FDCက ဈေးတက်သွားပါပြီ။ တအိပ် ၆၀၀ကျပ်ပါ။ ကွာလတီကတော့ ကောင်းမြဲပါ။ . တံဆိပ်ခေါင်းဒီဇိုင်း တိုးတက်လာတယ်လို့ ပြောရမယ်။ အရင် လွတ်လပ်ရေးနေ့ အထိမ်းအမှတ်ခေါင်းဆို bill board ပိုစတာပုံတွေနဲ့ ထုတ်လေ့ရှိရာက အခုတခေါက် ပို့စကဒ်ပုံနဲ့ တူလာပါပြီ။ . အင်းလေးပုံနဲ့က သုံးခေါင်းထဲ အကြိုက်ဆုံးပါ။ ဒီတခေါက် ကာလာလည်း အခြားစီးရီးက ခေါင်းတွေထက် ပိုပါသလိုဘဲ။ မူရင်းဒီဇိုင်းမှာကိုက အရောင်တောက်လို့လား မသိပါ။